E Mafai Ona Ta Tatalo Faatasi?

“O le a ou toe foi mai i ni nai minute,” o le tala lea a lo’u tamā Taialani sa vaaia au a o alu atu i fafo o le faitotoa i luma. O le mea lena, sa ou manatu na ia fai mai ai. Sa le lelei tele lo’u malamalama i le gagana Taialani.

Sa ou nofo i Taialani mo le tusa o le fa masina o se volenitia e auauna atu i le nuu, ma e ui ina mafai ona ou tautala i le gagana Taialani faigofie, ae sa tele lava mea na tatau ona ou aoao i ai. E lei leva ona suia lau eria, ae ua iloa e lo’u aiga fou sa ou nofo ai o au o se tagata O Le Ekalesia a Iesu Keriso o le Au Paia o Aso e Gata Ai. Sa ou faia le mea sili e faamatala atu ai o’u tulaga faatauaina ma sa ou tuuina atu foi i le aiga se Tusi a Mamona FaaTaialani ma se tamaitusi o le Mo Le Malosi o le Autalavou.

A o ou faatali mo le toe foi mai o lo’u tama sa ou nofo ai, sa ou saofai i le fola o le potu malolo ma amata ona ou suesue i le tusi o fuaitau faaTaialani. Na faafuasei lava, ona oo mai se lagona malosi ou te valaaulia o ia ma te tatalo faatasi. Na oo muamua mai le lagona ou te fai i ai, ae sa lei malosi naua lea uunaiga. A o ou i ai i Taialani, sa tele ni taimi sa ou faasoaina atu ai le talalelei, ae ou te lei fai atu i se tasi ma te tatalo faatasi.

Sa lelei le ma va ma lo’u tama sa ou nofo ai. Sa ou valaauina foi o ia ia “Tama,” lea sa foliga mai sa ia talisapaia. Sa ou lagona le fiafia ona amata ai lea ona ou popole. Ae faapefea pe a fai mai o ia e leai? E faapefea pe a ia le lagonaina le talitonuina o au i le taimi atoa o le a ou nofo ai i lona aiga? Pe tatau ea ona ou faia lenei mea ma faaleagaina ai le ma mafutaga? O le mea na atili leaga ai, ou te lei iloa tatalo i le gagana Taialani. E lei lava lo’u iloa [o ni upu faaTaialani] e fai atu ai i lo’u tama sa ou nofo ai e tatalo, o lea sa ou ole ai i lo’u Tama Faalelagi mo se fesoasoani.

E le i umi lava, ae ou faalogoina loa se pa’o tele a o tapuni mai le faitotoa o le pa. A o ulufale mai lo’u tama sa ou nofo ai, sa ia faafeiloai mai ia te au ma fai mai o le a alu e moe. Sa ou iloa e le mafai ona ou misia lenei avanoa. A o matala lo’u gutu ou te tautala atu, sa vave lava ona ou iloa upu e fai atu ma le ta’uga i le gagana Taialani.

“Tama, i Amerika sa masani ona matou tatalo faatasi ma lo’u aiga, ma ua ou misia lava le faia o lea mea. E mafai ona ta tatalo faatasi?” Sa ou te’i lava i lana tali.

“Jon,” o lana tali lea, “ioe e mafai. Aoao mai ia te au le ala e fai ai.”

O lea sa ou faamatala atu ai i le gagana Taialani le uiga o le tatalo, ae sa ou filifili e fai la’u tatalo i le faaPeretania. Sa ou iloa na faafofoga mai le Atua, ma sa ou iloa foi sa lagonaina e lo’u tama sa ou nofo ai le Agaga. Sa maligi o’u loimata a o ia faataitai mai i le faaiuga o la’u tatalo i le “amene.”

E le mafai ona ou faamatalaina i upu le olioli ma le alofa sa ou lagonaina mo lo’u tama sa ou nofo ai ma lo’u Tama Faalelagi. O lena aafiaga sa tuuina mai ai ia te au le to’a ma oo atu ai i le tele o aafiaga i le faasoaina atu o le talalelei i isi. O le mea e faanoanoa ai, sa lei taliaina lava e le aiga sa ou nofo ai la’u valaaulia matou te lolotu i le paranesi i le lotoifale, ae ua ou iloa o le malamalama sa ou faasoaina atu ia i latou o le a aoga ia i latou i se taimi e le o toe mamao, pe mulimuli mai foi.

E ui ina tatou le vaaia i taimi uma fua o a tatou galuega i lenei olaga, ae sa ou aoaoina o le totoina o fatu o le talalelei e mafai ona faamanuiaina ai e le itiiti ifo i le tasi se olaga—o oe lava. Ma i le taimi a le Alii lava ia, o le a mafai ona faamanuiaina ai e na fatu ia olaga o isi.