O La’u Lava Tusi a Mamona

Ia Aokuso 2005, ina ua tuuina mai e Peresitene Gordon B. Hinckley (1910–2008) se lui i tagata o le Ekalesia e faitau le Tusi a Mamona ae lei uma le tausaga, sa ou folafola ia te au lava ia o le a ou faitauina atoa le tusi. Sa ou masani i tala i le Tusi a Mamona ae ou te lei faitauina atoa lava. O lea la ua ou manao ai e tausi la’u folafolaga.

Sa aoaoina au e faaaoga ia mau i lo’u olaga ma avea ma sa’u lava meatotino. Ma a o ou faitauina, sa ou tusia i tulimanu o itulau le manatu autu sa ou mafaufauina o le uiga lea o le fuaitau. Sa ou vasevaseina foi upu ma faaupuga na ta’ua soo e faaalia ai le faamamafa.

Sa ou tuuina lo’u igoa i autafa o igoa i mau e fesoasoani e faamanatu mai ia te au o le afioga a le Atua na fetalai atu i isi e mafai foi ona avea ma afioga ua fetalai mai ia te au. Mo se faataitaiga, i le 2 Nifae 2:28 sa ou tusia ai lo’u igoa: “O lenei foi, [Hillary], ou te loto ina outou vaai i le Puluvaga sili, ma ia outou faalogo atu i ana poloaiga sili.” O le tele lava ona ou faia ia avea le Tusi a Mamona ma au lava tusi, o le tele foi lea o lo’u naunau e faitauina i aso uma.

A o ou faitauina i aso uma, na faapea ona loloto ma patino a’u tatalo. Na mafai foi ona ou taulai atu i au vasega ma mulimuli i uunaiga a le Agaga Paia e faauo atu i isi. I le po mulimuli o le tausaga, na uma ai ona ou faitauina le Tusi a Mamona.

Ona ou malamalama ai lea i le taua o le faitauina atoa o le Tusi a Mamona, faapea foi ma isi tusitusiga paia, ma sa ou manao ai ina ia ou faitauina faafia i lo’u olaga.