Sa faia laei o tagata o le talafaasolopito faatusi paia, e tagata o le Ekalesia i Romania ma faatino ia tala e uiga i le Faaola, o le Liliuese, Iosefa Samita, ma le Tusi a Mamona i se polokalama faapitoa mo tagata o le au paia ma uo. O lea polokalama o se vaega o se sauniga e faamanatu ai le 20 tausaga talu ona faapaiaina Romania mo le talaiga o le talalelei.

Sa faia nei taualumaga ia Fepuari 2010 ma sa aofia ai ma se tauaofiaga sa faia i se nofoaga sa faapaiaina ai e Elder Russell M. Nelson o le Korama a Aposetolo e Toasefululua le laueleele i le 1990. O se vaega mai le tatalo na avea ma faavae mo le autu o le sauniga faamanatu, “O Romania: O Se Faailo o le Malamalama i Atunuu Tuaoi.”

“I le taimi o le faamanatuina, sa matou lagonaina le Agaga ma le fiafia o tagata i le avea ai ma se vaega o lenei galuega tele,” o le saunoaga lea a Vasile Doru, peresitene o le Itu o Bucharest Romania. “Ua matou tatalo uma ia le o toe mamao ae avea i matou o se siteki i Siona, ma ‘se faailo o le malamalama i atunuu tuaoi.’”

Ina ua maea le polokalama, sa vaevaeina tagata i ni vaega laiti ma tuuina atu i ai kopi o le Tusi a Mamona.

Sa mauaina talu ai nei e se ulugalii matutua faamisiona i Andrainarivo, Matakasa, le faailoga aupito maualuga o tagatanuu o le atunuu mo le la auaunaga fesoasoani mo tagata.

I totonu o le 18 masina o le la misiona, sa fesoasoani ai Elder Robert ma Sister Susan Bird, mai Fruit Heights, Iuta, ISA, e tuuina atu fesoasoaniga alofa, e aofia ai galuega faatino e tuuina atu suavai taumafa i tagata pe tusa ma le 100,000.

O le Minisita o Suavai i Andrainarivo, le afioga ia Nhiry-Lanto Hery Andrimahazo, sa tauaaoina atu ia i laua le Pine Taualoa ma tuuina atu upu faalaeiau e uiga i le Ekalesia, e faapea o faifeautalai i Matakasa ua amanaiaina o se vaega o tagata Malagasy.