Sa Manaomia e Simi La’u Fesoasoani

E lei leva ona ma faaipoipo i le Malumalu o Sate Leki, ae ma nonofo loa ma Simi i se tamai fale mautotogi i le talafatai o Oregon. Sa avea Simi o se enisinia a le malo e tusia faafanua o eleele, e nafa ma le siakiina ma le faasa’oina o se faafanua o le talafatai o Oregon. O taeao taitasi e o ai ma se isi enisinia e faaauau le galuega o le aso ua mavae. O lana galuega sa faigata aua sa togavaoa atoa le talafatai.

I se tasi afiafi a o ou sauni e amata le kukaina o le meaai o le afiafi, sa malosi lava se uunaiga i lo’u mafaufau e le taua a’u sauniuniga o le meaai o le afiafi. O le a le sau Simi i le fale mo le meaai i lena po. Na sosoo mai ma se isi manatu: Ua tupu se faalavelave ia Simi ma sa ia manaomia la’u fesoasoani!

Ou te lei faalogoina se leo, ae sa matuai manino lava le oo mai o le feau i lo’u mafaufau na pei lava na tautala mai se leo. E tatau ona ou fesoasoani atu ia te ia, ae o gafea o i ai o ia? Sa faigaluega i aso taitasi i le itu i gatai, ae sa matuai ou le iloaina po o gafea sa galue ai i lena aso. Sa musuia au ou te oso i le taavale ma ou ui atu i le auala autu, ae o fea le itu ou te alu i ai? Faatasi ai ma sina le mautonu laitiiti, sa ou lagonaina e tatau ona ou liliu i le itu i saute. Sa ou pasiaina le tele o auala sopo i autafa o le ala, o se tasi o nei auala e mafai ona avea ma eria sa galue ai Jim.

Sa uunaia au ou te aluese mai le auala autu ae mulimuli atu i se tasi o auala e tasi le ituala. Sa timu, ma ina ua tea se maila se tasi pe lua, sa amata ona palapala le auala. Sa tonu ia te au e sili ai lo’u toe foi. Sa amata foi ona pogisa, ma sa ou mafaufau, “Sa ou faavalevalea i lo’u sau fua.”

E lei leva lava ona ou afe atu i le auala tele autu, ae ou tau atu i ni enisinia se toalua ua vaivai ma ua leai ni faamoemoe, sa matuai lilofia i le palapala ma na semanu e leai ma se isi na te fia pikiina i laua. Fai mai Simi ma lana soa faigaluega, na paulia le la pikiapu i se lua palapala. Sa la taumafai e toso ese mai ae na iu lava ina la tuua ae sopo mai loa i le togavao e tau mai i le auala tele autu.

“Na faapefea ona e iloa le mea sa ma i ai?” sa la taufai ofo ai ma faafetai ina ua ou maua i laua. Sa faapena foi la’u faafetai a o ou faamatala atu i ai na taialaina au e le Agaga.

A o ma tootutuli ma Simi i le tatalo i lena afiafi, sa ma tuuina atu le faafetai mo le uunaiga a le Agaga Paia, lea na oo mai ia te au i se tali o talosaga a lo’u toalua mo se fesoasoani.