Ua Faailogaina e le Aufaipese a le Tapeneko le Taimi na Uluai Pueina ai Musika

Ua atoa i lenei masina se seneturi, talu ona uluai pueina le Aufaipese a le Tapeneko Mamona ma le okeni i le Tapeneko i le Lotoa o le Malumalu. I le faailogaina ai o lenei aso taua, ua faalauiloa mai ai e le aufaipese se seti o CD e tolu, 100: Celebrating a Century of Recording Excellence, [Faamanatuina o se Seneturi o Musika Maoae na Pueina], e aofai ai musika mai le talafaasolopito o le 100 tausaga o musika na pueina.

O le aso, e toatele o le a ioe faatasi ma le faatonu lauiloa o Eugene Ormandy, o le na saunoa e faapea, “O le Aufaipese a le Tapeneko o le aufaipese sili ona maoae lea i le lalolagi.”¹ Ae i le tele o nai tausaga muamua talu ona tuufaatasia i le ogatotonu o le seneturi lona 19, sa le i lauiloa lava le Aufaipese a le Tapeneko ona e toaitiiti lava tagata i le lalolagi sa faafofoga i ai a o pepese. Ae i le 1909—ua 32 tausaga talu ona muai fausiaina le fonakarafi—sa malie ai le Kamupani Fonakarafi i Kolumipia e taumafai e pueina leo maoae malualii o le aufaipese ma le okeni. O se galuega faigata tele ona o le le lava o mea tau tekonolosi i lena taimi, sa lelei lava mo tagata e pese taitoatasi ae i le aotelega sa le i lelei e pueina ai se tulaga lelei atoatoa o ni vaega tetele.²

E silia ma le tolu aso i le faaiuga o Aokuso ma le amataga o Setema 1910, o Alexander Hausmann, o le inisinia i le pueina o pese sa vaavaaia le galuega, na tautauina ni pu uumi se lua e pueina ai pese “mai ni maea e toso mai le tasi itu i le isi itu, o logo e tatagi tele mai pu ia e lua—o le isi e pue ai le leo usu ma le oloto, o le isi mo le tena ma le malu.”³

Sa lipotia mai e le Salt Lake Herald sa faia e Mr. Hausmann ni pu’ega se 25: e 12 pese na saunia e le aufaipese, e 10 na saunia e le taokeni a le Tapeneko o John J. McClellan, e 2 na saunia e Uso McClellan ma le tavaiolini o Willard E. Weihe, ma le tasi na saunia e le taokeni muamua a le Tapeneko o Joseph J. Daynes Sr.⁴

E le o iloa pe o le a le tele o lipine sa taulia pe o le a foi le mamao na tufatufaina i ai, ae sa lelei le tali mai o tagata lautele. O J. A. Vernon, o se faifeautalai sa tala’i i Larned, Kansas, ISA, sa lipotia i se tusi na lolomiina i le Improvement Era o Fepuari 1911: “E lei leva atu sa matou mauaina ai ni lipine fonakarafi o loo i ai viiga ma pese taitoatasi a le Aufaipese a le Tapeneko ma le okeni. A o faalogo atu i ai o tata mai, e tuufesilisili solo tagata i le fia iloa, ua matou maua ai le tele o avanoa e faamatala ai le tele o aoaoga faavae o le talalelei.”⁵

Talu mai na uluai vaega o puega muamua i le 1910, ua faalauiloa ai e le Aufaipese a le Tapeneko le silia i le 175 lipine, e aofia ai lipine e lua e silia ma le tai miliona kopi na faatauina. O se tasi o lipine a le Aufaipese na mauaina le faailoga o le U.S. Grammy Award i le 1959, ma le isi lipine sa mauaina ni faailoga se lua mo le Grammy i le 2007. E ui i lea, e sili atu le taua nai lo faailoga ma faaaloaloga, le aafiaga o musika a le aufaipese i le au faafofoga. E tusa lava po o le a le suiga vave o tekonolosi i le seneturi ua mavae, o musika ua pueina e le aufaipese o loo faaauau pea ona uunaia ma musuia, e pei lava ona i ai i le 1910.