Tupuraa i roto i te Autahuʻaraa

Aue ïa te faahiahia ia hiʻo i teie pû amuiraa tei î roa i toʼna ra faito hopea, e ia feruri i te mau fare i te ao atoa nei, tei î atoa i te mau taata tei mau i te autahuʻaraa. Eita e ore e, teie te tairururaa rahi aʻe o te autahuʻaraa i roto i te aamu o te Ekalesia. Te feruri nei au e, e parau mau roa te reira, no te mea, te tupu tamau noa nei tatou i te rahi i te mau matahiti atoa.

Te taime matamua a ite ai au i te autahuʻaraa, o te taime ïa a bapetizohia ai au. Ua bapetizohia vau i roto i te hoê anavai faataheraa pape no te oire iti naʻinaʻi ra no Oakley, i Idaho. Te tiʻa ra vau i te hiti o taua anavai faataheraa pape ra e toʻu mau hoa. Tei roto matou i to matou ahu hopuraa, e piripou meʻumeʻu taatoa, ua tapuhia te avae, eita ïa oe e tomo, e ua faaapoo-atoa-hia te pute. Aitâ matou i ite aʻe nei i te hoê ahu hopuraa pape hamanihia mai te reira. Ua haere mai toʻu papa na roto mai i te fare pure a te paroita matamua, e tae noaʼtu i toʼna na tauturu. E parahiraa taʼna e taʻitaʻi ra, e ua tuu aʻera oia i te parahiraa i te hiti o te anavai. Na ô aʻera toʻu papa e, « David, haere mai i ô nei ; e bapetizo matou ia oe ».

Ua ouʻa aʻera vau i roto i te anavai e au atura i te tahi pae mai, ma te ruruu i te toʻetoʻe. E avaʻe setepa i taua taime ra, e e mea huru toʻetoʻe rii, e ua toʻetoʻe roa te mau tamaroa, te taa ra ïa ia outou, mai te mea e, e piripou anaʻe to outou. Ua pou maira toʻu papa i roto i te anavai. Te haamanaʻo ra vau e, aita oia i iriti i toʼna tiaa e aita i taui i te hoê noa aʻe mea, tei roto noa oia i toʼna ahu matarohia. Ua faaite maira oia iaʻu e nahea ia tapeʻa i toʻu rima, e ua bapetizo aʻera oia iaʻu. Ia haere mai au i rapae i te pape, ua au atura maua toopiti atoa ra i te hiti o te anavai. Ua parahi atura vau i niʻa i te parahiraa, e ua tuu maira ratou i to ratou rima i niʻa i toʻu upoo e ua haamau aʻera iaʻu ei melo no te Ekalesia. I muri iho, ua ouʻa faahou atura vau i roto i te anavai no te au atu i te tahi pae, i pihaʻi iho i toʻu mau hoa.

Teie ïa te taime toʻu ite-matamua-raa i te autahuʻaraa.

Te faahaamanaʻo faahou atu nei au ia outou e, te autahuʻaraa, o te puai ïa e te mana o te Atua tei horoʻahia i te taata nei. E faahiti faahou vau : Te autahuʻaraa, o te puai ïa e te mana o te Atua tei horoʻahia i te taata nei. I roto i teie amuiraa i teie pô, te vai ra tei mau i te Autahuʻaraa a Aarona, te autahuʻaraa iti, e te vai ra tei mau i te Autahuʻaraa a Melehizedeka, te autahuʻaraa teitei. E ere anei te mea taaê mau ia hiʻo i te huru no to te Fatu e Toʼna Metua i te Ao ra, faatiʻaraa i te faanahoraa no te faaoraraa, ia tiʻa i te mau tane ia tiʻamâ e ia hanahana hoʻi no te mau i te autahuʻaraa, e ia amui atu i roto i te nuu tamaʻi o te mau taata e titauhia no te faatupu i te mau opuaraa mure ore a to tatou Metua i te Ao ra, no te faatupu i te tahuti ore e te ora mure ore o te taata – te mau taata i te mau vahi atoa ? E titauhia ïa te hoê pŭpŭ rahi !

Tau matahiti rii i muri aʻe i toʻu bapetizoraahia, no te mea e, ua rahi rii aʻe toʻu ite i te mau ohipa i roto i te Ekalesia, ua faatoroʻahia vau i te Autahuʻaraa a Aarona. I taua area taime atoa ra, toʻu papa tei bapetizo iaʻu, ua pohe atu oia i te maʻi mafatu, no reira, na te episekopo ïa i horoʻa mai i te Autahuʻaraa a Aarona iaʻu e i faatoroʻa iaʻu ei diakono. Te haamanaʻo ra vau i te oaoa tei roaa iaʻu i te taime a horoʻa mai ai oia i te autahuʻaraa i niʻa iaʻu, e tei niʻa te mau hopoiʻa iaʻu i teie nei, e e faautuʻahia vau no taʻu mau ohipa, e titauhia iaʻu ia haapii i te tahi mau ohipa a haere ai au i mua i roto i te oraraa nei. Ua tupu te manaʻo taaê i roto iaʻu e, e mea taaê rii au i teie nei, e ere atura vau mai toʻu mau hoa te huru, tei ore i farii i te autahuʻaraa, e aore râ, mai te mau taata ta outou e farerei atu i te ao nei. E hopoiʻa taʻu i teie nei, oia te mau mea ta tatou e haapii i te sabati i te fare pureraa, ia parahi tatou na te hiti i te umu arahu, i te tahua i raro o te fare pureraa.

I te mau mahana maa, e tamâ matou i te rapaeraa o te fare pureraa, e faaî hoʻi i te vairaa arahu, e e hiʻopoʻa maite e, ua ineine maitai anei te fare no te mau pureraa o te sabati. Te vai ra te mau ohipa tei faataahia na matou i roto i te autahuʻaraa iti, i roto i te mau ohipa pae tino o te paroita – ohiraa i te mau moni haapaeraa maa e te raveraa i te tahi mau ohipa na te episekopo. Naʼna e na te tahi atu mau tiʻa faatere, e haapii ia matou i temau mea no niʻa i te Autahuʻaraa a Aarona e i te toroʻa diakono, te haapii, e te tahua, a haere noa ai matou i mua i roto i te autahuʻaraa. Mai te mea ra iaʻu e, ua araaraa maitai toʻu iteraa no niʻa i te ohipa e rave, e te vai ra taʻu iho hopoiʻa, noaʼtu e, e tamaroa iti noa â vau i roto i te hoê oire iti naʻinaʻi. E mea faufaa roa taua ohipa ra.

Ahuru ma hoê toʻu matahiti i pohe ai toʻu papa, e ua oto roa vau i te taime a hunahia ai oia, i toʻu faarooraa i te taata ia parau no niʻa i te maitai o taua taata ra. I niʻa i te hunaraa maʻi, i te taime a tuu ai ratou i te afata i roto i te apoo, e a haamata ai te taata i te hue i te ope repo e te ofaʻi i niʻa i te afata, ua mataʻitaʻi noa vau, e ma te feruri e, toʻu ïa tera aito, e ua feruri au e, eaha te mea e tupu mai i niʻa iaʻu, i teie nei ua pohe toʻu papa. Ua ite na vau i te mau taata maitai i te faaohiparaa i te autahuʻaraa e ma te rave i te ohipa tiʻa – te mau taata tei tauturu i te ôraa i te apoo e te haapaʻoraa i te mau mea atoa i titauhia no te hunaraa – e ua ite atura vau i te hoê taata maitai roa tei patoʻi atu i te hoê parau aufauraa e pae dollar ta toʻu mama i toro atu iaʼna ra, inaha, ua horoʻaʼtu hoʻi toʻu mama i te tahi maa moni no toʼna tautururaa i te ôraa i te apoo. Ua patoʻi oia i taua moni ra e na ŏ maira, « Aita, a tapeʻa noaʼtu, no te mea, e hinaaro oe i te reira moni a rauae iho ».

E no reira, te hinaaro nei au e faaite ia outou paatoa i roto i teie amuiraa i teie pô, i roto i te Autahuʻaraa a Aarona e te Autahuʻaraa a Melehizedeka, e ere anei i te mea faahiahia, na roto i te paari o to tatou Metua i te Ao ra e Taʼna Tamaiti, i te amuitahiraa i teie mau mea atoa, ia haapii tatou i roto i te autahuʻaraa iti, ia rave i te mau ohipa no te pae tino nei ? E rave tatou i te mau ohipa pae tino, ma te haapii, na roto i te haehaa e te ohie, i teie mau mea te tiʻa ia ravehia. Na teie e haapii ia tatou i te parau no te taviniraa e no te haapaʻoraa i te mau faaueraa a te Fatu, no te faaineine ia tatou, ia tiʻa ia tatou i te hoê mahana, ia faanuuhia i roto i te Autahuʻaraa a Melehizedeka, e toʼna hanahana taatoa e te hanahana mure ore ta te reira e horoʻa mai.

Ua riro taua mau matahiti no te Autahuʻaraa a Aarona ra ei mau matahiti maitai roa i roto i toʻu oraraa. Ua haapii tamau noa vau i te mau mea apî, e ma te farii tamau noa i te hoê haapiiraa e te hoê manaʻo maramarama atu no niʻa i te evanelia e no niʻa i ta tatou hopoiʻa i te hopoiraa i teie parau poroʻi i to te ao atoa nei. Na roto i taua raveraa ra, ua haapii tatou ia faaô ia tatou i roto i te tahi atu mau taata. I te tahi taime, ua feruri tatou e, eita paha te taata e farii ia tatou, no te mea e ture teitei aʻe ta tatou. Te vai ra te tahi mau mea aita tatou e rave. Te vai nei ta tatou Parau Paari, o te tauturu nei ia tatou ia ora i te hoê oraraa maitai aʻe, te hoê huru oraraa o te tauturu ia tatou ia tupu i te rahi i rotopu i te taata, e ia roaa te mau ture e te mau manaʻo e te hoê huru oraraa te hinaarohia nei e te rahiraa o to te ao nei. Ua iteahia iaʻu e, mai te mea e, e ora outou mai tei titauhia ia outou, e ite te taata i te reira, e e faahiahia ratou i to outou mau tiʻaturiraa, e i reira e tiʻa ai ia outou ia faauru i te oraraa o te tahi atu mau taata. Ia ite anaʻe ratou e, aita e titauhia ia ratou ia puhipuhi i te avaava e aore râ, ia inu, e aore râ, ia amu i te raau taero ta to te ao nei e rave nei, e riro te reira ei faaururaa maitai no taua mau taata ra.

Ia mau maite outou i ta outou mau faatureraa, e tiʻa ïa ia outou ia faaipoipohia i roto i te hiero. Ia ite mai outou e, teie te 173raa o te amuiraa rahi matahiti a te Ekalesia, e no te horoʻaʼtu ia outou i te hoê haamaramaramaraa e ere i te mea faufaa roa, a 73 matahiti i teie nei to maua o taʻu vahine faaipoiporaahia. No reira, i te mtahiti a faaipoipohia ai maua, te faatere ra ïa te Ekalesia i te 100raa o te amuiraa matahiti. Ua tiʻa iaʻu ia haamanaʻo i te reira a tapeʻa ai au i te rima o Ruby na niʻa i te fata o te hiero – ma te faaroo i te mau parau o te oroʻa taatiraa – Ua tupu te hoê manaʻo taaê i roto i toʻu aau, eiaha no niʻa i te moʻa o te reira ohipa, no te hopoiʻa râ tei titauhia iaʻu ia ora mai tei titauhia ra, ia aupuru iaʼna e i ta maua mau tamarii, e i ta maua mau mootua, e i te mau uʻi i muri mai. Ua tupu te hinaaro mau i roto iaʻu no te faaite i te hiʻoraa maitai no te ora i te faito e tiʻa ai i te hoê taata ia faatura i te autahuʻaraa e i ta maua fafauraa no te faaipoiporaa.

I teie pô, a putuputu ai tatou te mau melo tei mau i te autahuʻaraa, a feruri na i ta tatou hopoiʻa tataʻitahi no niʻa i te mau mea e tupu mai i roto i teie ao – e mau mea apî anei aita tatou e ite nei i teie mahana – i muri aʻe i teie tamaʻi, e ia faahoʻihia te mau mea atoa i to ratou ra huru mau. E ohipa rahi te tiʻa ia tatou ia rave. No te raveraa i te reira, e mea tiʻa ia tatou ia tiʻamâ i te autahuʻaraa tei roaa ia tatou, e tiʻa ïa ia tatou ia tauturu i te faatereraa i te Ekalesia i roto i toʼna tupuraa, penei aʻe ma te maramarama hau atu i ta tatou i rave na. E riro mau ïa ei mahana rahi

Tau matahiti i mairi aʻe nei, tei roto vau i te nuu moana i te anotau no te Tamaʻi II o te Ao nei, ua tae maira te faaueraa iaʻu ia haere atu i Pearl Harbor, Hawaii. Ua afaʻi toʻu utuafare iaʻu i Treasure Island i San Francisco Bay, e i reira, ua taʻuma vau i niʻa i te manureva, hoê manureva tau moana tahito roa tei parauhia avion Pan-American. I roto i taua manureva ra, te vai ra te tahi mau ofitie taote te haere nei ratou e faaineine e e patu atoa i te fare maʻi tauturu, no te mea, e haamata te tamaʻi no Tarawa i roto noa i te tahi tau hepetoma te maoro. No toʻu tapaʻo, ua titauhia iaʻu ia taoto i roto i te hoê pute taotoraa, i muri roa i te aero o te manureva, na reira atu hoʻi au i te ite atu i te matini atau o te manureva, a rere atu ai matou na niʻa ia San Francisco, tei roto i te poiri, ia au i te faatureraa a te nuu. E mea poiri atoa i niʻa i te moana patifita, e ua manaʻo vau e, ua ura te matini atau o te manureva tahito. Aita taʻu e nehenehe e taoto a hiʻo noa ai au i taua tere ra.

I taua pô taoto ore ra, ua feruri noa vau i niʻa i toʻu oraraa, te ora ra anei au i te faito e tiʻa ai iaʻu ia faatupu i te mau mea atoa i roaa iaʻu, e i taʻu mau hopoiʻa atoa ei melo no te Autahuʻaraa a Melehizedeka – te hopoiʻa no te riroraa ei hiʻoraa, e ia ora mai tei titauhia iaʻu, i reira hoʻi e tiʻa ai iaʻu ia faaoti i te mau piiraa e horoʻahia mai iaʻu. I taua pô taoto ore ra, ua hiʻopoʻa vau iaʻu iho, hiʻopoʻa i taʻu mau peu, ma te feruri e, te rave ra anei au i te mau mea atoa i titauhia iaʻu ia rave. Noaʼtu e, ua farii tamau maite au i taʻu mau ohipa, ua feruri noa vau e, ua rave anei au i te reira ma toʻu aau atoa, toʻu puai atoa, toʻu manaʻo atoa, e toʻu varua atoa, e ua ora anei au i te faito e tiʻa ai iaʻu ia faaoti i taʻu hopoiʻa, te haamaitairaa, tei roaa iaʻu i roto i toʻu tiʻaraa ei taata tei mau i te Autahuʻaraa a Melehizedeka, e eaha te mea i titauhia ia tatou paatoa tei farii i teie haamaitairaa.

Ia hiʻo anaʻe au i muri i niʻa i taua pô taoto ore ra, te haamauruuru nei au i te Fatu no Taʼna mau haamaitairaa i teie mahana, e no te mau mea atoa tei ravehia e au. Te tamata maite nei au i te ora hope roa i te evanelia, ia rave i te mau mea atoa i titauhia iaʻu ia rave, ma toʻu aau atoa, ma toʻu puai atoa, ma toʻu manaʻo atoa e ma toʻu itoito atoa, no te rave faaoti i te mau huru piiraa atoa o te horoʻahia mai iaʻu, ia tiahia vau no te rave i te mau mea atoa e anihia iaʻu ia rave ia tae i te hoê mahana.

I teie pô a faahanahana ai tatou i te autahuʻaraa, e te feia apî no te autahuʻaraa nei, a faaoti i te manaʻo ia ora mai tei titauhia ia outou. Eiaha e faaô ia outou i roto i te tahi mau mea e ravehia nei i roto i te ao nei, a haamanaʻo râ i te mea tei horoʻahia ia outou na. Te parau faahou nei au e, te autahuʻaraa, o te puai ïa e te mana tei horoʻahia e to tatou Metua i te Ao ra i te taata nei. Te mana e te hanahana o te reira, e ore ïa e taeʻahia i to tatou haroaroaraa i teie taime.

Te faaite atu nei au ia outou i toʻu iteraa papu e, e ohipa parau mau teie. Te oaoa nei au ia tiʻa iaʻu, i te taperaa o toʻu oraraa, ia tiʻa i niʻa e ia faaite i toʻu iteraa papu no te parau mau o te evanelia, mai taʻu i ite i te mau mahana atoa o toʻu oraraa, mai toʻu bapetizoraahia e tae roa mai i teie mahana. Te here nei au i te Fatu. Te here nei au i to tatou Metua i te Ao ra e i teie ohipa. Te faaite nei au i te parau mau o teie ohipa.

E ia outou paatoa na e te mau tiʻa faatere no te autahuʻaraa, a ora mai tei titauhia ia outou. E mea taaê tatou, e e ere i te mea maitai no outou ia riro mai te mau huru taata atoa, no te mea, te mau nei outou i te autahuʻaraa o te Atua, e te mau fafauraa teitei e te mau haamaitairaa e te mau tiairaa ia outou.

E ohipa mau teie. Na roto i te iʻoa o te Iesu Mesia ra, amene.