Mo Faifeautalai Ua Maea Misiona

O se tasi o mea e sili ona maoae ou te manatuaina i le avea ai ma se faifeautalai, o lo’u matuai latalata atu lea i le Alii e ala i le tatalo e le aunoa. I le vaitaimi sa ou faamisiona ai, sa tu le maota o le misiona i State Street i le Aai o Sate Leki. O se fale tele sa faaliliuina i se nofoaga autu e aoao ai faifeautalai. Sa i ai ni potu tetele e nonofo ai e masalo pe tusa ma le 10 moega i se potu. Sa matou taunuu atu i le po o le Aso Sa.

O le vaiaso ae ou te le’i ulufale atu i le misiona o se taimi fiafia lea. Sa tele ni pati ma ni faamavaega sa faia. Ou te fefe ona sa le’i lava sa’u malologa ma saunia ai mo aoaoga o le a ou mauaina i le ofisa o le misiona. Ina ua oo i le afiafi o le matou aso muamua i le ofisa o le misiona, sa ou matuai vaivai lava. A o ou faatalitali mo isi faifeautalai e sauni e momoe, sa ou taoto i luga o lo’u moega ma ou moe ai lava. Ae peitai, na faalavelave la’u moe e se faalogoga e faapea na siosiomia au. Ina ua ou ala lelei, sa ou faalogoina upu o se tatalo o loo fai. Sa pupula ou mata, ma sa matuai ou tei lava i le vaaia o alii faifeautalai uma i totonu o lo’u potu o loo tootutuli faataaliolio i autafa o lo’u moega, o loo faaiuina le aso i se tatalo. Sa vave ona ou toe moeiini ma faafoliga o la ou te moe. Sa matuai o’u ma lava e aluese mai le moega ou te auai faatasi ma i latou. E ui lava o lou aafiaga muamua i le tatalo a o avea au ma se faifeautalai o se mea e matamuli ai, ae o le amataga lea o ni tausaga matagofie se lua o le valaau atu e le aunoa i le Alii mo le taitaiga.

O la’u misiona atoa, sa ma tatalo faatasi ai ma la’u soa i taeao taitasi a o ma amataina se aso fou. O lea faiga sa toe faia foi i po taitasi ae ma te le’i momoe. Ma te faia se tatalo ae ma te le’i suesue, o se tatalo pe a ma tuua lo ma fale e o atu e talai, ma se tatalo faapitoa pe a ma moomia se taitaiga faapitoa ina ia taialaina le ma talaiga. O le tele o a ma talosaga i lo tatou Tama oi le Lagi na tuuina mai ai ia i ma’ua le malosi ma le lototele e fetaomi ai i luma i le galuega lea sa valaauina ai i ma’ua. E maua mai tali, o nisi taimi i ni auala tuusao ma mautinoa e maofa ai. O le taitaiga a le Agaga Paia na foliga mai na faalauteleina i le tele o taimi ma te ole atu ai i le Tama Faalelagi mo le taitaiga i se aso tuupoina.

Pe a ou toe tepa i tua i lo’u olaga ina ua maea la’u misiona, ua ou iloa ai e i ai vaitaimi sa mafai ai ona ou faatumauina lena vavalalata ma le Alii lea sa ou oo i ai i le misiona. Sa i ai foi vaitaimi na foliga mai na ofi mai ai faaosoosoga o le lalolagi, ma sa tuuitiitia ai lo’u faia soo ma le faamaoni o a’u tatalo.

Pe le o se taimi lelei ea lenei mo se iloiloga puupuu faaletagata lava ia e iloilo ai pe o i ai lava lo tatou sootaga ma lo tatou Tama Faalelagi lea sa tatou fiafia ai i le misiona? Afai ua faasalavei e le lalolagi i tatou mai le masani o le tatalo, ua tatou le mauaina se mana faaleagaga maoae. Atonu o le taimi lenei tatou te toe faaolaolaina ai lo tatou agaga faafaifeautalai e ala lea i tatalo faifai pea, tumau, ma malosi.

O le isi mea matagofie ou te manatuaina a o avea au ma faifeautalai, o le auai lea i le suesueina o tusitusiga paia i aso taitasi. O le faatulagaina o le mulimuli i se fuafuaga o le suesueina o tusitusiga paia i le aoaoina o le talalelei o se aafiaga matagofie ma le tauia. O le malamalama i aoaoga i tusitusiga paia e faailoa mai i se auala matagofie e ala i suesuega a le tagata lava ia. I le avea ai ma se faifeautalai ou te manatuaina lo’u maofa i le atoatoa o le sauniaina e le Alii o se fuafuaga mo Lana fanau i lenei lalolagi, i le auala na Ia musuia ai i tisipenisione uma ia mafaufau o Ana perofeta e tusitusi Ana feutagaiga ma i latou. O Ana afioga e tonu ma sao i taimi uma, e faaalia mai ai faamanuiaga e oo mai e ala i le mulimuli i Lana tulafono ma Lana ala.

Matou te faaaluina foi se itula pe sili atu i aso taitasi e suesue faatasi ai o ni soa. O le i ai o ni tagata se toalua e suesueina ia aoaoga faavae o le malo na foliga mai e faateleina ai lo matou malamalama. Matou te faitau faatasi, ona fetufaai lea o o tatou manatu.

Na faateleina lo matou malamalama a o matou mulimuli i le faiga lea i aso uma o le suesue o le tagata lava ia ma suesue faalesoa. O lenei faiga na matou vavalalata ai o ni soa ma faateleina ai lo matou malamalama i aoaoga faavae o le malo.

A tatou tuua le misiona, o le a le toe i ai ni a tatou soa e fesoasoani ia i tatou i le faatautaia o a tatou suesuega, ae e le faapea o le a le toe faaauauina ai lea masani. A tatou toe foi atu i le fale, ai lava se manaia o le faia e le aiga i aso uma o le suesueina o tusitusiga paia. Afai tatou te nonofo ese mai le aiga, pe le mafai ona tatou valaaulia ia uo ma i latou o loo tatou potu faatasi e suesue faatasi ma i tatou? O le masani o le faia e le aunoa o ni vasega e suesue ai ma le auai i le inisitituti, o le a fesoasoani e faatumauina ai aoaoga o le malo ia manino i o tatou mafaufau ma aveese ai le faalavelave soo mai o faigata o le lalolagi. Ioe, pe a tatou faaipoipo, ua i ai ni a tatou soa e faavavau o e e mafai ona tatou suesue ma fetufaai i aoaoga o le talalelei.

O tusitusiga paia e i ai pea iina ina ia faalolotoina ai lo tatou malamalama i le faamoemoega o le olaga, ma mea e moomia ona tatou faia e faateleina ai le faamalieina ma le tauia o le olaga. Faamolemole ia faaauau pea le masani o le faia e le aunoa o suesuega a le tagata lava ia ma faalesoa o tusitusiga paia.

Pe tou te manatua le olioli lea e maua mai i le aoaoina atu o le talalelei i se tasi e le’i mauaina nei aoaoga i lona olaga atoa, ma le fiafia lea e oo mai pe a e aoaoina atu le tulafono a le Atua, ma faamanuiaga e maua mai i le mulimuli ia te Ia? Pe mafai ea ona galo ia te oe le olioli o lau uluai papatisoga i le misiona?

I lo’u vaitaimi, sa lei i ai ni faatanoa vai mo papatisoga i falelotu. O la’u papatisoga muamua na faia i le Vaitafe o Scioto i le setete o Ohaio, ISA. Sa faia i se aso malu o le tau toulu, ma sa foliga mai sa sili atu le malulu o le vai nai lo le ea. Ou te manatuaina lo’u matuai maalili a o ou savali atu i totonu o lena vaitafe malulu, a o ou faamalosiau atu i la’u tagata sailiili e mulimuli mai ia te au. E ui lava i lea, sa vave ona te’a le malulu o le ea ma le vai, a o ou faataunuuina le sauniga o le papatisoga. O le vaaia o foliga fiafia o le tagata na alu a’e mai le vai o le papatisoga o se vaaiga lea o le a le mafai ona galo ia te au.

O avanoa e aoao atu ai le talalelei ma papatiso e le faatapulaaina mo na o i latou e fai a latou pine a faifeautalai faamisiona. Ou te mafaufau pe aisea tatou te faatagaina ai le afi o le galuega faafaifeautalai ia fai ifo lona mumu pe a tatou toe foi atu i gaoioiga a o tatou olaga i le lalolagi.

E le’i i ai lava se isi taimi i le talafaasolopito o le tagata ua sili atu ai ona faaauupegaina i tatou e aoao atu le talalelei i fanau a lo tatou Tama o i le Lagi iinei i le lalolagi. Ma e foliga mai ua sili atu lo latou manaomia i le taimi lenei nai lo se isi lava taimi muamua. Ua tatou vaaia le faaitiitia o le faatuatua. Ua tatou vaaia le faateleina o le fiafia i mea a le lalolagi ma le tau leai o nisi e i ai ni uiga lelei, o ia mea uma o le a tupu ai le lototiga ma le faanoanoa. O le mea tatou te manaomia o se autau tautupu o faifeautalai ua maea misiona, e toe auauna atu i le galuega. E ui ina leai ni a latou pine a faifeautalai faamisiona, ae e mafai ona latou mauaina lea lava tautinoga ma le naunautaiga e tasi e avatu le malamalama o le talalelei i se lalolagi o loo tau sailia lona ala.

Ou te talosaga atu ia te outou o faifeautalai ua maea misiona ina ia toe tuuto atu outou lava, ina ia toe faatumulia i le naunautai ma le agaga o le galuega faafaifeautalai. Ou te talosaga atu ia te outou ia outou foliga o ni faifeautalai, ia avea ma se vaega [o faifeautalai], ma ia faia le vaega o se auauna a lo tatou Tama oi le Lagi. Ou te tatalo mo lo outou naunautai faafouina e folafola atu le talalelei ina ia mafai ona outou auai atoatoa i lenei galuega maoae ua valaauina i tatou uma e le Alii e fai. Ou te fia folafola atu o loo i ai faamanuiaga silisili o loo teuina mo outou, pe afai tou te faaauau pea ona fetuleni atu i luma ma le maelega lava lea e tasi sa outou mauaina muamua a o avea outou ma faifeautalai faamisiona.

Ia fetuleni atu i luma ma le naunautai fou, ma e ala atu i au faataitaiga, ia faasusulu atu le malamalama o le talalelei i lenei lalolagi faigata. O le galuega lenei a le Alii lea o loo tatou faia. O loo soifua le Atua. O Iesu o le Keriso. Ua tatou auai i Lana Ekalesia. O la’u molimau lea ia te outou.