O Le Lipoti i le Lalolagi, o se polokalama o talafou faaleafatausaga a le Ekalesia e otooto mai ai mea maoae na tutupu i le Ekalesia i totonu o le ono masina ua mavae, o le a faasalalauina i le ea i gagana e 19 i le Aso Toonai, 2 o Oketopa, ma le Aso Sa, 3 o October, 2010, i va o sauniga o le konafesi aoao i le ala satelite lava e tasi. Afai e le maua le polokalama i le gagana i le lotoifale, o le a faasalalauina i le faaPeretania. O Le Lipoti i le Lalolagi o le a maua foi i DVD i faletusi tutotonu ma luga o le initoneti i tuatusi o le lds.org/videos ma le newsroom.lds.org.

O le Au Paia o Aso e Gata Ai i le lalolagi atoa ua faaaogaina le Initoneti ua mafai ona maimoa ma faafofoga i le tele o faasalalauga a le Ekalesia mai nai tausaga ua tuanai. O tagata e asiasi atu i saite o faasalalauga a le Ekalesia, le lds.org/broadcast, o le a mauaina se faamaumauga o mea na tutupu e aofia ai konafesi aoao, sauniga aoao a le Aualofa, sauniga aoao a Tamaitai Talavou, faeasaite a le Ofisa o Aoaoga a le Ekalesia, sauniga lotu o le Kerisimasi a le Au Peresitene Sili, ma isi. O le taimi nei e tatau ona faaaogaina e le saite le faaPeretania, ae o le tele o otio ma nisi vitio o loo maua i le tele o isi gagana.

Ua saunia e le Potutusi o Talafaasolopito o Aiga ni vasega se valu o suesuega o talafaasolopito o aiga i luga o le initoneti i le tuatusi, familysearch.org (kiliki i le Free Online Classes). E tele ni lesona e faia i nei vasega, i vitio po o mamanu pdf, e aoao ai mea patino i suesuega o talafaasolopito o aiga i atunuu e pei o Egelani, Siamani, Aialani, Italia, Mekisiko, Rusia, ma le Iunaite Setete. E fitu vasega e faaPeretania ma le tasi e faaSipaniolo. O le a faaopoopo isi gagana i le lumanai.

Sa auai tamaitai talavou mai le paranesi a Kathmandu i le Misiona a New Delhi Initia, i le latou uluai polokalama o le Amataga Fou ia Aperila 2010. E toalima tamaitai talavou ma o latou tina sa auai a o tuuina atu fautuaga musuia e le au peresitene o le paranesi, le peresitene o Tamaitai Talavou, ma isi taitai o le autalavou. Sa aoaoina tamaitai talavou e uiga i le polokalama o le Alualu i Luma o le Tagata Lava Ia, faataunuuina o a latou sini faatasi ai ma le fesoasoani a o latou aiga, ma le taua o le fausiaina ma le faamalosia o a latou molimau patino.