Te faaipoiporaa mure ore

Tau matahiti i mairi aʻe nei, ua haere maua taʻu vahine i te hoê tamaaraa faaipoiporaa. Na muaʻe râ, ua haere atu maua i te hiero i te faaipoiporaa o na taata apî nei o ta maua i matau maitai o tei taatihia no teie tau e no te tau a muri atu. E mea here roa raua ia raua iho. E au to raua matauraa i te hoê semeio. Ua manii to matou roʻi mata no te oaoa. Tei roto atoa maua i te reni anaʻiraa o te fariiraa i te hoperaa o taua mahana ra. I mua noa mai ia maua, o te hoê ïa hoa no te utuafare. A haafatataʼtu ai oia ia raua, faaea-ihora-oia, e pato mai nei na roto i te hoê reo nehenehe roa, reo teitei, te mau parau no roto mai i te buka a Ruta, « Te vahi ta oe e haere ra, e haere atoa ïa vau ; e te vahi ta oe e parahi ra, e parahia atoa ïa vau ; to oe ra nunaa, o toʻu atoa ïa nunaa ; e to oe ra Atua, o toʻu atoa ïa Atua : E te vahi e pohe ai oe ra, ei reira atoa vau e pohe ai » (Ruta 1:16-17)

Ua putapu roa maua e ua haapapuhia ia maua i te tiʻaturiraa no to raua oaoaraa, no te mea atoa hoʻi, ua pia taʻu vahine e vau iho nei i taua mau parau ra i niʻa i to maua papaʻi fare e rave rahi matahiti i teie nei.

E mea oto râ no te mea te moʻe ra te auraa no teie mau parau nehenehe roa, e rave rahi mau faaipoiporaa i teie mahana o te fataa nei. Na te haapaʻoraa iaʼna iho, te hara, e te tauʻa-ore-raa, i faataupupu i te mau fafauraa e i te mau parau faaauraa.

Ua faatiʻahia te faaipoiporaa mure ore tei riro ei parau tumu hou roa te niu-raa-hia te ao nei e ua haamauhia i niʻa i te fenua nei hou te pohe i tae mai ai. Ua faaipoipohia Adamu e o Eva e te Atua i roto i te Ô i Edene hou te hiʻaraa. Te parau nei te papaʻiraa moʻa : « A hamani ai te Atua i te taata ra, i hamani oia iaʼna ma to te Atua ra huru ; I hamani oia ia raua ei tane e ei vahine ; e ua haamaitai maira ia raua » (Genese 5:1-2 ; haapapuraa tuuhiaʼtu).

Hoê â huru ta te mau peropheta haapiiraa, ua riro te mau mea rii tumu maitai roa e te hopea i roto i te faanahoraa a te Atua no te haamaitai i Taʼna mau tamarii o te faaipoiporaa mure ore ïa. Ua faaite te peresideni Ezra Taft Benson e, « E hopoi mai te haapaʻo maitairaa i roto i te fafauraa o te faaipoiporaa i te oaoa i ô nei, e te mau haamauruururaa hanahana i muri mai i te poheraa » (The Teachings of Ezra Taft Benson [1988], 533-34). Ua faaau te peresideni Howard W. Hunter i te faaipoiporaa tiretiera « te oroʻa hanahana roa aʻe o te evanelia » e ua haamaramarama mai oia e, mai te mea e « aita te faaipoiporaa e tupu i ô nei [no vetahi], penei aʻe e tae roaʼtu i ô atu i te hopea o teie nei oraraa tahuti », eita râ taua haamaitairaa ra e patoʻihia no te feia tiʻamâ atoa (Teachings of Howard W. Hunter, neneʻiraa a Clyde J. Williams [1997], 132, 140). Ua topa te peresideni Gordon B. Hinckley i te faaipoiporaa mure ore te hoê mea faahiahia (a hiʻo « What God Hath Joined Together », Ensign, me 1991, 71) e te hoê « horoʻa faaieie i ô atu i te tahi atu » (« The Marriage That Endures, » Ensign, me 1974, 23).

Atira noaʼtu i te rahi e i te hanahana o taua horoʻa ra, e mea tamoni ïa. Inaha hoʻi, ua faaturehia, e no te mea ua horoʻahia mai, eita ïa e nehenehe ia faahoʻi i muri mai te mea aita tatou e haapaʻo i te mau titauraa o te fafauraa o te apee atu i te reira. Ua parau mai te tuhaa 131 o te Parau Haapiiraa e te Mau Parau Fafau e, « i roto i te hanahana tiretiera ra, te vai nei ïa e toru aʻe ao e aore râ, tuhaa ; e ia tiʻa ia noaa mai i tei teitei aʻe ra, ia tomo mai te taata [te vahine atoa ïa] i roto i teie haapaʻoraa no te autahuʻaraa e tiʻai [oia hoʻi, te fafauraa apî e te mea mure ore no te faaipoiporaa] » (PH&PF 131:1-2).

Te fafauraa o te hoê ïa tapu moʻa. E tapu tatou ia rave i te tahi mau mea e i reira te Atua iho e ruuruuhiaʼi ia rave i te tahi atu. I te feia o te haapaʻo i te fafauraa no te faaipoiporaa e fafau mai ïa te Atua i te îraa no Toʼna hanahana, te ora mure ore, e te faarahiraa mure ore, te faateiteiraa i roto i te basileia tiretiera e te îraa no te oaoa. Ua ite pauroa tatou i te reira, tera râ, i te tahi mau taime, aita tatou e tauʻa rahi i te mea e tiʻa ia tatou ia rave no te fariiraa i teie mau haamaitairaa. Ua faaite maramarama mai te mau papaʻiraa moʻa e toru mau titauraa i roto i teie tuhaa o te fafauraa.

A tahi, te hoê faaipoiporaa mure ore e mea mure ore ïa. Mure ore, te auraa, o te hoê ïa tupuraa tamau e te haamaitai-roa-raaʼtu. Te auraa ra, e tamata ïa te tane e te vahine ma te parau-tiʻa i te haamaitai roaʼtu ia raua iho. Te auraa ra, eiaha e haapaʻo-ore i te auraa o te faaipoipoiraa e i te faataaraa ia tupu te maniania-raa matamua e aore râ ia fifi anaʻe. Te auraa ra, e tupu puai te here e tae roaʻ tu i ô atu i te menema. Te auraa ra, e haamaitaihia ïa te tahi e te tahi na roto i te oraraa amui e a muri noaʼtu, e e faaafarohia te mau fifi e te mau manianiaraa no te mea aita raua e haere ê atu. Te auraa o te mure ore oia ïa, te tatarahapa, te faaoreraa hara, te mărû, te faaoromai, te tiʻaturi, te aroha, te here e te haehaa. Tei roto pauroa teie mau mea i te mure ore, e no reira, e mea tiʻa ihoa ïa ia faaohipa tatou i te reira mai te mea te hinaaro ra tatou i te titau i te hoê faaipoiporaa mure ore.

A piti, ua haapaʻohia te faaipoiporaa mure ore e te Atua. Te auraa ra, ua faaoti na taata faaipoipo i roto i te fafauraa ia ani manihini i te Atua i roto i to raua faaipoiporaa, ia pure amui, ia haapaʻo i te mau faaueraa, ia tapeʻa i te mau hiaai e te mau hinaaro puai i roto i te mau otiʻa o ta te mau peropheta i haapii mai. Te auraa ra, ia vai hoê noa na taata faaipoipo, e ia vai parau-tiʻa noa e te mâ te tahi i te tahi i rapae i te fare e i roto i te fare. O te auraa ïa o te parau ua haapaʻohia e te Atua.

A toru, ua riro te faaipoiporaa mure ore mai te hoê taatiraa e te Atua. Ua fafau mai Oia i te haere- noa-raa o te mau ora i te feia o tei taatihia i roto i te hiero. Te vai nei te hoêraa e tei Poiete i roto i te faaueraa i horoʻahia ia Adamu e ia Eva no te faarahi e no te faaî i te fenua nei. Te vaira râ te hoê titauraa ia haapii i te mau tamarii i te evanelia no te mea e mau tamarii ratou Naʼna. No reira, te vai nei ta tatou pô utuafare e te taiʻoraa i te mau papaʻiraa moʻa, te mau tauʻaraa parau no niʻa i te evanelia, e te taviniraa ia vetahi ê. E aura e, e titauraa te faaoromaʻi e te patururaa te tahi i te tahi i roto i te mau piiraa e te mau faaueraa tei horoʻahia mai ia rave. Nahea tatou ia titau ia riro ei hoê e te Atua mai te mea aita tatou e paturu te tahi i te tahi e ia piihia te vahine i roto i te Paraimere e aore râ, te tane i roto i te episekoporaa ?

E faatupu te fafauraa o te faaipoiporaa i teie mau mea e te vai atura. Aita vau e manaʻo nei e hape au ia parau vau i te feia o te hamani-ino nei i ta ratou vahine e aore râ, i ta ratou tane na roto noa i te parau e aore râ, hamani-inoraa i te pae tino ; e aore râ, tei faahaehaa-roa-hia e aore râ, o te tuu roaʼtu i raro e aore râ, o tei haavî atu i te taata mai te parau-tiʻa ore i roto i te faaipoiporaa, aita ïa e haapaʻo ra i te fafauraa. Oiaʼtoa te feia o te faruʻe ê i te mau faaueraa, e aore râ, o tei ore i manuïa i te patururaa i to ratou feia faatere. Oiaʼtoa tei mairi i to ratou mau piiraa, tei faaruʻe i to ratou mau hoa tapiri, e aore râ, o tei rave mai i te mau eʻa o te ao nei, tei roto ïa ratou i te ati. Mai te mea aita tatou e haapaʻo i ta tatou tuhaa o te fafauraa, aita ïa tatou e fafauraa i reira.

Te manaʻo nei au, eita te faaipoiporaa mure ore e raeʻahia mai te mea aita e fafauraa no te haamanuïaraa i te ohipa. Ua haapii mai au i te rahiraa o teie mau mea i taʻu vahine. A 47 matahiti i teie nei to maua faaipoiporaahia. Mai te haamataraa mai ihoa toʼna iteraa i te huru o te faaipoiporaa o taʼna i hinaaro.

Ua haamata mai maua ei na piahi veve i te fare haapiiraa tuarua, tera râ, i roto i to maua faaipoiporaa, ua hinaaro oia i te taatoaraa o te mau patia, punu taepu ario. E mea matarohia i teie nei, i to maua faaipoiporaa ua afaʻi oia i te tabula no te mau mea o ta maua e hinaaro no to maua oraraa i roto i te hoê fare toʻa rahi. Aita oia i tapaʻo i te mau pani e te mau farai pani e te tahi atu â mau tauihaa, ua maiti oia mea ê roa. Ua ani oia i te taatoaraa no te mau taepu ario. Ua maiti oia i te hohoʻa o taʼna i hinaaro e te rahiraa e ua tabula i te mau tipi, patia e te mau punu taepu i niʻa i te buka tapaʻoraa no te faaipoiporaa e aitaʼtu ai. Aita e tauera, matini tunu paa faraoa, afata teata – te mau tipi noa, te mau patia e te mau punu taepu.

Ua tupu mau atura te faaipoiporaa. Ua horoʻa mai to maua mau metua e te mau hoa i te mau taoʻa horoʻa. Revaʼtura maua no te hoê taime poto noa i to maua tere e i to maua hoʻiraa mai, ua tatara maua i ta maua mau tauihaa. Hiti mahuta ihora maua. Aita roa e tipi, e aora râ, e patia i roto. Ata ihora maua, a ora noaʼtu ai.

Roaa mai nei ta maua mau tamarii a haere ai maua i te haapiiraa ture. Aita ta maua e moni. I to taʻu râ vahine raveraa i te ohipa afa mahana noa ei tauturu i roto i te hoê vahi maitiraa e aore râ, ia horoʻa anaʻe mai te tahi taata i te tahi na tara no toʼna mahana fanauraa, e faaherehere ïa oia, e ia ravaʻi, e haere oia i te oire e hoo mai i te patia e aore râ, i te punu taepu. Rave rahi matahiti i te na reira noa-raa. Ia ravaʻi ta maua tauihaa no na taata e maha, haamata ihora maua i te ani manihini i te tahi o to maua mau hoa.

Hou ratou e tae mai ai, e paraparau rii maua i roto i te fare tunuraa maa. Eaha te mau tauihaa e faaohipa, te mau punu taepu e faaohipa pinepinehia, e aore râ, te mau ario ? I te reira tau, e maiti au i to te mau mahana rii noa. E mea ohie ïa ia horoi. E nehenehe noa oe e taoraʼtu i roto i te matini horoi raa i muri mai i te tamaaraa, e na te reira e haapaʻo atu. Area te ario ra, e mea ohipa rahi mau. E faataponi taʻu vahine i te reira i raro aʻe i te roʻi ia ore e itehia e te hoê taata eiâ. Ua ani onoono oia ia hoo mai au i te hoê ahu marau no te puʻohu i roto. E pute taaê to te tahi i te tahi, e ere atoa ïa i te mea ohie ia amui anaʻe i te taatoaraa i roto i taua ahu ra. Ia faaohipa anaʻehia te mau materia ario, e horoi rimahia ïa e e haamarô ia ore e tutae ʻaurihia, e e faahoʻi faahou i roto i te mau pute ia ore e tafetafeta, puohu faahou e faatapuni atu ai ia ore e eiâhia. Ia ite anaʻe oia i te tutae auri i niʻa iho, e faaue ïa oia ia haere au e hoo mai i te horoi no te iritiraa i te tutae auri.

I te mau matahiti i muri mai ua hoo faahou mai maua ei faaravaʻiraa i ta maua mau tauihaa, e ua mataʻitaʻi au iaʼna ma te maere i toʼna haapaʻo maitai i ta maua mau tauihaa ario. E ere taʻu vahine i te vahine riri taʻue. Tera râ, ua haamanaʻo vau i te hoê mahana i to te hoê o ta maua mau tamarii raveraa i te tauihaa ario no te ô i te apoo i roto i te aua. Ua fariihia taua tamataraa ra na roto i te hoê riri rahi ma te faaaraʼtu ia ore roa ia na reira faahou. Eiaha roa !

Ua ite au e, aita roa taua mau tauihaa ra i hopoihia i te mau tamaaraa a te paroita ia tunu anaʻe oia i te maa, e aore râ, aita roa e afaʻihia no te tahi mau tamaaraa i ô i te mau taata maʻi e aore râ, veve. Aita roa e taʻitaʻihia ia haere anaʻe i te ori haere. Aita roaʼtu e afaʻihia i te tahi noaʼtu vahi ; e a tere ai te mau tau, aita roa e tuu-faahou-hia i niʻa i te airaa maa. E ua haava-atoa-hia te tahi o to maua mau hoa, inaha aita roaʼtu ratou e amu faahou e taua mau patia ra. E amu ïa ratou e te mau mea rii noa.

Tae mai nei to maua piiraa no te haere e rave i ta maua misioni. Hoʻi maira vau i te hoê mahana i te fare e ua faauehia vau ia haere e tarahu mai i te hoê afata taaê no te vaiihoraa i taua mau tauihaa ario nei. Aita oia e hinaaro i te afaʻi na muri ia maua. Aita atoa e hinaaro i te vaiiho i te fare. Aita roa oia i hinaaro ia moʻe.

Rave rahi matahiti, ua manaʻo vau e ere te huru o taʻu vahine i te huru mau, e ia tae roa i te hoê mahana toʻu taaraa e, ua ite aʻe na oia i te hoê o taʻu i ore na i ite e o te haamata nei râ i te taa. Mai te mea ua hinaaro oe i te hoê mea ia vai e a muri noaʼtu, e mea taa ê ïa ta oe faatereraa i te reira. E faaherehere e e paruru oe i te reira. Eita roa oe e hamani-ino. Eita roa oe e vaiiho i roto i te mau vahi reporepo. Eita roa oe e faariro ei mau mea rii noa. Mai te mea e tutae auri, e faaanaana ïa oe e tae roaʼtu e ua mâ. E riro te reira ei mea taaê mau no te mea ua imi oe i te raveʻa ia riro mai te reira te huru, e e hau roaʼtu â te reira i te nehenehe e te faufaa a tere noa ai te tau.

Mai te reira iho â te faaipoiporaa mure ore. E mea na reira iho â. Te pure nei au ia imi tatou i te reira no te taoʻa tei hau atu i te mau taoʻaʼtoa, na roto i te iʻoa o Iesu Mesia, amene.