O Taumafaiga o Galuega Fesoasoani a le Ekalesia mo Tagata: O Au Soo i le Faatinoga

O suavai mo le taumafaina, kukaina, soifua maloloina, ma ua faaitiitia i le tele o vaega o le lalolagi vaita’i mo le fuiina o faatoaga. E masani lava ona maua mai nai kalone vai i se taimi mai vaitafe, vaituloto, po o vaieli papau ua faaleagaina i anufe ma faama’i. Ua tele taimi e faaaluina i le la’uina o vai ua taofia ai le tele o tagata matutua mai le tele o gaoioiga e maua ai meaai ma tupe semanu e fesoasoani e fafagaina ai le aiga.

O i latou o loo aofia ai i le galuega faatino a le Ekalesia mo le suavai mama, ua le gata e saunia ai tulaga o le saogalemu o le suavai ae ua fausia ai foi fale mo le faamamaina o le suavai ma fale le ta’ua, ma aoao ai faatinoga faavae o le soifua maloloina. E faalagolago i tulaga i le lotoifale, o le suavai mama e sau mai se punavai fou ua viliina i totonu o se papa, mai se vai sa eliina ua malupuipuia i se palasitika po o se apa ma ufiufiina, pe mai se vaipuna ua fausiaina lelei ma ta’i atu i paipa i se nuu.

O konekarate i le lotoifale e faamaeaina ia galuega faatino e faaaoga ai tagata o le a mauaina le suavai. O komiti o le suavai i le lotoifale e puleaina lea tulaga, ua mamanuina e faaauau ai pea mo tupulaga a sau. Sa saunoa Matt Heaps, o le pule o lea galuega faatino mo le suavai mama, e faapea, “O le mea moni, o a matou faatinoga e sili atu mo tagata nai lo le faatulagaga o le suavai. O mea uma lava e faia ma le naunautaiga e fesoasoani ai i tagata taitoatasi ma nuu ia faalagolago ia i latou lava.”

Talu mai le 2002, e 235 galuega ua faatino i totonu o atunuu e 54 ua maua ai le suavai mama mo le silia i le lima miliona tagata.

Mo i latou e le mafai ona feoai lava i latou, ua mauaina se nofoa faataavale, o se nofoa savali, po o se vae faapipii ua pei lava ua maua ni apaau. O a’oga, galuega, auai i sauniga lotu, fegalegaleaiga, ma le auauna atu i isi ua faafuasei nei ona mafai.

Ae paga lea, i le tele o vaega o le lalolagi, e oo lava i ni tootoo po o ni mea nei e faigofie ona maua, ua le maua pe taugata foi. E ala i le sauniaina o nei mea faigaluega, ua aveesea ai e Galuega Alofa a le Au Paia o Aso e Gata Ai se puipui faaletino sa taofia mai ai le tele o tagata mai le ausiaina o o latou gafatia. E ala i faiga faapaaga ma isi faalapotopotoga i le lotoifale ma le faatauina mai i falegaosimea pe a mafai, e faamautinoa e le galuega faatino mo nofoa faataavalevale o i latou e mauaina se nofoa faataavale e mafai ona maua ni togafitiga tulitatao, ma o tagata e i ai ni tomai po o sina tomai foi ia avanoa mo le galuega toefaaleleia o nei nofoa faataavalevale. I le iva tausaga ua mavae, e silia ma le 300,000 tagata ua mafai ona tele mea e feoai ai ona o lenei polokalama.

O nisi ua po le vaai i le lalolagi i aso nei e mafai ona togafitia, faasa’oina, pe puipuia foi mai le faaleagaina e ala i togafitiga faafomai. O galuega taulamua a le Ekalesia mo togafitiga o le vaai e galue e faaleleia le vaai ma puipuia faafitauli tau i fofoga e ala i le sauniaina o meafaigaluega ma aoaoga e auala mai i tagata tomai faapitoa mo ni vaitaimi pupuu. E tuu atu e nei tagata tomai faapitoa i fomai faapitoa i le lotoifale ia meafaigaluega, sapalai, ma aoaoga latou te manaomia e fesoasoani ai i a latou tagata mamai pe a tuua e tagata tomai faapitoa le atunuu. I Monokolia, mo se faataitaiga, o fomai i le lotoifale sa aoaoina e auala mai i galuega taulamua mo togafitiga o le vaai ua latou fatinoina nei e aunoa ma se totogi ia suesuega o le faamai e aafia ai fofoga ona o le ma’i suka.

O le uluai tagi a se pepe o se musika lea i se tina. Ae peitai e masani lava, i le tele o nofoaga, nai lo o se tagi ma se leo fiafia o se fomai po o se faatosaga, ua na o le filemu ona o se ala ea ua punitia. E matautia, aua e faaaoga ai se pamu e mitiina ai ala ea ma metotia o manava laveai ua faamaonia, o fomai, tamaitai fomai, ma faatosaga e masani lava ona mafai ona laveaiina ni pepe fou e feagai ma tauiviga na semanu e maliliu.

E faaaogaina e galuega taulamua a le Ekalesia ia aoaoga o le faamanavaina o pepe fou faatoa fananau mai (NRT) ia tagata tomai faapitoa faavaitaimi e aoaoina fomai i le lotoifale, o tamaitai fomai, ma faatosaga i metotia ia a le [NRT]. E manaomia e le polokalama ia tagata taitoatasi o loo auai e tuuina atu le aoaoga i isi tagata e auai i le faafananauina o pepe i o latou eria.

O lenei metotia o le aoao-o le-faiaoga e mafai ai ona vave oo atu le malamalama o le laveaiina o le ola ma sapalai i tuaoi o gagana ma aganuu. Ua faaleleia nuu o loo i ai falemai, ua le o toe matamata ma le leai o se faamoemoe i pepe fou ua fananau mai ma tauivi e fia manava, ma ua faamanuiaina aiga. O Liz Howell, o se taitai faamaopoopo o le soifua maloloina faavaomalo faatasi ma Galuega Alofa a le AAG, sa saunoa mai e faapea, “E moni lava o se polokalama e suia ai olaga ma laveaiina ai soifua.”

O faamai e le o toe tau faamatau i tamaiti i atunuu tau atiina ae o loo pepesi pea i le tele o atunuu. O le Misela o se tasi o mafuaaga muamua o loo maliliu ai tamaiti laiti, e tusa ai ma faamaumauga a le Faalapotopotoga o le Soifua Maloloina o le Lalolagi.¹

O loo tupu pea le fia ai ma le le paleni o meaai, ua aafia ai le atinaega o le malosi o le tino ma le mafaufau o tamaiti ma faatuputeleina ai lo latou aafia gofie i faamai e pei o misela. E tusa ai ma faamaumauga a le Faalapotopotoga o Meaai ma Faatoaga a Malo Aufaatasi, “o le le lava o meaai ma le le lava o vaitamini manaomia ma minerale ua maliliu ai le silia ma le lima miliona tamaiti i tausaga uma.”²

I le 2003 sa auai ai le Ekalesia i Galuega Taulamua mo le Misela ma Faiga Faapaaga faavaomalo. E faaopoopo atu i saofaga tau tupe, o loo faatinoina e le Ekalesia se matafaioi taua i le tuufaatasia, faalauiloaina, ma taitaia le faia o tui puipui i le lotoifale e faaaoga ai volenitia a le Ekalesia. E talu mai le 2003, pe tusa ma le 56,000 tagata o le Ekalesia ua tuuina atu le silia i le 600,000 itula o auaunaga i atunuu e 32. E talu mai le 2001, sa faia ai e le Galuega Taulamua mo le Misela ma Faiga Faapaaga [Measles Initiative and Partnership] ia tui puipui mo tamaiti ma le au talavou e 600 miliona. O tamaiti maliliu i Misela i le lalolagi atoa ua faaitiitia mai le 750,000 i le 2000 i le 197,000 i le 2007.³

O taumafaiga o galuega fesoasoani a le Ekalesia mo tagata e aofia ai fesoasoaniga e fafaga tagata fiaaai. O le fiaai faifai pea ma le le soifua maloloina lelei o tamaiti ua taulai foi i ai se vaega o galuega taulamua mo meataumafa ua aoaoina nuu i tua ma nuu i le taulaga i le auala e toto ai fualaau aina ma tausia ni manu laiti mo polotini. O le tele o metotia ua aoaoina o loo faavae i suesuega i le tele o tausaga a le Benson Institute, lea na avea o se vaega o Galuega Alofa a le Au Paia o Aso e Gata Ai i le 2007.

Sa saunoa le pule o galuega taulamua o Wade Sperry e faapea a faaleleia le soifua maloloina faaletino o tagata, o le a faaleleia foi lo latou soifua maloloina o le mafaufau ma le agaga.

Pe a latou vaaia mafatiaga ma tulaga e manaomia i le lalolagi, e naunau ma le alofa lava soo o Keriso e fesoasoani. O nei galuega taulamua o fesoasoani mo tagata ua tuuina atu se auala faatulagaina lelei ma aoga mo tagata o le Ekalesia e galulue ai i o latou naunautaiga e mulimuli i le poloaiga a le Faaola: “E moni, e moni, ou te fai atu ia te outou, o la’u talalelei lenei; ua outou iloa foi mea e tatau ona outou faia i la’u ekalesia; aua o galuega na outou vaai i ai ua ou faia, ia faia foi e outou; aua o mea ua outou vaai mai ua ou faia, o mea lava ia tou te faia” (3 Nifae 27:21).