Te horoʻa aore e tiʻa ia parau

E mea maitai mau no te tiʻa atu i mua ia outou i teie mahana. E mea au roa naʼu ia faaroo i te parau a te Fatu tei aparauhiaʼtu e to tatou feia faatere, a arataʻihiaʻi ratou e te horoʻa moʻa o te Varua Maitai. I teie mahana, te hinaaro nei au e faahiti atu i te tahi mau parau no niʻa i teie horoʻa.

Ua feruri anei outou no niʻa i te rahiraa o te maramarama e te puai ta te mahana e horoʻa nei ? Aita roa ïa te reira e taa-maitai-hia nei e tatou. Te veʻaveʻa e te maramarama ta tatou e farii nei, no ô mai ïa te reira i te Atua ra. E tapaʻo ïa teie no te maitai o to tatou Metua i te Ao ra.¹

E hiti mai te maramarama o te mahana na roto mai i te reva, ma te turama i to tatou paraneta a haati noa ai te reira i te mahana, ma te horoʻa mai i te ora na roto i te mahanahana e te maramarama. Ahiri e aita te mahana, aita ïa e ora i niʻa i teie paraneta ; e riro ïa ei mea pohe e te toʻetoʻe e te poiri hoʻi e a muri noaʼtu..

Mai te mahana e horoʻa nei i te ora e te maramarama i te fenua nei, te horoʻa atoa nei te maramarama pae varua i te ora i to tatou varua. Te parau nei tatou i te reira Te Maramarama o te Mesia. Te haapii nei te mau papairaa moʻa ia tatou « e turama mai te reira i te mau taata atoa o te tomo mai i roto i te ao nei ».² No reira, te fanaʻo nei te mau taata atoa i te mau maitai no ô mai i te reira. Ua riro te Marama o te Mesia ei faaururaa moʻa o te faatiʻa nei i te mau tane, te mau vahine, e te mau tamarii atoa ia faataa i te maitai e i te ino. Te faaitoito nei te reira ia tatou ia maiti i te maitai, ia imi i te parau mau mure ore, e ia haapii faahou mai i te mau parau mau ta tatou i ite i te ao ra hou i te tahuti nei, e tei moʻehia e tatou i roto i te tahuti nei.

Eiaha e hape i te maramarama o te Mesia i te Varua Maitai, inaha e ere te maramarama o te Mesia i te hoê taata. E tae mai taʼna faaururaa na mua no te faaineine i te taata ia farii i te Varua Maitai. E arataʻi te maramarama o te Mesia i te varua parau-tiʻa ia « faaroo i te reo » ³ no te ite i te evanelia mau e i te Ekalesia mau e ia farii i te Varua Maitai.

Te Varua Maitai e Varua ïa, e melo taaê e te papu maitai oia no te Atuaraa.⁴ E ite oia e aore râ e faaiteraa papu no te mana o te Atua, no te hanahana o te Mesia, e no te parau mau o te evanelia tei faahoʻihia mai. E rave rahi i roto i te aamu o te mau nunaa atoa tei titau maite i te aparau i te mau raʻi e i te farii i te maramarama no te parau mau no te evanelia. Ua roaa ia ratou te faaururaa a te Varua Maitai i te haapapuraa i te parau mau no te evanelia.

Ua parau mai te peropheta Iosepha Semita : « Te vai ra te vahi taaê i rotopu i te Varua Maitai e te horoʻa a te Varua Maitai. Ua farii o Korenelio i te Varua Maitai hou i toʼna bapetizoraahia, oia hoʻi te mana faafariu o te Atua tei tae mai i niʻa iaʼna no niʻa i te parau mau o te evanelia, aita râ i tiʻa iaʼna ia farii i teie hiʻoraa o te Varua Maitai e tae roa ua bapetizohia oia. Ahiri e aita oia i bapetizohia, ua faaruʻe ïa te Varua Maitai iaʼna ».⁵

E roaa noa te horoʻa o te Varua Maitai, oia hoʻi te tiʻaraa no te farii i te Varua Maitai ei hoa tamau, na niʻa i te huru o te faaroo i niʻa i te Mesia ra, te tatarahapa, te bapetizoraa na roto i te utuhi, e te tuuraa rima a te mau tavini tei mau i te mana no te Autahuʻaraa a Melehizedeka. E horoʻa faufaa rahi roa teie, o te horoʻa-noa-hia i te mau melo tiʻamâ no te Ekalesia a te Fatu.

I roto i te Parau Haapiiraa e te Parau Fafau, ua pii te Fatu i te horoʻa o te Varua Maitai ei horoʻa aore e tiʻa ia parau.⁶ Te reira hoʻi te pu no te iteraa papu e te mau horoʻa pae varua. Na te reira e haamaramarama mai i te feruriraa, na te reira e faaî mai i to tatou varua i te oaoa,⁷ na te reira e haapii mai ia tatou i te mau mea atoa, e na te reira e faahaamanaʻo mai ia tatou i te mau mea.⁸ « E faaite atoa mai te Varua ia [tatou] i te mau mea atoa te tiʻa ia tatou ia rave ».⁹

Te parau faahou ra te peresideni James E. Faust e, “ua riro te Varua Maitai ei tiaʻi rahi aʻe no te hau o te aau i roto i to tatou ao papu ore ».¹⁰

Ua parau mai te peresideni Gordon B. Hinckley, « E haamaitairaa rahi mau te fariiraa i te faaururaa a te hoê melo no te Atuaraa ».¹¹ A feruri na eaha te auraa no teie mea, oia hoʻi te tiʻaraa no te farii i te mau haapiiraa no ô mai i te hoê melo no te Atuaraa ; te tiʻaraa no te paraparau atu ma te paari mau, te ite mau, e te mana mau !

Mai te mau horoʻa atoa, e mea tiʻa roa ia fariihia teie horoʻa. Ia tuuhia te rima autahuʻaraa i niʻa i to outou upoo no te haamau ia outou ei melo no te Ekalesia, ua faaroo outou i te mau parau ra, « A farii mai i te Varua Maitai ». E ere teie i te auraa e, ua riro mai te Varua Maitai ei hoa tamau no outou noaʼtu eaha te mau ohipa ta outou e rave. Te faaara nei te mau papairaa moʻa ia tatou e « e ore roa te Varua o te Fatu e parahi noa mai i te taata nei ».¹² I to tatou haamauraahia ei melo no te Ekalesia, ua horoʻahia mai ia tatou i te tiʻaraa no te tapeʻa noa i te Varua Maitai, tera râ e tiʻaraa noa teie o te mea titauhia ia tatou ia fanaʻo e aore râ ia farii na roto i te haapaʻoraa i te ture e te parau-tiʻa. A haapaʻo maitai i teie horoʻaraa.

E faaara mai te Varua Maitai ia tatou i te mau ati, e e faauru mai te reira ia tatou ia tauturu ia vetahi ê i te mau taime no te ati. Ua aʻo mai te peresideni Thomas S. Monson ia tatou : « E hiʻo tatou. E tiaʻi tatou. E faaroo tatou no taua reo iti haʻihaʻi ra. Ia aparau mai te reira, e haapaʻo ia te mau tane e te mau vahine feruriraa paari i te reira. Eita ïa ratou e faaerehia i te mau faaururaa a te Varua.¹³

Ua haere au i te hoê mahana e mataitai i te hoê ana rahi mau. I roto i taua ana ra, ua tupohe te taata arataʻi i te mau mori no te hoê taime iti no te faaiteraa eaha te huru ia vai i roto i te poiri. E mea huru ê roa. Ua tuu atu vau i toʻu rima i mua noa mai i te mata e aita roa vau i ite atu i te reira. E mea riʻariʻa mau. Ua oaoa roa vau i te tuʻama-faahou-raa-hia mai te mori.

A ama mai ai te mori e a maramarama ai, hoê a huru atoa i te Varua Maitai ia tomo mai i roto i te poiri pae varua o te haati nei ia tatou e o te turama mai i te mau mea pae varua tei hunahia ra. Ua na ŏ mai te Aposetolo Paulo « E ore râ te taata e farii mai i ta te Varua o te Atua ra ; e mea maamaa ïa iaʼna, e ore hoʻi e ite i te reira, no te mea, i imihia te reira e te varua ».¹⁴

Te mătaʻu nei au aita te tahi mau melo no te Ekalesia a te Fatu e « fanaʻo nei i te mau haamaitairaa » o te horoʻa o te Varua Maitai.¹⁵ Ua haapoirihia te tahi pae i te mau mea o te ao nei, o te patoʻi nei i te faaururaa a te Varua Maitai. Aore atura ïa ratou i tiʻa faahou e ite atu i te faaururaa a te Varua. E ao maniania mau e te rahi o te ohipa teie ao ta tatou e ora nei. A haamanaʻo e ere te raveraa i te ohipa e tapaʻo no te riroraa ei taata puai i te pae varua. Mai te mea aita tatou e haapaʻo maitai, e nehenehe ïa i te mau mea o teie nei ao e haapoiri i te mau mea a te Atua.

Te vai ra te tahi mau taata tei pohe roa i te pae varua, aore faahou ratou e farii nei i te faaururaa a te Varua na roto i te mau ohipa ino ta ratou i rave. Area râ te tahi atu mau taata, ua hupehupe ïa ratou, aita roa ratou i hinaaro ia taʻuma i niʻa i te faito teitei aʻe no ratou iho e no te paraparau atu i te Atua ra.

Mai te mea e iriti ratou i to ratou aau no te farii i te faaururaa a teie nei horoʻa aore e tiʻa ia parau o te Varua Maitai, e ô mai ïa te hoê maramarama apî i te pae varua. E araara ïa te mata i te mau mea pae varua. E ite ïa ratou no ratou iho i te mau mea a te Varua, oia hoʻi te mau mea faufaa roa e o te tiʻa ia haapuai i te varua, te feruriraa e o te faaî mai i te aau i te oaoa rahi roa, aore e faaauraa.

Ua aparau te peresideni Brigham Young no niʻa i te hoê ohipa moʻa mau tei tupu i toʼna iteraaʼtu ia Iosepha Semita, tei taparahi-pohe-hia i roto i taʼna taoto, i te afaʻiraa mai i te tahi faahou â parau poroʻi. E parau poroʻi ïa teie ta te feia Moʻa o teie tau e hinaaro mau nei : « A [haapapu i te] parau atu i te mau taata ia tapeʻa noa i te Varua o te Fatu », parau aʻera o Iosepha, « e na te reira e arataʻi ia ratou i te vahi tiʻa. A haapaʻo maitai, eiaha roa e tiʻavaru e atu i te reo iti maru, na te reira e haapii mai ia oe eaha te ohipa e rave e te vahi e haere atu ; na te reira e horoʻa mai i te mau hotu no te basileia. A parau atu i te hui taeaʻe ia tiʻaturi noa â, e ia tae mai te Varua Maitai ia ratou ra, ua ineine ïa to ratou aau i te farii i te reira ».¹⁶

E te mau taeaʻe e te mau tuahine, te tiʻavaru ê ra anei tatou i te reo iti mărû ? Te rave ra anei tatou i te mau mea o te hamani-ino-nei i te Varua Maitai ? Te farii ra anei tatou i te mau mea ia tomo mai i roto i to tatou mau fare o te tiʻavaru ê ra i te Varua i rapae i to tatou mau fare ? E mea papu e riro te mau ohipa faaoaoaraa, te mau hohoʻa teata ta tatou e faatiʻa nei i te tomo mai i roto i to tatou mau fare i te tiʻavaru ê atu i te mana o te Varua Maitai. E mea ino mau i te Varua Maitai te pae rahi o te mau ohipa faaoaoaraa a to te ao nei. E mea papu, aita roa tatou e mataitai nei i te mau hohoʻa teata e aore râ afata teata o tei î roa i te mau ohipa iino, te parau faufau, e te mau ohipa viivii.

Te ani atu nei au ia outou ia feruri na roto i te hoê raveʻa haehaa e te aau pure e ia ani ia outou iho, « Te vai ra anei te Varua i roto i toʻu oraraa ? E mea oaoa anei au ? Te rave ra anei au i te hoê mea i roto i toʻu oraraa o te mea ino i te Varua e o te faaere nei i te Varua Maitai i te riro mai ei hoa tamau no tatou ? » A faaitoito na outou i te tatarahapa, mai te mea ua tiʻa te reira, e a farii faahou â i te faahoaraa a te Varua Maitai.

Te farii ra anei tatou i te faaururaa a te Varua Maitai i roto i to tatou mau utuafare ? Te rave ra anei te utuafare i te hoê ohipa o te tiʻavaru ê nei i te Varua ? Nahea tatou i te ani maitai i te Varua Maitai ia faaea mai i roto i to tatou fare e te utuafare atoa ?

E mea tiʻa roa i to tatou mau fare ia riro ei mau vahi faaearaa no te Mesia. E mea tiʻa roa ia tatou ia haere rahi aʻe i te hiero e ia faaiti i te taime i niʻa i te mau ohipa faaoaoaraa. A faatopa mai na i te maniania i raro i roto i to tatou mau fare, ia ore hoʻi te maniania o te ao nei ia haru mai i te reo iti mărû o te Varua Maitai. Te hoê o ta tatou mau hopoiʻa rahi roa aʻe ei mau metua, o te fariiraa ïa i te mana e te faaururaa a te Varua Maitai i roto i to tatou mau fare. E mea tiʻa roa ia tatou ia pure e ia taiʻo i te mau papairaa moʻa. E nehenehe ia tatou ia himene i te mau himene pureraa no niʻa i te Faahoʻiraahia mai te evanelia no te ani atu i te Varua Maitai ia tomo mai i roto i to tatou mau fare. E nehenehe atoa te faatupu-tamau-raa i te pô utuafare e tauturu mai.

I roto i teie mau tau aehuehu mau, te hinaaro nei tatou i teie horoʻa aore e tiʻa ia parau i roto i to tatou oraraa. Ua faahamanaʻo mai te peresideni Boyd K. Packer ia tatou : « Eiaha roa tatou e mătaʻu no te tau i mua nei. E tiʻa râ ia tatou ia oaoa, eiaha râ ia mătaʻu. Mai te mea e haapaʻo tatou i te mau faaururaa a t eVarua, e ora ïa tatou, noaʼtu e eaha to mua nei ia tatou. E faaitehia mai ia tatou i te ohipa te tiʻa ia tatou e rave ».¹⁷

Ua haapii mai te peropheta Iosepha Semita e, e tiʻa i te Feia Moʻa ia faataa i te horoʻa a te Varua Maitai i te tahi atu mau varua atoa, inaha « e horoʻa mai te reira i te hau e i te oaoa i to ratou varua ; e iriti ê atu te reira i te ino, te pohehae, e i te mau ino atoa i rapae i to ratou aau ; e e hinaaro noa ratou ia rave i te maitai, ma te faatupuraa i te parau-tiʻa e te paturaa i te Basileia o te Atua ».¹⁸

Ua faatiʻa mai te hoê hoa toʻu i te hoê taime i toʼna aamu no te iteraa e te taa-maitai-raa i te horoʻa a te Varua Maitai. Ua pure tamau oia e ua hiaai oia e ite i te parau mau no te evanelia.

Noaʼtu e ua hau maitai toʼna mau manaʻo, aita roa râ te ite papu taʼna i hiaai ra i roaa mai iaʼna. Ua tiʻaturi oia e e ora noa paha oia i te taatoaraa o toʼna oraraa ma te tiʻaturiraa i niʻa i te faaroo o vetahi ê.

I te hoê poʻipoʻi, a taiʻo ai oia i te mau papairaa moʻa, ua ite aʻera oia i te hoê mea i te faaîraa i roto i toʼna tino, mai te upoo e tae roaʼtu i te avae. Ua na ŏ mai oia, « Ua î roa vau i te here puai e i te oaoa. Aita roa e nehenehe iaʻu ia faatiʻa maitai atu i toʻu huru i taua taime ra taaê atu i te parau e, ua uruhia vau i te oaoa rahi ».

Noaʼtu e ua niiniihia mai te Varua Maitai i niʻa iaʼna, ua maere oia, e ua feruri aʻera oia e mai te mea e mea mau ihoa anei te reira, e aore râ e manaʻo noa te reira. Ua parau mai oia, « A feruri ai au i te reira, ua puai roa mai te manaʻo e tae roa ua faaoti aʻera vau na roto i te taʻi e, ‘ua ravaʻi te reira’ ».

I toʼna tamariiraa, ua ite atoa toʻu metua tane i te hoê ohipa mai te reira te huru i te mahana no toʼna bapetizo-raa-hia. Ua na ŏ mai oia, « I to te episekopo tuuraa i toʼna na rima i niʻa i toʻu upoo… e i te parauraa, ‘A farii mai i te Varua Maitai,’ ua ô mai te hoê huru… tei ore roa i itehia e au na muaʼtu… ua ô mai ïa te reira i roto i toʻu aau… e huru hoʻi no te oaoa te reira tei faaî roa i toʻu aau ».

Mai taua taime ra e i roto i toʼna oraraa, ua ite noa oia e ua ora o Iesu Mesia e ua faatere oia i Taʼna Ekalesia na roto i te hoê peropheta ora.¹⁹

E rave rahi mau taata i teie mahana tei farii i te mau faaururaa a te Varua Maitai a taiʻo ai ratou i te Buka a Moromona e aore râ a faaroo ai ratou i te mau iteraa papu a te mau misionare e te mau hoa. Ia ratou, te parau atu nei au, ei Aposetolo na te Fatu ra, o Iesu Mesia, ua faahoʻi-faahou-hia mai te evanelia ma toʼna îraa atoa i te fenua nei ! E peropheta mau o Iosepha Semita, ua iriti oia i te Buka a Moromona na roto i te horoʻa e te mana o te Atua. Te poroʻi atu nei au i te mau taata atoa ia taiʻo i te Buka a Moromona e ia farii i te fafauraa no te taiʻoraa i te reira « Ia itea teie nei mau parau ia outou, e ui atu i te Atua, i te Metua Mure ore ra, i te iʻoa o Iesu Mesia e, e parau mau anei teie mau parau, ma te manaʻo papu, e ma te faaroo i te Mesia, naʼna ïa e faaite mai i te parau mau ia outou na roto i te mana o te Varua Maitai ».²⁰

Ia outou e ere i te melo no te Ekalesia, te poroʻi atu nei au ia outou ma toʻu aau atoa – eiaha e patoʻi faahou i te parau mau. A faataa i te hoê vahi i roto i to outou aau no teie maramarama no te raʻi mai. A faaohipa i te faaroo, a tatarahapa, e ia bapetizohia outou i te iʻoa o Iesu Mesia no te faaoreraa o ta outou mau hara, e tiʻa atoa ia outou ia farii i teie nei horoʻa aore e tiʻa ia parau a te Varua Maitai.

Te ora nei to tatou Metua i te Ao ra ! O Iesu te Mesia ! Ua faahoʻihia mai te evanelia a Iesu Mesia ma toʼna îraa atoa i te peropheta Iosepha Semita ra. O te peresideni Gordon B. Hinckley te peropheta, te hiʻo, e te heheu parau i to tatou tau. O toʻu ïa iteraa papu na roto i te iʻoa o Iesu Mesia ra, amene.