E imi, e itea ïa ia outou

E au mau taeaʻe e mau tuahine here, te pure nei au ia arataʻihia vau e te Varua o te Fatu a paraparau ai au ia outou i toʻu mau manaʻo e toʻu nei iteraa papu.

Te hoê o te mau titauraa puai e te mau fafauraa i horoʻahia mai e te Faaora, e itehia ïa te reira i roto i teie parau poto noa « e imi, e itea ïa ia Outou ».¹

Noaʼtu e i roto i te parau no te imiraa, te vai ra te pure e te taparu, ua rahi atu â toʼna hohonuraa. Te imiraa, ua hau atu ïa i te hoê tere, eiaha râ mai te hoê noa ohipa iti.

E faaau vau i te reira mai te hoê hororaa atea roa. Noaʼtu e ua ite tatou eaha to tatou tapaeraa hopea, e roaa ia tatou te iteraa faufaa roa e te haapiiraa mau i te mahana tataʻitahi, a haere noa ai tatou i mua i roto i ta tatou opuaraa.

A imi ai tatou i te mau mea a te Atua, e tiʻa roa ia tatou ia faahaehaa ia tatou iho i mua Iaʼna, ma te haamanaʻo e, e mea na roto i Toʼna aroha tatou e farii ai i te reira, e ia faatano i to tatou mau manaʻo e ta tatou mau pure, to tatou faaroo e to tatou mau hinaaro, e noaʼtu te itoito o to tatou aau e riro paha tatou i te farii i te maramarama no o mai i te Metua here i te Raʻi ra.

Te hohoʻa no te imiraa i te pahonoraa a te Atua, e mea ohie roa ia faataa i te reira, e hau atu â, no te taata iho ia faaohipa anaʻehia te reira. Ei omuaraa, te anihia nei tatou ia haapii i roto i to tatou feruriraa, e ia haamanaʻo noa i roto i to tatou aau i taua mau mea ra ta tatou e hinaaro roa no ô mai Iaʼna ra.² Teie nei raveʻa no te haamanaʻoraa, e horoʻa mai oia i te maramarama e te faaururaa i to tatou varua. Ua haapiihia ia tatou ia faaite atu i to tatou mau manaʻo e mau hinaaro i to tatou Metua Here i te Raʻi ra na roto i te pure haehaa e te fafauraa e, mai te mea e, e aniʻtu tatou Iaʼna i te iʻoa o te Mesia, mai te peu e, e mea maitai anei te mea ta tatou e imi ra, e mai te mea, e « ani tatou na roto i te aau parau-tiʻa, na roto i te hinaaro mau, na roto i te faaroo i te Mesia, e faaite mai Oia i te parau mau no te reira [i roto ia tatou] na roto i te mana o te Varua Maitai », no te mea « na roto i te mana o te Varua Maitai » tatou « e ite ai i te parau mau o te mau mea atoa ».³

E, eaha te tiʻa ia tatou ia imi ?

Te haapii mai nei te mau papaʻiraa moʻa ia tatou e, e tiʻa roa ia tatou ia « imi… ma te haapaʻo maite i te mau horoʻa maitai roa aʻe»,⁴ e mea tiʻa ia tatou ia imi i te paari, e ia haroaroa, ia « faaineine i te mau mea e hinaaro mauhia ».⁵ Ua aʻohia tatou ia horoʻa i to tatou taime ia tavini ia vetahi ê⁶ e ia imi i taua mau « mea maitai, te mau mea faahiahia, e aore râ te mau mea roo maitai, e aore râ popouhia ra ».⁷

I taua taime ra, aita tatou i titauhia ia imi i te mau mea viivii o te ao nei. ⁸ Ua parau te peresideni Gordon B. Hinckley e : « E rave rahi mau mea ino, te ino e ume mai i te ino i roto i te ao nei. A ape i te reira e au mau taeaʻe, e au mau tuahine. A haere-e atu. E maʻi ino mau. Mai te raau taero toʼna ra huru, e faaino oia ia outou. A faaatea-e atu i te reira ».⁹ I roto i te buka a Amosa e taiʻo tatou « E imi i te maitai , eiaha te ino ia ora outou, ei pihaʻi atoa iho te Atua sabaota ra o Iehova ia outou i reira ».

Eaha ta tatou e imi matamua, e na mua roa, i niʻa aʻe i te tahi atu mau mea, o te « basileia ïa o te Atua e Toʼna parau-tiʻa ».¹¹ Te imi nei tatou ia ite i « te Atua mau ra, ia Iesu te Mesia o Taʼna i tono mai ».¹²

I roto i te iritiraa parau no te titauraa ia imi, e ia iteahia, ua parau te Faaora, « A haafatata mai iaʻu nei e e haafatata atu ïa vau ia outou na, a imi itoito noa mai iaʻu nei e e ite mai hoʻi outou iaʻu ».¹³

E, eaha ïa te auraa no te parau no te iteraa Iaʼna ?

Ia faaite tatou i to tatou faaroo, e ia horoʻa i to tatou itoito no te haafatata i pihaʻi iho ia Iesu Mesia, e haamata ïa tatou i te ite o vai mau râ Oia. Ia imi maite anaʻe tatou Iaʼna, e farii tatou i te hoê iteraa papu hohonu e te vai tamau maite no Toʼna here faito ore, Toʼna oraraa parau-tiʻa e te hiʻoraa maitai, e te mau haamaitairaa o Taʼna tusia taraehara. Ia haafatata anaʻe tatou Iaʼna, e haamata tatou i te ite Iaʼna, e ia ite atu Iaʼna ei Rahu Nui no te ao nei, te Faaora o te taata atoa, te Tamaiti Fanau Tahi a te Metua, te Arii o te mau Arii, te Arii o te Hau.

Hohonu noaʼtu ta tatou imiraa, rahi noa atoaʼtu to tatou mauruuru i Taʼna ohipa mai te Iehova Rahi o te Faufaa Tahito, e te Mesia Moʻa o te Faufaa Apî. E haamata ïa tatou i te taa rahi atu â i Taʼna parau poroʻi mure ore no te faaoraraa e te faateiteiraa. Ua iteahia ia tatou e, e tamau noa Oia i te pii ia tatou ia haere mai e ia pee Iaʼna, e e mea papu hoʻi Taʼna mau haapiiraa, e e nehenehe te reira ia faaohipahia i teie mahana mai tei na reirahia i te mau uʻi hou teie nei anotau. Te haamata ra tatou i te ite e, ma te mauruuru rahi, eaha tei tupu i Gesemane, e i Kalavaria. Noaʼtu te reira, ua pari hapehia e ua haavahia Oia. Ua horoʻa noa Oia i Toʼna ora, e na roto i te rave faaoti-roa-raa i Taʼna iho mau parau i tohu, ua tiʻa-faahou mai Oia i te toru o te mahana. Na teie horoʻa tei hau i te mau taoʻa atoa i faatupu i te tahuti ore no te taatoaraa e te ora mure ore no tei haapaʻo e tei faaroo.

Ia haamata anaʻe tatou ia ite e, Taʼna parau poroʻi, no te taatoaraa ïa o te taata e i te mau vahi atoa, e farii ïa tatou, ma te oaoa rahi, i te papaʻiraa e faahiti ra i Toʼna tere i te fenua Marite no te farerei i te feia tahito e noho ra i reira. Ua oaoa tatou i te taeraa mai te Buka a Moromona te piti o te ite – e oia atoa te tahi atu parau tutuu – no Taʼna misioni ei Mesia, ei Faaora, e te Taraehara o te ao. Ua ite tatou e, te taata nei, e nehenehe oia e haafatata atu Iaʼna na roto i te imiraa e te pureraa no niʻa i te Buka a Moromona, eiaha râ na roto i te haapiiraa i te tahi noaʼtu buka.¹⁴

A imi ai tatou ia iteahia mai Oia, ua farii tatou i te hoê ite no Toʼna iho haereraa e Toʼna Metua, e farerei i te tamaiti peropheta ra, o Ioseph Semita, ia tomo i roto i te tiaʻi-maoro-raa « i te tuuraa parau i te hoperaa mau o te mau tau ra ».¹⁵

A imi ai tatou Iaʼna, ua ite tatou e, ua faatiʻa Oia i Taʼna Ekalesia i niʻa i te fenua nei. Te Ekalesia a Iesu Mesi i Te Feia Moʻa i Te Mau Mahana Hopea Nei, e na roto i Taʼna Ekalesia, ua horoʻa mai Oia i te mana e te parau no te faatupu i te mau oroʻa e au, ia nehenehe ia tatou ia hoʻi faahou i pihaʻi iho Iaʼna ra.

A imi ai tatou Iaʼna, ua ite tatou e, te tamau noa ra Oia i te arataʻi i Taʼna Ekalesia na roto i Taʼna peropheta ora, o Gordon B. Hinckley, e te faanahonahoraa o Taʼna Ekalesia, ua hamauhia ïa i niʻa iho i te mau aposetolo e te mau peropheta, o « te Mesia Iho te upoo faatere o te ofaʻi tihi ».¹⁶

A imi maite ai tatou Iaʼna, e ite tatou i Toʼna here no tatou, e hau atu to tatou haroaroa maitai i te mau pahonoraa i ta tatou mau pure. Ua maramarama tatou e, na roto i Toʼna Varua, ua itea ïa « te paari e te mau taoʻa rahi no te ite, oia te mau taoʻa rahi i hunahia ra »,¹⁷ e ia farii i te hinaaro rahi ia ora to tatou oraraa ia au i Taʼna mau faaueraa e arataʻiraa.

A imi ai tatou Iaʼna, ua itea ia tatou e, « Oia te maramarama e te ora i te ao nei ».¹⁸ A imi ai tatou Iaʼna, te mau taeaʻe e te mau tuahine, e tiʻa roa ia tatou ia imi Iaʼna e ia farii i te hau o Taʼna i fafau mai ia tatou. Te faaite papu nei au i te reira, na roto i te iʻoa o Iesu Mesia, amene.