Ua Laveai e Ieova ia Tanielu Faatuatua

Sa tilotilo atu Tanielu i le ipu meaai o loo i ona luma ma le uaina o loo i lana ipu. Sa ia iloa e le o ni meaai lelei ia na finagalo Ieova e ai ai. E le mafai ona ia aia.

E le mafai foi e uo a Tanielu—o Sataraka, Mesako, ma Apeteniko—ona aai i meaai a le tupu. O taulelea Eperu e toafa nei sa pueina i Ierusalema ma ave i le aai o Papelonia. O lea ua manao le Tupu o Nepukanesa latou te aai i meaai taugata ma le uaina. Sa manatu o ia o le a malolosi ai i latou.

Ae sa iloa e Tanielu ma ana uo o meaai a le tupu o le a latou le malolosi ma ola maloloina ai. “Aumai ia ia i matou ni fua o laau e aai ai ma le vai e inu ai,” sa fai atu ai Tanielu i le auauna a le tupu. “A maea aso e 10 ona faatusatusa lea o matou i tagata o loo aai i mea taumafa a le tupu.” Sa malie i ai le auauna a le tupu.

O aso uma e aumai ai e le auauna i alii talavou e toafa ia fua o laau o se meaai e fai mai fatu laau ma karite. Ma ia aumai foi le vai e inu ai ae le o uaina. Ina ua mavae aso e 10 sa vaaia le sili atu o le malolosi o alii talavou nai lo isi pologa, o lea na le toe fai atu ai le auauna ia i latou e aai i meaai a le tupu.

A o tuputupu ae Tanielu, sa faamanuiaina o ia e Ieova i le atamai ma le poto. Sa faatuatuaina Tanielu e le Tupu o Nepukanesa ma fesili atu i ai mo ana fautuaga

Ina ua avea le Tupu o Tariu ma tupu fou o Papelonia, sa ia faia Tanielu atamai ma peresitene o lona malo. Sa lotoleaga nisi alii ia Tanielu. Sa latou iloa e faatolu i le aso ona tatalo o ia i le Tama Faalelagi. Sa tauanau e alii lotoleaga ia le tupu e fai se tulafono fou. A maua se tagata o tatalo e tatau ona lafo i totonu o le lua o leona feai.

Sa iloa e Tanielu faamaoni le tulafono, ae sa tatalo lava o ia i aso uma. Sa faatalitali ma faalogologo nei alii i fafo o lona potu. Ina ua latou faalogoina ua tatalo Tanielu, sa latou faavave atu loa i le tupu.

Sa faanoanoa le Tupu o Tariu ina ua ta’u atu e tagata ia te ia e uiga ia Tanielu. Sa ia moomoo lava maimau pe ana faapea na te lei sainia le tulafono, ae na tatau lava ona usitaia le tulafono. Sa lafo Tanielu i le lua o leona, ma sa tuu ai se maa tele e tapunia ai le gutu o le lua.

O lena po atoa sa popole lava le tupu ma mafaufau. O le taeao po na sosoo ai sa faanatinati atu ai o ia i le lua o leona. Sa valaau atu le tupu ma le leotele, “Tanielu e, ua mafai ea e lou Atua ona laveai ia te oe ai leona?”

Na pei e matuu atu se avega mamafa ina ua ia faalogo atu ia Tanielu o tali mai i tua atu o le maa, “Ua auina mai e lo’u Atua o lana agelu, ua punitia ai gutu o leona, ua le afaina ai au.”

Ma le olioli tele, na auina atu ai e le tupu se faaiuga i le nuu atoa. O le Atua o Tanielu o le Atua soifua, ma ua Ia laveai Tanielu mai leona.