Mata e Oo Mai Iñaki i le Fale?

E na o le 23 vaiaso o le afuafuaga o le maitaga, ae fanau mai lo ma atalii lona tolu o Iñaki, ina ua faia se taotoga faanatinati. O lona mamafa sa na o le 1 le pauna, 4 aunese (560 g) ma lona umi e 12.2 inisi (31 cm).

Ona sa tele ni masina na fanau le au mai ai lo ma atalii, sa le tele se avanoa e ola ai o ia. Sa fesili mai le matou fomai pe ma te mananao pea i se fomai faapitoa e fesoasoani ia te ia, o lea na atili faaumiumi ai le tulaga e le mafai ona suia. Sa ou tali atu afai lava e ola o ia, e tatau ona matou tuu atu ia te ia le avanoa [e ola ai]. Ona ou ole atu lea i le Atua mo se vavega.

Sa maua e Iñaki se faamanuiaga o le maloloina lelei i lena po muamua. I le isi fa masina umi na sosoo ai, sa tigaina ai o ia i se pu sa i lona totoga, o le piliki o le toto o lona faiai, ma se māmā sa le toe gaoioi. Ona o lona tulaga sa i ai, sa ma maua ai se faatagaga e faaigoa ma faamanuia o ia i le falemai.

A o faia lenei faagasologa, sa matou feiloai i isi matua sa puapuagatia foi e pei o i ma’ua, ma sa matou ofoina atu i le tasi ma le isi le lagolagosua ma le faamafanafanaga. Sa ma faasoaina atu foi a ma molimau o le talalelei i tagata uma sa mafai ona ma tuuina atu i ai.

I se tasi aso sa ma maua ai se valaau e o atu i le falemai e faatofa i lo ma atalii, o le sa lei faamoemoe na te aulia le aoauli. Ina ua ma taunuu atu, sa ma siiina o ia ma talanoa atu ia te ia. O le vaaia o ia i lona tulaga vaivai sa le mafaamatalaina le tiga. Mo le taimi muamua lava, sa ma iloa ai ma lo’u toalua o i maua ua na o ni matua lē tumau o lenei atalii o le Atua. Na pau le mea e mafai ona ma faia e fesoasoani ai ia te ia o le tatalo ma ole atu i le Tama Faalelagi e fai Lona finagalo. Sa uumau pea Iñaki i lona ola i lena aoauli, ma ma te faafetai sa faaauau pea ona ia faia i aso na sosoo ai.

O le fa masina na i ai Iñaki i le potu o ma’i tigaina mo pepe fou faatoa fananau mai, sa ma vaaia faafia ai le faatinoga o le mana o le perisitua a o faamanuiaina e le Tama Faalelagi lo ma atalii e auala mai i aao o fomai faapitoa ma i latou ua umia le perisitua—ma iu ai ina faamaloloina o ia, ma o se tulaga lea na maofa ai fomai.

O Oketopa i le 2008, na sau ai Iñaki i le fale.

E tele ni mea ua matou aoaoina o se aiga e ala mai i lenei aafiaga. Ua matou iloa e alofa lo tatou Tama Faalelagi ia i tatou, ma Na te faia vavega ma faasaoina Lana Au Paia e tusa lava po o a faigata e ao ona tatou onosaia. Ma ua sili atu lo tatou malamalama i le faamoemoega o aiga e faavavau, le matafaioi taua o loo latou faia i le fuafuaga o le fiafia, ma le agalelei o lo tatou Tama Faalelagi i Ana fanau.

O le asō o i matou o se aiga ua suia, ua sili atu le lotogatasi ma sili atu le nofouta i puapuaga ma manaoga o i latou o loo siomia i matou—ona o lo ma atalii ma le vavega sa ia fatuina i o matou olaga.