Te mau faufaa morare o te mau tamahine parau tiʻa na te Atua

Ua tabula vau i te faufaa morare o te faaroo ei matamua no te mea, o te reira te mea faufaa roa aʻe. Ua haapii mai te peropheta Iotepha Semita e, te faaroo i te Fatu ia Iesu Mesia, o « te niu ïa o te mau mea parau tiʻa atoa ».² Te fafau atu nei au ia outou e teie mau tamahine nehenehe e, mai te mea e, e faaitoito outou i te haapaʻo i te mau faaueraa, e tupu tamau to outou faaroo i te rahi. Ia faaohipa tatou i te faaroo, e tupu i roto ia tatou te oaoa e te manaʻo papu, te aroha e te itoito, no te mea, na te faaroo e faaarepurepu i teie mau faufaa morare atoa.

Te faatiʻa ra te hoê tamahine no roto i te hoê pŭpŭ peiraa popo no te fare haapiiraa teitei, i te aamu no te tau a hauti ai oia e toʻna hoa o Muki i roto i te hoê hautiraa aito :

« Te haamanaʻo ra vau e, e mea fatata roa te taiʻo, … ua haafatata maira o Gracie [no roto oia i te tahi pŭpŭ] i mua, ouʻa aʻera i niʻa, e tupaʻi aʻera i te popo ma toʻna puai atoa… Ua faaite maira te refiri hiʻopoʻa reni e, ua rapae te popo, e ua afaʻi aʻera te refiri rahi i toʻna rima i niʻa no te faaite e, tei [ia matou] te taiʻo. Ua haamata ihora matou i ta matou tupairaa rima matarohia te tahi e te tahi, tera râ, ua ite atura matou ia Muki te afaʻi ra i toʻna rima i niʻa no te faaite i te refiri rahi e, ua û te popo i niʻa i toʻna rima iaʻna i tairi. Te faaite ra o Muki e, ua tano te popo i niʻa iaʻna. Area te refiri hiʻopoʻa reni ra, … te parau ra ïa oia e, … ua rapae, aita i tano i niʻa iaʻna.

E tamahine parau ore e te haama haere noa o Muki, tera râ, ua faaite oia i te hoê hiʻoraa parau tiʻa e te haavare ore, aitâ vau i ite aʻe nei i te reira huru. Ua maere roa o Gracie Shute, e no reira, ua paraparau oia ia Muki i muri aʻe i te hautiraa… I muri aʻera, ua horoʻa o Muki i te hoê Buka a Moromona na Gracie. Aita vau i ite e, ua taiʻo anei o Gracie i te reira buka…, ua ite râ vau e, ua putapû roa te aau o Gracie i te iteraa i tera huru to Muki, e o matou atoa nei ».³

E riro ei feia haavare ore i mua ia vetahi ê mai te mea e, e riro outou ei feia haavare ore i mua ia outou iho.

I roto i « Te Utuafare : E Parau Poroʻi i to te Ao nei », te taiʻo ra tatou e : « te mana moʻa no te hamaniraa i te taata, ia faaohipahia ïa i rotopu i te tane e te vahine anaʻe iho, o tei faaipoipohia, mai te au i te ture, ei tane faaipoipo e ei vahine faaipoipo ».⁴ Taaê noaʻtu i te reira, te parau ra te Fatu i roto i te Buka a Moromona, « Ua oaoa hoʻi au, o te Fatu te Atua, i te vahine taiata ore ra ».⁵ Te feia e rave i te mau peu herehereraa e te tahi atu taata i rapae i te faaipoiporaa, e mea papu e, e mauiui ratou no te reira, i te pae o te feruriraa e i te tino atoa. Ia ravehia te mau peu herehereraa te tane e te vahine i rapaeʻau i te mau otia tei faataahia e te Fatu, e tupu mai ïa te ati rahi, te haama, te ino, e te oaoa ore i roto i te feia tei rave i te reira.

Ia faaohipahia râ teie mau horoʻa moʻa mai ta te Fatu i hinaaro i roto i te otia o te hoê faaipoiporaa hiero, e horoʻa mai te reira ia tatou i te poupou e te oaoa rahi aʻe. E riro mai tatou ei rahu nui apiti e te Atua no te farii i te hoê utuafare e te hoê huaai. Te taiata ore na mua aʻe i te faaipoiporaa, apeehia mai e te haapaʻo maite i muri aʻe i te faaipoiporaa, o te hoê ïa parau mana e roaa ai te faatura e te oaoa i te taata atoa. Ua horoʻa mai te peresideni N. Eldon Tanner i te tahi mau aʻoraa maitai o taʻu e hinaaro nei e faahiti faahou atu, « Haamanaʻo tamau noa e, e nehenehe ta outou e haere ateaʻtu â i roto i te parau no te faatura, hau atu i te parau no te roo ».⁶ Te ani nei au ia outou ia hiʻo i te haapiiraa maitai roa no niʻa i te parau no te viivii ore tei papaʻihia i roto i te buka iti ra « No te Puai o te Feia Apî ».

Te haehaa, o te rave-au-raa ïa i te mau mea atoa. Teie te hoê hiʻoraa, ia farii anaʻe outou i te haapoupouraa, a farii i te reira ma te aau maitai, eiaha râ e faariro i te reira ei teoteoraa na outou. E te mau tamahine, e mea rahi te mau mea ta outou i ite, tera râ, mea rahi atu â te mau mea te tiʻa ia outou ia haapii. Te taata haehaa, o te taata ïa e farii ia haapiihia oia. Oia ïa, ua fafau mai te Fatu e, « No te mea ua tonohiaʻtu toʻu nei Varua i roto i te ao nei no te haamaramarama atu i te feia haehaa e o tei tae i te aau ra ».⁷ Te hoê o taʻu mau parau au roa, teie ïa : « Haapii i te parau e, ‘Aita vau i ite.ʻ Mai te mea e, e faahitihia te reira i te taime tiʻa mau, e tamau-noa-hia ïa i te faahiti ».⁸

E mea tiʻa ia roaa ia outou te puai no te faariro ia outou iho ei feia faatura, i reira e tiʻa ai ia outou ia faatupu i ta outou mau opuaraa e ia haamaitai atu â i to outou iho mau puai. Ia mataro outou i te faariro ia outou iho ei feia faatura i to outou apîraa ra, e riro mai ïa te reira ei tuhaa no te faahoturaa i to outou huru taata no te toeʻa o to outou oraraa. No reira, te huru e roaa ia outou na roto i te faariroraa outou ia outou iho ei feia faatura, e tiʻa mai ïa te reira e outou atoa i te Tiʻa- faahou-raa ra.⁹

Te ohipa, e tuhaa ïa no te faariroraa ia outou iho ei feia faatura. E teie nei, e au mau tuahine apî here e, tau matahiti tei orahia mai e au, hau atu i ta outou, tera râ, i te tau atoa o Papa ruau, te vai ra te hoê mea o te faatupu i te hinaaro i roto ia outou ia tarava i raro e ia taoto – ua parau ratou i te reira mea e, te ohipa.

Ia riro tatou ei feia au maite e te aroha hohonu i niʻa i te tahi atu mau taata. Ua horoʻa mai te Faaora ia tatou nei i te parabole no te tavini tiʻa ore, e tarahu rahi hoʻi taʻna ra. Ua faaore toʻna fatu i taʻna tarahu, tera râ, hoʻi atura taua tavini ra, e ua tuu i toʻna iho taeaʻe tavini i roto i te fare tapeʻaraa no te hoê tarahu naʻinaʻi roa aʻe i taʻna ra. Riri aʻera to raua fatu iaʻna, oʻna i ore i faaite i te aroha hohonu taʻna iho i farii ra, e no reira, faautua-atoa-hiaʻtura oia mai toʻna atoa taeaʻe tavini ra.¹⁰

Mai te mea e, e feia au maite outou i niʻa i te tahi atu mau taata, e riro atoa ïa ratou ei feia au maite i niʻa ia outou. Teie te parau a te hoê orometua no te Haapiiraa Sabati, i toʼna haapiiraaʼtu i teie tumu parau, inaha, na ŏ atura oia i taʻna mau piahi e, « Haamanaʻo outou e, tei ô nei tatou no te tauturu ia vetahi ê ». Ua ui maira te hoê tamahine i roto i te piha haapiiraa, « E o vetahi ê mâ ïa, eaha ïa te tumu tei ô nei ratou ? »

Te hoê tuhaa o te varua o te Parau Paari, o te rave-au-noa-raa ïa i te mau mea atoa, eiaha râ te mau mea tei opanihia e te Fatu. E mea tano ïa eiaha te peu faarahi i roto i te parau no te ahu, no te faanehenehe rouru, no te faaunauna mata, no te peu, no te paraparau, e no te pehe. E fariu mai paha te mata o te tahi mau taata i niʻa ia outou no ta outou mau peu faarahi, e mea papu atoa râ e, e rahi atu o ratou o ta outou e hinaaro nei e faafaariu mai, o te fariu ê atu ia outou. I toʻu apîraa ra, ua haere au e toʻu mau hoa i roto i te hoê vahi hautiraa, e i reira ua faatere matou i te hoê mereti maʻue. Mai te huru toʻna hohoʻa i te mereti faahurihia i raro, o te ohu noa. Ua hinaaro te rahiraa o matou e haere i ropu, eita ïa matou e pee i rapae ia puai roa te ohuraa o te mereti. I te tahi taime, tera mau taata tei te hiti roa ratou, e haru ratou i te hoê hoa tei huru piri atu i ropu i te mereti, tera râ, o raua toopiti atoa ïa te pee i rapae i te mereti. Ua ite oʻioʻi au e, e mea mărû roa te puai turaʻi i ropu i te mereti. Fatata aita hoê aʻe fifi i ropu, noaʻtu e, e ohu noa te mereti. Tera râ, mea fifi mai te mea e haru mai te hoê taata i te hiti i niʻa iaʻu. Ua haapii aʻera vau e, e mea papu aʻe ia faaea noa i ropu.

Tau matahiti i mairi aʻe nei, ua haere atu matou te peresideni Howard W. Hunter, te tuahine Faust, e o vau nei, e farerei i te tahi mau piahi no BYU i te taime a haamauhia ai te faanahoraa haapiiraa na te ara i Ierusalema i roto i te hoê hotera naʻinaʻi no Iseraela. I niʻa i te opani fare o na piahi e piti, ua papaʻihia teie mau parau, « Mai te mea e, tei muri noa mai te mâ i te huru Atua, maeva i te taeraa mai i hade ! »

Ua horoʻa mai te peresideni Hinckley i te tahi mau aʻoraa maitai roa i te naoraa e, « Ia vai mâ noa outou i roto i to outou ahuraa, e ta outou peu … Ua riro teie tau ta tatou e ora nei i teie nei, ei tau no te ahu haapaʻoraa ore e no te peu haapaʻoraa ore. Aita râ vau e haapeʻapeʻa roa nei i te huru o te ahu ta outou e oomo, mai taʻu e haapeʻapeʻa nei i te mâ o te reira … A ara ia vai mâ noa outou ».¹¹ Haamanaʻo e, i te tahi taime, e haavâhia outou e tae noaʻtu i te Ekalesia ia au i to outou hiʻoraa mâ e te nehenehe maitai.

Outou e teie mau tamahine faufaa rahi e, e titauhia te itoito rahi i roto ia outou – te itoito no te patoʻi i te faaheporaa a te taata, no te patoʻi i te faahemaraa, no te faaoromaʻi i te haamaauraa e aore râ i te tuuraahia outou i te hiti, no te turu i te parau mau. E titau-atoa-hia te itoito i roto ia outou no te amo i te mau titauraa o te oraraa nei. Teie ta te hoê tamahine horo atea i papaʻi, « E rave rahi te taime ua hinaaro vau ia faaruʻe e ia faaea i te horo. I roto i taʻu hororaa matamua i teie matahiti, i te taime ua fatata roa toʻu puai i te pau e ua fatata hoʻi e faaea i te horo, ua tupu aʻera i roto i toʻu feruriraa te mau parau no te toru o te irava o te himene ra, ‘Aue te paari’. Na taua mau parau ra i horoʻa mai i te itoito i roto iaʻu no te horo e tae roaʻtu i te hopea ».¹²

Ua parauhia mai ia tatou i roto i Te Parau Haapiiraa e te mau Parau Fafau e, « ia tupu â hoʻi outou i te aroha ».¹⁴ Te aroha, e faufaa morare ïa ta te Atua i horoʻa mai. O te riroraa ïa ei taata maitai e te raveraa i te maitai. O te hoê ïa huru e aore râ, te hoê ohipa faahinaarohia ; « o te hoê ïa hohoʻa maitai e te auhia ».¹⁵ Te nehenehe faahinaarohia, o te hoê ïa huru ta te mata taata e haru, e no roto mai te reira huru i te hau o te taata ; o te hoê ïa nehenehe hohonu no roto mai i te huru tiʻamâ o te hoê taata. Ua faahitihia te parau e, e riro to outou hiʻoraa ei mea faufaa roa aʻe i te mau mea atoa ta outou e tiʻa ia faaite. Ua matau vau i te hoê taurearea maitai roa, te vai ra taʻna tabula no te mau maitai taʻna e imi nei i roto i te vahine taʻna e hninaaro no a muri aʻe. O te aau tae tei tabulahia i te omuaraa o te tabula.

Mea pinepine matou i te ite e, e ere te mana o te mau vahine maitai te mea tâuʻa-maitai-hia. Pinepine taua mana ra i te ite-ore-hia, tera râ, e hopearaa faahiahia roaʻtoa to te reira. E nehenehe ta te hoê vahine e faatupu i te taaêraa rahi i roto i te hoê nunaa taatoa. E rave mai au e piti hiʻoraa no roto mai i te mau papaʻiraa moʻa, hoê no te ino e hoê no te maitai.

I roto i te buka a Etera, te imi nei te tamahine purotu a Iareda i te raveʻa, na roto i te hoê ori faatianiani, ia faaipoipo o Akisa iaʻna. No te farii i toʻna rima, ua titauhia ia Akisa ia taparahi pohe roa i toʻna papa ruau, te Arii Omera, i reira toʻna papa e riro mai ai ei arii. Na roto i te titauraa a te tamahine a Iareda, ua rave o Akisa i te hoê tapuraa i te mau amuiraa huna e na te reira i haamou roa i te Ati Iareda.¹⁶

Area o Esetera, te hoê vahine Atiuda i roto i te Faufaa Tahito, ua faaora oia i toʻna nunaa. Tei roto te Atiuda i te faatitiraa i taua tau ra, e ua faaipoipohia o Esetera i te Arii Ahasueru. Ua tarima te arii i te hoê parau mana no te taparahi pohe roa i te mau Atiuda atoa. Ua faahepo atura te taeaʻe fetii o Esetera, o Moredekai, ia tiaʻtu oia i mua i te arii i te iʻoa o toʻna ra nunaa no te parau e, « O vai te ite e te mea teie i noaaʻi ia oe te hau i teie nei anotau ? ».¹⁷ Ma te peʻapeʻa no toʻna iho ora, ua taparu o Esetera i te arii ia faaorahia toʻna ra nunaa. Ua faaroo te arii i taʻna taparuraa, e ua ora ratou. E nehenehe ta te hoê noa iho vahine e faatupu i te taaêraa rahi, noaʻtu no te hoê nunaa taatoa.

E tau fifi teie. Te tiʻaturi nei au e, ua faataahia to outou mau varua no teie mau mahana hopea nei ; mai ia Esetera atoa, ua haere mai outou i te fenua nei « i teie nei anotau ». E riro e, ta outou ohipa faufaa rahi roa aʻe, o ta outou ïa faaururaa ia vetahi ê ; e riro to outou huru vahine nehenehe e to outou ite hohonu, i te itehia na roto i te hau o to outou puai, to outou mărû, to outou tura, to outou nehenehe faahinaarohia, to outou aroha, to outou maramarama, to outou ite aau, to outou anaana e to outou maitai varua. A faahotu nehenehe i teie mau horoʻa to te vahine. Na te reira e faariro ia outou ei mau vahine nehenehe e te hinaaro-roa-hia, a tavini ai outou ia vetahi ê ei mau tavini no te Atua ra.

Te faaite papu nei au e, mai te mea e, e faaohipa maite outou i teie mau maitai morare, e tiʻa ïa ia outou « ia haere tiaʻtu … i mua i te tiʻa-maite-raa i te Mesia, ma te tiaʻi papu roa, e te here i te Atua e te taata atoa ».¹⁸ Na roto i te iʻoa o Iesu Mesia, amene.