[A] haapaʻo i te ora o te varua

I roto i te ao nei, te tupu nei te mau huananeraa e te mau peʻapeʻa – o te mau ohipa ïa e tae mai i niʻa ia tatou – o te mau ati atoa ïa e fariihia e to te ao nei : noaʼtu te tauʻaraa a to te ao nei, e maiti ihoa tatou – i roto râ i te mau parau a te Fatu ia « haapaʻo… i te ora no te Varua » (PH&PF 101:37). Noaʼtu to tatou haapeʻapeʻa i te mau ohipa e tupu nei i pihaʻi iho ia tatou, e tupu te aroraa o roto mai ia tatou i te taime no te hau e i te mau taime no te ati. Noaʼtu e ua maramaramahia e aore râ, ua itehia, e ohipa teie e faaotihia i roto i te tahuti nei mai tera uʻi e i tera uʻi.

A tutavaʼi tatou i te haapaʻo i te mau faaueraa a te Atua, « e faaapîhia te taata i roto i tera mahana e tera mahana » (2 Korinetia 4:16) I reira, noaʼtu te mau mahana ino, e « haapaʻo ïa tatou i to tatou iho ora » noaʼtu te mea e tupu (a hiʻo Maseli 19:16). E farii au e, te tahi mau opuaraa no te « haapaʻo » e no te « tapeʻa » i to tatou varua e tupu te reira e aore râ, e tupu ma te manaʻo-ore-hia, mai te tamaiti tei haere i te fenua roa. Ua faaamu oia i te puaa i tera mahana e i tera mahana, inaha, « îho faahou maira toʼna iho huru mau » (Luka 15:17). Eaha te mea o tei tupu i taua mahana taaê ra, « i taua fenua atea ra », (Luka 15:13), ua « manaʻo ihora i [toʼna] ora », (Salamo 119:59), e faaoti papu aʻe ra e, « E tiʻa vau e haere i taʻu metua ra » (Luka 15:18). E roaa te tauiraa i muri mai i te hiʻoraa i roto iaʼna iho. Aita hoʻi oia i haapaʻo-noa-hia mai e te feia te hiʻo mai iaʼna, noaʼtu e, ua tupu te tahi mau ohipa mure ore i niʻa iaʼna.

I te hoê tau, ua itehia te hoê tauiraa no te mau mea o rapae e o roto. Te faaau nei Pilato i roto i te arepurepuraa e haaati nei iaʼna e ia Iesu o Nazareta. Toʼna au-faahou-raa ia Heroda – inaha ua parahi « enemi » noa na hoʻi raua (Luka 23:12) – e ohipa poritita ïa na te feia i faaara-noa-hia na. Noaʼtu râ teie mau manaʻo mârô, ua auraro oia i te tiriʻa rahi, ma te tuu ia Baraba eiaha râ ia Iesu. Noaʼtu e ua horoi oia i toʼna rima hara ore, ua hoʻi atu o Pilato ia Kaisara ra. Areʻa o Iesu ra, ua tonohia ïa i Getesemane i Kalavaria, ia faatupu i te mauiui pohe area râ, te auraroraa i te taraeʻhara rahi ia tupu te tiʻa-faahou-raa no te taatoaraa.

I teie mahana, te marua mai nei te ata o te tamaʻi i ô, i unei, te haamanii mai nei oia i te ua i niʻa i te parau-tiʻa e i niʻa i te parau-tiʻa-ore, areʻa te horoʻa hanahana o te Mesia, te tiʻa-faahou-raa rahi, e haamaniihia mai ïa i niʻa ia tatou paatoa. Eita te arepurepu o te mau are e faaite eaha râ te mea e tupu i roto i te hohonuraa o te miti, oiaʼtoa ïa te huru no te Taraʻehara, oiaʼtoa ïa te mau mea mure ore o tei tupu i roto i te hoê aua naʻinaʻi i niʻa i te hoê aivi poiri.

E ninii mai te Atua i Taʼna ohipa na roto i te hau. Mai teie te huru, no te imiraa i te faufaa te utuafare o Iosepha Semita Metua i tere mai New England mai e faaea i New York, ua arataʻihia ratou – ma te ite ore – i te mau papaa parau moʻa, tei hunahia i niʻa i te Aivi no Cumorah, a tiaʻi atu ai ia riro ei « ite taaê no te Mesia », a « vai ai te fenua nei » (2 Nephi 25:22).

No reira, tei roto tatou i te mau taime no te tamaʻi, aita reʻa taime no te haapaʻoraa « i te ora no te Varua » o te mea faufaa hoʻi. Ia faataa te mau tumu i te taime faufaa no te umeraa i te taata ia rave i te maitai, eiaha ïa e faariro i te mau huananeraa o te ao nei ei otoheraa no te oreraa e faatupu i te opuaraa papu, tae noaʼtu e, e aʻe ohie roa vetahi. Ia tupu noaʼtu te mau tamaʻi i uʻnei, i ô, eiaha roaʼtu tatou e ofati i ta tatou mau fafauraa ! Teie te hoê hiʻoraa, aita te faaturi e fariihia no te mea ua tupu te tamaʻi, e faataa te tahi mau vahine e tane. Aita e faataaraa no te ture hitu tei na ô e, « Eiaha roa oe e faaturi maori râ, i roto i te tau tamaʻi » (a hiʻo Exodo 20:14).

I te hoê tau tamaʻi, ua aʻo te peresideni David O. McKay i te mau melo i roto i te nuu, ia « tapeʻa mâ noa i to ratou tiʻamâraa » i rotopu i « te huru animala o te tamaʻi » (i roto i te Conference Report, eperera 1969, 153).

E aro mai te tahi basileia i te tahi basileia, noaʼtu râ, eita teie mau arepurepuraa e faatiʻa i te taata tapihoo ia tiʻa mai i niʻa i te tahi taata tapihoo e aore râ, te tahi mau fatu ohipa i niʻa i te tahi atu fatu taiete na roto i te eiaraa e aore râ, i te haavareraa, e inaha ua ofati ïa i te numera 8 e te 9 o na ture hoê ahuru – no te mea aita roa e faatiʻamâraa e horoʻahia i te otoheraa i te hoê taata (a hiʻo Exodo 20:15-16).

Eita te papu ore o te mau huru o te oraraa nei e faatiʻa i te feaa morare, te mau peʻapeʻa o te faanevaneva nei ia tatou eita te reira e tapoʻi i ta tatou mau hara i mua i te Atua ia ore e itehia mai. Faahou â, eita te mau manuïaraa o te nuu e mono i te manuïaraa o ta tatou iho mau aroraa no te haavî ia tatou iho. Eita atoa te riri, te tairoiro o te taata nei e faaiti i te maitai roa-raa o te Atua e i te here faaora no te taatoaraa o Taʼna mau tamarii. Oiaʼtoa, eita te mau ohipa e tupu nei e haapoiri i to tatou mau mata i te parau mau mure ore e ia faahuru ê i te parau e, o te Mesia te Maramarama o teie nei ao !

No reira, ia riro tatou mai te taata apî ra e o Elisaia i niʻa i te mouʻa. Na mua roa, ua mătaʻu oia i teie rahiraa pereoo enemi i te haaatiraa mai, faaʻaraarahia ihora toʼna na mata, e ite atura oia i te « puaa-horo-fenua e te pereoo auahi », e ite ihora « ua rahi atu to raua i to ratou » (Te mau Arii II 6:16, 17). E te mau taeaʻe e te mau tuahine, aita te numeraraa pae varua i taui !

Eita to tatou maramarama ore e te hepohepo e taui i te maere o te ite atearaa o te Atua o te tauʻa nei i ta tatou mau maitiraa tei riro hoʻi ei hopoiʻa na tatou. I rotopu i te mau vaehaa o te mau parau faataaraa e te mau parau apî no te mau peʻapeʻa rau o te taata nei, te ora nei te Atua i niʻa i te hoê ao mai te hoê moana hiʻo ei reira te mau mea tei mairi i muri, o te vai nei i teie nei, e o tevai a muri atura, e vai noaʼi hoʻi i mua Iaʼna (a hiʻo PH&PF 130:7). E tupu mau â Taʼna mau opuaraa hanahana, e noaʼtu te mea Taʼna e opua i roto i Toʼna aau ia rave, e rave ihoa Oia i te reira (a hiʻo Aberahama 3:17). Ua ite Oia i te hopea mai te matamua mai ! (a hiʻo Aberahama 2:8). E nehenehe te Atua « e rave i [Taʼna iho]… ohipa » e i te faatupu i te taatoaraa o Taʼna mau opuaraa, e te hoê mea hape e itehia i roto i Taʼna faanahoraa numera hoê no te taata nei, e hape ïa no to tatou faaohiparaa i to tatou tiʻamâraa ! (a hiʻo 2 Nephi 27:20).

Ua haapapu mai te Atua ia tatou :

« E arataʻi atu na vau ia outou » (PH&PF 78:18)

« E haere atu vau na mua ia outou » (PH&PF 49:27)

E vai noa « mai ïa [tatou] » te mau taeaʻe e te mau tuahine, « i to [tatou] taime peʻapeʻa atoa ra » (PH&PF 3:8), oia hoʻi, na roto i te tauturu a Toʼna peropheta ora, te peresideni Gordon B. Hinckley.

A tiaʻi noaʼtu ai i te taime faufaa i roto i te haapaʻoraa « i te ora no te varua » a tamau noa â i te auraro noaʼtu e, e pahono tatou na roto i te faaauraa ohie e aore râ, na roto i te patoʻiraa, i roto i ta tatou mau opuaraa o te taata iho i te mahana hoê, mai teie te huru, maitai e te riri, aroha e te parau-tiʻa-ore, maitai e te piro.

Eita te mau tamaʻi e faaore i te ture piti o na ture rahi ra. Aita toʼna e otiʻa. Aita to te feia i ati atu iaʼna e tapaʻo, aitaʼtoa e tapaʻo i niʻa i te iri.

E ite paha tatou i te poʻia, noaʼtu râ, e nehenehe tatou e pahono mai te vahine ivi o tei faataa i taʼna toeʻa o taʼna maa no te faaamu ia Elisaia (a hiʻo Te mau Arii I 17:8-16). E haaputapu mauhia te aau i te huru no taua opereraa i rotopu i te ereraa e te veve. I roto i toʼna oraraa matamua, e haere tamau te hoê episekopo maitai roa o toʻu apîraa, o Miti Thirl marsh, e tapaʻo i toʼna iʻoa i roto i te mau ôraa repo i te mau tau o te Faaitiraa. No toʼna apî area râ, e taata rahi, ua haere tuutuu-ore noa oia e inaha, rave-roa-hiaʼtura oia, aita râ te tahi o toʼna mau hoa i fariihia. Tera râ, e rave rahi taime to teie taata apî o Thirl opereraa i taʼna faufaa na toʼna mau hoa noaʼtu toʼna rohirohi i te raveraa i taua ohipa teimaha ra e tae noaʼtu e ua tarahu atoahia toʼna mau hoa. Aita e maere, ua riro mai oia ei tiaʻi mamoe maitai roa i muri mai.

Ia ferurihia te haapaʻoraa « i te ora no te varua », na te reira e tauturu i te tutavaraa no to tatou faafariuraa taatoa i te mau vahi i reira te huero o te evanelia i topaʼi i roto i te « repo maitai », – ta Iesu i parau ra e, te feia « aau haavare ore e te au » (Luka 8:15). Ia tupu mau teie ohipa, « ua faaroo ïa i te parau » ma te « oaoa » « faaroo ihora », « hotu maira », e « haapaʻo maite atura », ma te haapii i te auraa o te « hiaai e o tei poʻiha i te parau-tiʻa ra » (Mataio 13:20 ; Iritiraa a Iosepha Semita, Mataio13:21 ; Mataio 5:6). E « tauiraa rahi » (Mosia 5:2). E faahohoʻaraa te faafariuraa i te tauiraa mai te « taata tino nei » ia riro ei « taata o te Mesia » (Mosia 3:19 ; Helamana 3:29 ; hiʻo atoa 2 Korinetia 5:17). E ohipa o te titau hau atu i te hoê noa avatea.

Ua tuʻatihia mai i roto i te hopea o teie nei raveʻa tamau, « e ore matou i hinaaro ai i te rave i te ino, ia rave râ i te maitai » (Mosia 5:2). E ere i te mea maere, no reira, teie raveʻa i faatiʻaʼi i te feia tei faafariu maitaihia ia « haapuai i to [ratou] mau taeaʻe » (Luka 22:32) e no te faateitei ia vetahi ê « ia vai ineine â outou ia parau atu i te taata atoa ia ui mai ia outou i te tiʻaturi i roto ia outou na » (1 Petero 3:15). Taua huru taata ra, e faatupu ïa i te hoê atu taviniraa puai e te haehaa, i te mau taata atoa : e riro ïa ratou ei tuhaa no te feia o te Atua o te titau i te mau haamaitairaa i niʻa i te mau taata atoa.

Te mau pĭpĭ tei fariu mau, noaʼtu te papu ore, e tamau noa ïa i te haapaʻo « i te ora o te Varua » noaʼtu eaha te mahana, te ahururaa o te matahiti, i rotopu i te ino e te haamouraa. Ua parauhia teie faaauraa te « haapaʻoraa i ta te Metua » (Luka 2:49 ; hiʻo atoa Mose 1:39).

Mai te taime mai â o te tauiraa o te manaʻohia nei e te tupu nei, te tauturu nei te mau arepurepuraa teimaha ia tatou na roto i te faatupuraa i te hoê tauiraa vitiviti roa oia ïa te fariuraa i te Mesia.

E te mau taeaʻe e te mau tuahine, i rotopu i te haapaʻo papu ore e te mauiui o te ao nei, e aupuru anaʻe tatou, « I te Ora no te Varua » mai tei haapiihia mai. Mauruuru i te taraʻehara hanahana a Iesu, te ora o taua varua tahuti ore hau atu i to te mau fetiʻa, e, noaʼtu e mea poto roa te taime no te tere-tamataraa o te tahuti nei, noaʼtu e e mea rave ‘ata.

Te faaite papu nei au i te reira, na roto i te iʻoa Moʻa o Iesu Mesia, Amene !