O Le A Faamanuiaina Au e le Atua

Sa ou auauna atu i le ofisa o le Misiona a El Salvador San Salvador ae siitia loa au e le peresitene i se eria sa tapunia mo le tele o tausaga. O taitai o le paranesi iina sa le gata ina latou tatalo ma anapopogi ina ia toe foi atu faifeautalai, ae sa latou saunia foi mo lena aso.

Ina ua ou taunuu atu, sa tofu aiga uma o le paranesi ma ni uo o e sa saunia e talia faifeautalai. Sa faailoa atu maua e se tasi o tagata o le au paia i se tamaitai e igoa ia Ana Oviedo, o le sa faatauina atu ni fualaau aina ma ni meaai sa kukaina i le fale i se tasi tulimanu pisi o le nuu. A o faatau atu ana meaai iina i se tasi o taeao o se Aso Toonai, sa ma fesili atu i ai pe mafai ona ma asiasi atu ia te ia i lona fale ma faasoa atu se savali e uiga ia Iesu Keriso. Sa ia taliaina.

Ina ua ma taunuu atu i lena po, sa faatalitali mai Ana ma lana fanau e toafa ia i maua. Sa faailoa atu o ma igoa ma amata loa ona aoao i latou. Sa musuia i maua e aoao atu e uiga i faamanuiaga o le faapaiaina o le aso Sapati. Sa ma aoaoina foi le aiga e uiga i le sefuluai ma folafolaga sa faia e le perofeta o Malaki (tagai i le Malaki 3:10–12).

I le tali mai, sa fai mai Ana ua uma ona ia tapena mo le faatauina atu o meaai i le aso na sosoo ai, o le—Aso Sa—e pei ona sa masani ai. Ona matou faia lea o se tatalo, ma ole atu i le Tama Faalelagi e faamanuia lenei aiga lima vaivai, lea sa manaomia le tupe maua a le tina.

O le aso na sosoo ai na matou tetei lava i le vaaia o ia ua o mai ma lana fanau i le lotu. Sa matou faafeiloai ia i latou ma fesili atu i ai po o le a le mea na tupu i meaai sa ia saunia e faatau atu.

“Lua Susuga, sa ou faaaluina le po anapo e mafaufau loloto ai i folafolaga a le Atua,” o lana tala lea. “O le a Ia faamanuia mai ia te au.” Ona ia faaopoopo mai lea, “Lua Susuga, o fea e totogi ai la’u sefuluai?”

Sa ootia i ma’ua i le faaalia o lona faatuatua, ma sa matou tatalo ia tali mai le Alii i a ma’ua tatalo mo lenei aiga.

O le afiafi na sosoo ai, sa ma toe o ai i lona fale. Sa maligi ona loimata o le loto faafetai aua sa matuai faamanuiaina o ia e le Atua i lena aso. Sa ia faapea mai, sa ia faatauina atu ana meaai i lena tulimanu i lona olaga atoa—mai le Aso Gafua e oo i le Aso Sa, mai le 8:00 i le taeao e oo i le 6:00 i le afiafi—ma sa masani ona totoe mea e le taulia. Ae o lena Aso Gafua e ta ane le 1:00 i le aoauli ua taulia uma ana meaai.

Na tali mai le Tama Faalelagi i a maua tatalo. Sa faaauau pea ona faamanuiaina e le Alii ia Ana, ma sa le toe manaomia ona ia faatauina atu ni meaai i le aso Sapati. E lei umi ae papatiso lana fanau, ae sa le malie le toalua o Ana e papatiso o ia [Ana]. E ui i lea, sa tumau faamaoni lava o ia i le talalelei ma auai atu i le lotu seia oo i le aso na maliu ai o ia.

Ou te iloa e tausia e le Tama Faalelagi Ana folafolaga pe a tatou usitai ma o tatou loto atoa i Ana poloaiga.