Ina Ia Tatou Maua le Olioli

E le i umi lava se taimi ae ou iloaina o le a matuai ese lava la’u misiona mai le mea sa ou faamoemoe i ai. Sa ou feagai ma ni luitau sa lei faamoemoeina. Sa ou taumafai lava ia tumau lo’u mafaufau o le a lelei mea uma, ae sa masani ona lē taulau a’u taumafaiga, ma sa tuua ai au ma le lotovaivai. O le mea e faafetai ai, sa ou maua ni faamalosiauga i konafesi faalesone, lea e masani ona faamaeaina i se sauniga molimau.

Ou te manatua se tasi o konafesi faapitoa faalesone, ina ua tutulai taitoatasi faifeautalai i le pulelaa, ma faailoa mai le fiafia i le auauna ai i se misiona. A o faagasolo pea le fonotaga, sa amata ona ou lagonaina le le to’a lelei. Ua atoa le tausaga talu ona avea au ma se faifeautalai ae ou te le o lagonaina lava le olioli lea na faamatalaina mai e isi. Sa ou tuua lena konafesi ma lo’u loto mafatia ma le le mautonu, ma tuu fesili pe aisea lava ua ou alu ai i le misiona. O le a le mea na tupu ia te au? Aisea ua ou le lagonaina ai lena lava olioli e tasi? Mulimuli ane i lena po, sa ou faailoa atu ai o’u atugaluga i le Tama Faalelagi ma fesili atu ia te Ia pe faapefea ona ou lagonaina lea olioli.

I ni nai vaiaso mulimuli ane, a o ou auai i le konafesi faalesiteki, sa maua ai la’u tali i le lauga a lo’u peresitene o le misiona. E ui lava ina sa saunoa atu i le fiaselau sa i ai i le faapotopotoga, [ae] sa ou lagonaina sa ia saunoa tuusao mai ia te au. Sa ia saunoa e uiga i le olioli i le Faaolataga a Keriso lea e mafai e i tatou taitoatasi ona lagonaina i aso uma. Sa ia molimau mai e oo lava i taimi faigata ma le le mautinoa, e mafai ona tatou lagonaina le olioli i le malamalama i le taua o le Togiola a le Faaola.

Sa ou iloaina o na upu sa mo au. Sa tali mai le Tama Faalelagi i la’u tatalo. Atonu o la’u misiona sa lei tulaga mai i le mea sa ou mafaufau e oo i ai, ae sa alofa le Faaola ia te au ma sa togiolaina au agasala. Sa siomia au e le olioli lea sa ou manatu ou te lei lagonaina. Ae ona ou te lei tatalaina lo’u loto e lagona ai.

Sa faaauau pea ou luitau, ae o lenei aafiaga sa aoaoina ai au e mafai ona ou lagonaina le olioli e ala i lo’u filifili e tatala lo’u loto i le mana togiola o le Faaola, ma e ala i le faasoa atu o la’u molimau i isi e uiga i lena lava mana.

Talu mai la’u misiona, ua ou malamalama ai o tulaga ma siosiomaga e leai ni o latou aafiaga tumau i o tatou gafatia e lagona ai le olioli. Ae o le olioli moni, e sau mai le usiusitai ma le talitonu i le Tama Faalelagi ma Lona Alo, o Iesu Keriso, o e na foafoaina lenei olaga —ma le olaga a sau—“ina ia [tatou] maua le olioli” 2 Nifae 2:25