Te faufaa o te utuafare

I roto i te hoʻe ao aehuehu e te papu ore, mea faufaa roaʼtu â ïa ia faariro i to tatou mau utuafare ei pû no to tatou oraraa e te matamua roa no ta tatou mau titauraa. Tei ropu maitai te parau no te mau utuafare i te faanahoraa a to tatou Metua Here i te Ao ra. Teie parau i roto mai i « Te Utuafare : E Poroʻi i to te Ao nei », e faaite i te mau hopoiʻa a te mau metua i to ratou ra mau utuafare.

« E hopoiʻa moʻa ta te tane faaipoipo e te vahine faaipoipo no te here e no te haapaʻo ia raua iho e i ta raua atoa ra mau tamarii. ‘Te tamarii ra, e tuhaa ïa no ô mai ia Iehova ra’ (Salamo 127:3). Tei te mau metua te hopoiʻa moʻa no te aupuru i ta ratou mau tamarii i roto i te here e te parau- tia, no te haapaʻo i to ratou mau hinaaro pae tino e pae varua, no te haapii ia ratou i te here e i te tavini te tahi i te tahi, no te haapaʻo i te mau faaueraa a te Atua e no te riro ei feia faatura i te mau ture o te fenua e faaeahia e ratou. Te mau tane faaipoipo e te mau vahine faaipoipo – te mau metua vahine e te mau metua tane – e tiʻa ratou i mua i te aro o te Atua ia haavahia mai te au i to ratou haapaʻoraa i taua mau hopoiʻa ra ».¹

I roto i te mau apooraa a te peresideniraa Matamua, ua faaite ratou e te ino nei te utuafare. Ta ratou parau i faatae i te Apooraa Faatere a te Autahuʻaraa maori râ, ia haapuai i ta tatou mau hopoiʻa i niʻa i te utuafare.

Ei pahonoraa i te Peresideniraa Matamua, ua haamauhia e rave rahi mau faanahoraa. E faaohipa tatou i te taato‘araa o te mau rave‘a e vai nei no te faaitoito ia puai atu te auraa maitai, te here, e ia rahi atu te mana i roto i te faanahoraa taaê a te Fatu – te utuafare.

Mea titauhia tatou ia faariro i to tatou mau utuafare ei hoê vahi paruru i te mataʻi iino, o te rahi noaʼtura. Noaʼtu e te vai nei te au uputa nainai, e nehenehe râ te mau mea iino e ô i roto i te patu o to tatou mau utuafare. E faaite atu vau i te hoê hiʻoraa.

Tau matahiti i mairi aʻe nei, te tamaa ra vau e taʻu tamahine e toʼna utuafare. E huru ihoa te reira i roto i te mau utuafare e te vaira ta ratou mau tamarii nainai. Te tamata ra taʻu tamahine i te faaitoito i taʼna tamaiti nainai e toru matahiti te paari ia amu i taʼna maa. Ua amu oia i te taatoʻaraa o te maa o taʼna e au. Ua toe noa mai te tahi na huero pĭpĭ, o taʼna i ore e au ia amu. Ua tamata te mama i te rave i te patia e ma te faaitoito i taʼna tamaiti ia amu i tera mau pĭpĭ. Ua farii oia i te faito o taʼna e nehenehe e farii. I muri mai ua parau ihora oia, « Mama, eiaha na oe e faaino i to taua auraa maitai ! »

Tera mau te parau taʼna i faaroo i roto i te afata teata tau mahana i mairi aʻe nei. Aue ! Tera te huru o te faatianianiraa, te mau faanahoraa afata teata, te itenati e te tahi atu mau veʻa e topa mai nei i niʻa i to tatou mau utuafare !

Te faahaamanaʻo atu nei matou e na te mau metua e peresideni i roto i to ratou iho mau utuafare.

E roaa te mau tauturu e te mau faahaamanaʻoraa i roto i te tuaʼnati (site web) e te reni afata teata a te Ekalesia, e na roto atoa i te feia faatere o te autahuʻaraa e o te mau pŭpŭ tauturu, no te tauturu ia outou ia rave faaoti i ta outou mau hopoʻia no te utuafare.

I te tahi mau vahi o te ao nei, te tito nei tatou e te tahi mau taiete haapurororaa e ta ratou mau faanahoraa au ore no te utuafare. Te vai nei ta tatou Pu Afata Teata BYU, o te faaite nei i te mau faanahoraa no niʻa i te utuafare. Hau atu i te mau faanahoraa no te haapiiraa i te evanelia, te vai nei te mau faanahoraa o te horoʻahia no te haamaraaramaraa i te metua e te utuafare. E tutava noa â matou i te faarahi i te maitai e te faanaoraa no te utuafare.

Te vai atura te tahi mau tauturu, taaê atu i te haapurororaa na te afata teata oia hoʻi : te tuaʼnati a te Ekalesia, lds.org. Ua faaapîhia te reira e tei roto i teie nei te hoê api no te fare e te utuafare, e e mea apî ïa te reira. I reira e itehia te tahi mau manaʻo mai roto mai i te mau papairaa moʻa e ta te feia faatere o te Ekalesia no te haapuai i te utuafare. Te vai atoa ra te mau manaʻo no te mau faaoaoaraa a te utuafare. Teie te mau faanahoraa e vauvauhia i roto i teie api no te hoê fare e te utuafare apî :

• Te mau haapiiraa na te feia faatere o te Ekalesia no niʻa i te utuafare.

• Te mau manaʻo no te mau faaoaoaraa a te utuafare.

• Te mau arataʻiraa no te pureraa pô utuafare o te tauturu ia outou ia faanahonaho maite i te mau pureraa pô utuafare.

• Mau tumu parau faahiʻoraa, mai te Haamanuiaraa i te mau pureraa pô utuafare, te haapuairaa i te auraa i rotopu i te tane e te vahine faaipoipo e te mau manaʻo no te haafatataraa i te melo o te utuafare.

Ua faaravaihia te tuaʼnati i te tahi atu mau manaʻo no te faanahonahoraa i te mau pureraa pô utuafare. Te hoê o te mau manaʻo tauturu no te mau faaoaoaraa oia ïa Te Faaroo i te Atua, te Hopoiʻa i te Atua, e te Faahaereraa i te taata i mua.

Te vai atoa râ te hoê faanahonahoraa o te faataehia i te taatoʻaraa o te Ekalesia – oia hoʻi ta tatou mau veʻa a te Ekalesia. E tae roa teie mau veʻa i roto i to tatou mau utuafare e o te reira hoʻi te tahi raveʻa faufaa roa no te faatae i te haamaramaramaraa no te haapuai i te utuafare. Penei aʻe outou i te ite i roto i te veʻa Ensign e te Liahona, te veʻa no te ao taatoa nei – no te avaʻe no mati, te hoê parau poroi na te peresideni Gordon B. Hinckley no niʻa i te Mau pureraa pô utuafare.

« ‘Te vai nei ta matou i te hoê faanahonahoraa oia te pureraa pô utuafare hoê taime i te hepetoma (Pô Monire) na te Ekalesia i reira e parahi te mau metua e ta ratou mau tamarii. E haapii amui ratou i te mau papairaa moʻa. E aparau ratou no niʻa i te mau fifi utuafare. E faanahonaho ratou i te mau faaoaoaraa e te mau ohipa a te utuafare. Eita vau e taia ia parau e mai te mea pai e faatere te taatoʻaraa o te mau utuafare o te ao nei i teie faanahoraa, e ite outou i te hoê taaêraa i roto paariraa o te mau utuafare i roto i te ao nei’ (uiuiraa, Boston Globe, 14 no atete 2000) ».²

I muri mai i te faaitoitoraa a te peresideni Hinckley ia tatou ia faatupu i te pureraa pô utuafare, te tumu parau i muri noa mai i roto i te Ensign oia hoʻi, « Te Piiraa o Taʻu i Ore i Ite e te Vai Nei » :

« E tamataraa mau te pureraa pô utuafare i te vai apîraa te mau tamarii. Ua tauʻa roa maua taʻu tane i te aʻoraa a te pereopheta o te feia moʻa ia faatupu i te mau pureraa pô utuafare, tera râ i roto i to maua mau piiraa a te Ekalesia e te tahi atu mau hopoiʻa, pinepine maua te parau e aita e taime e aore râ aita e nahonaho maitai, no te faatupu i te hoê pureraa pô utuafare.

« I roto i te hoê farereiraa i roto i te Paraimere i te hoê Sabati te ite ra vau i te huru o te mau tamarii i te haapaʻo maiteraa i te mau aamu, te mau hohoʻa, e te tahi mau faaoaoaraa poto noa tei faanahonahohia i roto i te taime e te pehe atoa hoʻi. Ua putapu roa ino vau i te iteraa i te rave maiteraa te tuahine tauturu no te Paraimere e te arataʻi himene i ta raua ohipa ia au i to raua piiraa. ‘Ua rave mau â raua i te taime na roto i te here’, ia manaʻo vau. ‘E ohipa maitai roa ino ta raua e rave nei’.

« I reira ua ô maira te hoê manaʻo : ‘Te pureraa pô utuafare o te hoê ïa o to tatou piiraa. Oia mau, e tuhaa te reira no to tatou piiraa faufaa roa – tiʻaraa metua vahine ! ‘ Ua mau te reira i roto iaʻu. ‘Mai te mea e, e nehenehe taʻu e faataa i te taime no te faahanahana i toʻu mau piiraa ei taata papai e ei orometua hahaere, e nehenehe atoa ïa taʻu e faahanahana i toʻu piiraa no te pureraa pô utuafare’ ».³

Aue ïa manaʻo i te nehenehe tei ô i roto i teie tuahine tei faaitoito mai ia tatou ia haamaitai atu i ta tatou faanahonahoraa no teie pô taaê mau oia hoʻi no te utuafare.

E faaara atoa atu matou ia outou e i roto i te veʻa a te Ekalesia no te avaʻe tiunu tei roto atoa te parau no te utuafare. Hau atu i te reira, i roto i te matahiti taatoʻa e neneihia i roto i te mau veʻa ra Liahona, Ensign, New Era e te Friend te mau materia no te haapiiraa i roto i te utuafare. Tei reira te mau manaʻo tauturu maitai no te mau pureraa pô utuafare e te mau manaʻo no te haapiiraa i te mau mahana atoa. Ua papaihia teie mau manaʻo ia riro ei mau haapiiraa ohie no to outou utuafare.

Ua faaitehia te huru o te mau tamarii e o te feia apî na roto i te mau parau a te peropheta e na roto i te oraraa i te mau hiʻoraa maitai, te faufaa rahi no ratou ia here e ia faatura i to ratou mau metua. Ua haapiihia te mau metua i te mau raveʻa no te paturaa e te aupururaa i te mau taamuraa o te utuafare, i roto anei i te mau taime maitai e i roto i te mau taime fifi. Na teie mau parau i roto i teie mau veʻa e tauturu ia outou ia faatupu i roto i to outou mau utuafare, te here e te puai o te evanelia.

Te turu atoa nei te Church News i te haaparareraa i te poroi no te utuafare. Tei roto i reira te mau papairaa no te haapuairaa i te here e te tura i roto i te utuafare, te faaohiparaa i te evanelia, e te faanahonahoraa i te faaoaoaraa.

Te tiʻaturi nei matou e na roto i te faarahiraa i te haapuroro na roto i te mau veʻa i te parau no te utuafare, e nehenehe ai i te mau melo o te Ekalesia e tauturuhia e faaitoitohia ia patu i te mau utuafare puai e te paari. Te tiʻaturi nei matou e faatupu te reira i te maitai e e turu i te paturaa i te hoê utuafare mure ore. Ua rahi te mau materia a te Ekalesia e tiʻa ia outou ia faaohipa e ia maiti i te mau manaʻo maitai. Inaha na roto i to tatou iteraa i te mau parau no niʻa i te utuafare ia faaite- pinepine-hia, e riro ïa ei faahaamanaʻoraa ia tatou ia faatumu i to tatou tiʻaturiraa i te faanahonahoraa faufaa roa aʻe ta te Fatu i haamau i niʻa i te fenua nei.

Mai te omuaraa mai to te Fatu haamauraa i te faufaa o te utuafare no tatou. I muri noa mai i to Adamu raua o Eva vaiihoraa mai i te Ô i Edene, ua parau te Fatu ia raua e :

« Ua tae maira te Varua Maitai iu niʻa iho ia Adamu, (e)… ua faaite ihora no te Metua e te Tamaiti…

« [I muri iho]… i taua mahana ra haamaitai ihora Adamu i te Atua e ua î ihora, e ua haamata i te tohu no niʻa i te mau utuafare no te fenua nei, ma te parauraa : ia haamaitaihia te iʻoa o te Atua, inaha na roto i taʻu hiʻaraa i araara ai toʻu mata, e oaoa vau i roto i teie oraraa, e ite au i te Atua ra i roto i te tahuti nei.

« E o Eva, taʼna vahine, faaroo ihora i teie mau parau e ua oaoa ihora, na ô aera : [Ahiri] aita maua i hiʻa e ore roa maua e fanau, e ore roa maua e ite i te maitai e te ino, e te oaoa no to maua faaoraraa, e te oraraa mure o ta te Atua i horoʻa mai i roto i te feia atoa e haapaʻo.

« E ua haamaitai ihora Adamu e o Eva i te iʻoa o te Atua, e ua faaite raua i teie mau mea atoa i roto i ta raua mau tamarii tamaroa e ta raua mau tamarii tamahine ».⁴

« Ua faaite te peresideni Brigham Young e aita â to tatou mau utuafare i riro atura ei mau utuafare roa no tatou. Ua tuu mai te Fatu ia ratou i roto i to tatou rima, ia hiʻo e mea nahea ta tatou haapaʻoraa ia ratou. E na roto anaʻe i te faaroo ei reira ratou e horoʻahia ai na tatou e a muri noaʼtu. Te mea o ta tatou e rave i niʻa i te fenua nei e faaite mai e mea tiama anei tatou e aore râ aita no te riroraa ei mau metua no te raʻi ra ».⁵

Ua haamau te Ekalesia e piti na taime no te mau utuafare ia amui. Te matamua roa oia te haapaʻo maiteraa tatou i te mahana sabati. O teie te taime e haere ai tatou i te mau pureraa, haapii i te oraraa e te mau haapiiraa a te Faaora e a te mau peropheta. « Te vai atura te tahi mau mea e ravehia i te mahana sabati mai te (1) papairaa i te aamu o te taata iho e o te utuafare, (2) faatereraa i te apooraa utuafare, (3) haamauraa e te haapaʻoraa i te mau ohipa a te utuafare no te taime rû e no te faarahiraa i te utuafare, (4) te uiuiraa te mau metua i te mau tamarii, (5) papairaa i te rata i te mau fetii e i te mau misionare, (6) te tuatapaparaa, (7) hahaereraa e farerei i te mau fetii e te feia maʻi e te feia moʻemoʻe, (8) te ohipa misionare, (9) taiʻoraa i te mau aamu i te mau tamarii, e te (10) himeneraa i te mau himene a te Ekalesia ».⁶

Te piti o te taime o te pô monire ïa. E haapii tatou i ta tatou mau tamarii i roto i te hoê pô utuafare faanahonaho-maitai-hia. Aita atu e ohipa e rave i te reira pô Monire. Ia faataahia teie taime ia parahi i pihaʻi iho i to tatou utuafare.

Te tiʻaturi nei matou e ua apo maite outou i te parau a te peresideniraa Matamua no niʻa i te Mau Pureraa Pô Utuafare. Te poroi a te peresideniraa Matamua no te 4 no atopa, 1999 tei faaite- faahou-hia i roto i te mau veʻa.

« Na : Te mau melo o te Ekalesia i te ao atoa nei

« E te mau taeaʻe e te mau tuahine :

« Ua faataahia te mau pô monire i roto i te taatoʻaraa o te Ekalesia no te mau pureraa pô utuafare. Te faaitoito nei matou i te mau melo ia faataa i teie taime no te haapuai i te mau taamuraa o te utuafare e ia haapii i te evanelia i roto i to ratou mau utuafare.

« I te omuaraa o teie matahiti ua pii matou i te mau metua ia horoʻa i to ratou puai atoa no te haapiiraa e no te tururaa i ta ratou mau tamarii i roto i te mau parau tumu o te evanelia o te tapeʻa fatata noa ia ratou i te Ekalesia. Te aʻo atoa nei matou i te mau metua e i te mau tamarii ia horoʻa i to ratou puai no te pure utuafare, te pureraa pô utuafare, te haapiiraa i te evanelia e te haapiipiiraa, e i roto i te mau ohipa a te utuafare.

« Te faaitoito nei matou i te mau melo, ia ape i te faatupu i te mau oroʻa e aore râ i te mau taurua i te mau pô Monire. Mai te mea e nehenehe ia faaitoito te mau melo i te mau hoa e te feia faatere o te mau fare haapiiraa ia ape i te faanahonaho i te mau ohipa i te mau pô Monire o te faaatea hoʻi i te mau tamarii e te mau metua i to ratou ra mau utuafare.

« Mea tiʻa ia opanihia te mau fare a te Ekalesia i te mau pô monire. Aita e ohiparaa ta te mau paroita e aore râ ta te mau tĭtĭ, e te tahi atu mau faanahonahoraa o te haafifi i te mau pureraa pô utuafare ».⁷

A faaoti na tatou i teie matahiti ia patu tatou i te hoê utuafare faatumuhia i niʻa i te evanelia, ei vahi haapuraa i mua i te mau vero a te enemi. Ia haamanaʻo â tatou i te mau fafauraa e te mau arataʻiraa mai ô mai i te Fatu i Taʼna ra mau ramarii :

« Te hanahana o te Atua o te ite ïa, e aore râ, te maramarama e te parau mau.

« Te maramarama e te parau mau e na te parau mau e tiavaru i te ino…

« E tera ino ia haere mai no te tatara i te maramarama e te parau mau, na roto i te haapaʻo oreraa, mai roto mai i te mau tamarii a te taata nei, no te mea no te mau peu a to ratou ra mau metua.

« Area râ ua faaue au ia afai mai i ta outou ra mau tamarii i roto i te maramarama e te parau mau ».⁸

Ia riro teie matahiti ei matahiti no te oaoaraa i te maramarama e te parau mau no te evanelia i roto i to tatou mau fare. Ia riro to tatou mau utuafare ei vahi mau no te paruru, o taʻu ïa pure haehaa na roto i te iʻoa o Iesu Mesia, amene.