Te huru o te Ekalesia

E au mau taeaʻe e e au mau tuahine here, ua riro teie ei semeio, ia paraparau atu ia outou na, ati aʻe te ao nei. Tei ô nei matou i te pû amuiraa i Roto Miti nei te paraparauraaʼtu. Te paraparau nei matou i to matou reo tumu. Tera râ, e rave rahi tauatini outou tei haaputuputu i roto i te mau fare a te Ekalesia, i roto i te mau fenua e rave rahi, e te faaroo mai nei outou ia matou i roto e 56 reo.

Te farerei faahou nei tatou i roto i te hoê amuiraa rahi a te Ekalesia na te ao atoa nei, mai te au i te hinaaro e i te faaueraa a te Fatu.

A na reira ai tatou, tei roto te ao nei i te arepurepu. Te vai nei te tamaʻi e te faainoraa. E mea rahi te ahoaho. Te mau melo o te utuafare o te Ekalesia, e feia aiʻa ratou no te mau nunaa e rave rahi. Tei roto tatou i na pae e piti atoa ra o te aroraa. Ua feruri au e paraparau atu i te reira ia outou a nanahi poʻipoʻi.

Area râ, na roto i te mau ati atoa ta tatou e farerei nei, te oaoa nei au ia faaite atu e, te haere nei te ohipa a te Ekalesia i mua. Te tupu tamau nei tatou i te rahi ati aʻe te ao nei. Te tere nei ta tatou ohipa misionare ma te maumau ore. Te tomo tamau mai nei te feia faafariu i roto i te Ekalesia, e te tamau noa nei to tatou rahiraa i te maraa. Taaê noaʼtu te reira, titauhia ia tatou ia aupuru papu i te feia tei bapetizohia ei feia faafariu. Te tiaoro nei matou i te mau melo atoa o te Ekalesia ia farerei i te feia faafariu apî, ia tauahi ia ratou e ia tamarû i to ratou peʻapeʻa. Haamaitai ia ratou na roto i ta outou faahoaraa. Faaitoito ia ratou na roto i to outou faaroo. A hiʻo e, aita anei te tahi o ratou e moʻe ra. Te mau tane atoa, te mau vahine atoa e te mau tamarii atoa tei tiʻamâ no te bapetizoraa, ua tiʻamâ atoa ïa no te farii i te auhoaraa papu, i reira hoʻi ratou e tupu ai i te rahi i roto i te Ekalesia e i roto i taʼna mau ohiparaa e rave rahi.

Te maraa tamau noa nei to tatou rahiraa e haere nei i te pureraa oroʻa. E nehenehe e haamaitai atu â i te reira, e te faaitoito atu nei au ia outou ia haa tamau noa i niʻa i te reira. Noaʼtu râ i te reira, aita vau e ite nei i te tahi atu Ekalesia mai teie te rahi te taata e haere nei i te pureraa.

E mauruuru rahi toʻu no te puai o te feia apî o te Ekalesia. Mea peʻapeʻa râ i te mea e, te topa nei â te tahi pae. Tera râ, e au i te hoê semeio ia hiʻo i te puai o to tatou feia apî i roto i te mau faaheamaraa iino e haati tamau nei ia ratou. Te viivii e te faufau o te mau hohoʻa hairiiri, te faahemaraa ia amu i te raau taero, te titauraa ia faaore i te mau otia atoa no niʻa i te apeniraa, tera te tahi mau tamataraa ta ratou e farerei nei. Noaʼtu râ te umeraa a te ao ta ratou e parahi nei, te tapeʻa maite nei ratou i te faroo o to ratou mau metua, e i te evanelia tei here-roa-hia e ratou. Eita e hope te parau no te faahiti i te maitai o to tatou feia apî faahiahia.

Ua maraa te faaroo no te aufau i te tuhaa ahuru e te mau ô, noaʼtu te toparaa te faito o te faaravaʻiraa faufaa ta tatou e ite nei. Ua tiʻa ia tatou ia tamau noa i te patu i te mau fare pureraa e te mau hiero, ia faatere maite i ta tatou faanahoraa rahi no te haapiiraa, e i te mau ohipa atoa e rave rahi tei titau i te tauturu a te tuhaa ahuru. Te fafau atu nei au ia outou e, eita matou e tuu i te Ekalesia i roto i te tarahu. E faaau tiʻa roa matou i te ohipa i niʻa i te moni o te tuhaa ahuru ma te faaohipa i te reira faufaa moni moʻa no te mau opuaraa i faataahia e te Fatu.

Te hinaaro nei au e faahiti i te tahi parau no niʻa i te mau mea tei papaʻihia i roto i ta tatou mau veʻa. Teie ta matou faaotiraa no te hoo mai i te pû tapi hooraa, tapiri noa mai i te pae tooa o te râ no Temple Square.

Te manaʻo nei matou e, e hopoiʻa faufaa roa na matou ia paruru i te mau vahi atoa e haati nei i te Hiero no Roto Miti. Te fatu nei te Ekalesia i te tuhaa rahi o te fenua e tiʻahia nei e teie Pû tapi hooraa. Ua hinaaro te mau fatu o teie mau fare e hoo i te reira. Titauhia râ te tahi tatâʻiraa rahi e te moni rahi. Ua manaʻo matou e, e mea tiʻa roa ia rave i te tahi ohipa no te haamaitai i te reira vahi. Te hinaaro nei râ vau e haapapû i to te Ekalesia taatoa e, aita ta outou tuhaa ahuru, e eita roaʼtu hoʻi te reira e faaohipahia no te hoo mai i taua fare ra. Eita atoa te reira e faaohipahia no te haamaitai i teie fare no te mau ohipa tapihooraa.

No roto mai te faufaa i te mau taiete imiraa faufaa tei fatuhia e te Ekalesia. Na teie mau faufaa e te faufaa moni apî o te moni haaputu, e amo i te haamauʻaraa o teie faanahoraa.

Te oaoa nei au ia faaite atu e, e nehenehe ta tatou e tamau noa i te patu i te mau fare pureraa. Te patu nei tatou fatata e 400 fare pureraa apî i te matahiti hoê no te faaau i te tupuraa rahi o te mau melo o te Ekalesia. Ua riro te reira ei ohipa faufaa rahi e te faahiahia hoʻi, e o ta matou hoʻi e mauruuru roa nei. Te tamau noaʻtoa nei tatou i te patu i te mau hiero na te ao atoa nei, e te oaoa nei matou ia faaite atu e, ua maraa te tereraa ohipa o te hiero. Teie ohipa faufaa roa, te ravehia nei hoʻi ei maitai no te feia ora e no te feia pohe, ua riro ïa ei tuhaa tumu no te evanelia a Iesu Mesia.

Te oaoa atoa nei matou ia ite i te hoê maraaraa i roto i te parau no te faaineineraa utuafare i rotopu i to tatou mau taata. Teie faanahoraa, tei haapiihia hau atu i te 60 matahiti i teie nei, ua riro ïa ei tautururaa rahi no te parururaa e no te ora maitai o te Feia Moʻa i te mau Mahana Hopea nei. Tei te mau utuafare tataʻitahi te hopoiʻa no te mitoraa i te mau mea atoa e hinaarohia e ratou, ia au i te maraa ia ratou. No reira, te faaitoito faahou atu nei â matou i to tatou mau taata ia haapae i te mau tarahu faufaa ore, ia faatere ma te paari, i te haamauʻaraa i ta ratou faufaa moni, ia faataa i te tahi faufaa moni no te mau taime fifi rû. Te faaara nei matou i to tatou mau taata ia ara i te tahi mau faanahoraa « e monihia ai » e i te tahi atu mau herepata tei faataahia, i te rahiraa o te taime, no te haru i te feia hema ohie noa.

Te maere tamau nei au ia ite i te rahiraa ohipa tavini aufau ore, e ravehia nei e to tatou mau taata. Ua papu roa iaʻu e, te ohipa taviniraa aufau ore, o te raveʻa ïa a te Fatu no te rave i Taʼna ohipa. Te faatereraa o te mau paroita, e te mau tìtì, e te mau pŭpŭ autahuʻaraa, e te mau ohipa no te mau pŭpŭ tauturu, te tere nei te reira na roto i te arataʻiraa a te feia ohipa aufau ore. Te faanahonahoraa rahi o te ohipa misionare, te rave-atoa-hia nei te reira na roto i te ohipa taviniraa aufau ore.

Hau atu i te reira, te vai atoa nei te hoê tuhaa rahi o te mau melo paari o te tavini nei i roto i te ohipa misionare a te Ekalesia. Ua hau i te 18.000 o ratou o te horoʻa nei i te taatoaraa e aore râ, i te hoê tuhaa rahi o to ratou taime, i roto i teie ohipa. Te haamauruuru nei matou ia ratou no te reira ohipa taviniraa maitai.

I teie amuiraa e taeʻahia ai te pitiraa o te matahiti o te faanahoraa no te Moni Tamau no te Haapiiraa. Te oaoa nei au ia faaite atu e, te tere nei teie faanahoraa i niʻa i te hoê mauraa papu i teie mahana. E 8.000 rahiraa feia apî tamaroa e te tamahine e fanaʻo nei i teie nei, i te haapiiraa no te faaaano atu i to ratou mau ite e ta ratou mau raveʻa imiraa ohipa. Na roto i teie na matahiti haapiiraa e piti tei fanaʻohia e ratou, ua tataʻi 4 1/2 te maraaraa ta ratou moni. E semeio teie !

E nehenehe taʻu e na reira noa i te faaiteraa. E tano noa râ ia parau atu e, te vai maitai noa nei te Ekalesia. Te tiʻaturi nei au e, te faatere-maitai-hia nei taʼna mau ohipa. Te rahi nei te faaroo, e te here o to tatou mau taata i te Fatu e to ratou haapaʻo i Taʼna ra mau haapiiraa.

E tau fifi teie. Te tautoo nei te faaravaʻiraa faufaa. Te tupu nei te aroraa i te ao nei. Te tapeʻa nei râ te Manahope i Taʼna fafauraa, oia hoʻi, e haamaitai oia i te feia e haere ma te faaroo e te parau tiʻa i mua Iaʼna ra.

Ua riro te evanelia a Iesu Mesia ei raveʻa e roaa ai te hau. E ia haapaʻo hoʻi tatou i te reira, e ia faatumu i te reira i roto i to tatou oraraa nei, e haamaitaihia ïa tatou, e faufaahia ïa tatou. Aue ïa te faahiahia ia riro ei feia ohipa i roto i teie ohipa hanahana. A oaoa anaʻe tatou no taua fanaʻo ra. E tavini anaʻe tatou ma te oaoa rahi.

Ia vai mai te mau haamaitairaa faufaa rahi o te raʻi i niʻa ia outou, e au mau hoa here e. Ia tupu te faaroo i te rahi i roto i to outou aau. Ia vai mai te here e te hau i roto i to outou mau fare. Ia vai mai te maa i niʻa i ta outou airaa maa, e te ahu i niʻa i to outou tua. Ia tamahanahana mai te ‘ata a to te raʻi i to outou aau e ia tamahanahana ia outou i roto i te mau taime ahoaho. Taʻu teie pure i teie poʻipoʻi no te iritiraa tatou i teie amuiraa rahi, na roto i te iʻoa moʻa o Iesu Mesia ra, amene.