Vavega i se Moli Faasino Taavale

A o ma savavali atu ma la’u soa faifeautalai o Elder Platt, i totonu o se maketi i magaala o Taichung, Taiwan, sa ma tutu i le fetaulaiga ala autu ma faatalitali i moli lanu mumu. E lei leva ona ma tutu, ae ou faalogoina loa se pao masani i o ma tua atu. A o agai mai nisi sikuta i o ma talaane, sa ou faliu atu e vaai pe o ai se isi e mafai ona ma talanoa i ai. I lena taimi sa faatumulia lo’u loto ma lo’u mafaufau i se musumusuga manino. Sa leai se leo sa tautala, leai ni upu na faia, ae sa ou lagonaina le uunaiga e tatau ona ou talanoa atu i le alii sa i luga o le sikuta sa le mamao mai i lo’u itu agavale.

Sa ou minoi faatopetope loa e talanoa atu i lenei alii. Sa pei lava sa tulei mai au e se isi ma faaminoi ou vae. Sa tatala lo’u gutu ma fesili atu i lenei alii, “E manuia lou aso?” Sa tilotilo mai o ia ia te au ma tali mai e le o manuia lona aso. I lena lava taimi na sui ai le lanu o le moli mai le lanu mumu i le lanu meamata, ma na pei ai e nofo lo’u fatu. Sa ou popole ina nei alu ese atu le alii. E leai se upu ua ou fai atu ia te ia e uiga i le Toefuataiga o le Ekalesia moni ma le ola a Iesu Keriso, i le Perofeta o Iosefa Samita, po o le Tusi a Mamona. Ou te lei ta’uina foi i ai le igoa o le Ekalesia.

Sa amata ona o ese atu tagata sa i o ma talaane, ae sa lei alu lea alii. Sa ia fautua mai matou te faasee i autafa o le auala matou te talanoa atili ai. Sa ou tei, ae sa ou usitai ma le agaga faafetai i lana fautuaga. I autafa o le auala, sa ma faasoa atu i ai ma Elder Platt le igoa o le Ekalesia ma isi lava mea e tele.

I nai vaiaso mulimuli ane, na papatisoina ma faamauina ai lena alii o Su Meng-Wei, ma ona atalii e toalua ma ona afafine e toalua e avea o ni tagata o Le Ekalesia a Iesu Keriso o le Au Paia o Aso e Gata Ai.

Mai lena aafiaga, sa ou aoaoina ai afai tatou te taumafai ma le faamaoni e fai le galuega a le Alii i Lana Ala ma i Lana lava taimi atofaina, e i ai taimi tatou te maua ai le avanoa e molimauina ai ni vavega. Na folafola mai le perofeta o Moronae “a ua fai pea le Atua ma Atua o vavega. Faauta, po ua le ofoofogia ea i la tatou vaai o mea ua uma ona faia e le Atua?” (Mamona 9:15–16). E mafai ona oo mai vavega i le pa’i atu i loto ma le suia o olaga.

O loo i ai i le Tala’i La’u Talalelei le folafolaga lenei i faifeautalai ma tagata o le Ekalesia: “O loo sauniaina e le Alii ia tagata e taliaina outou ma le talalelei toefuataiina. O le a Ia taitaia outou ia i latou pe o le a Ia taitaiina mai foi latou ia te outou. … O na tagata o le a latou iloaina o outou o auauna a le Alii. O le a latou naunau e tali atu i la outou savali”¹ E le i faafuasei ona ma i ai tonu ma Elder Platt i na moli patino faasino taavale.

E silafia ma e alofa le Tama Faalelagi ia i tatou taitoatasi. I se auala e le tupufua, ua Ia saunia ai se ala mo i tatou uma tatou te iloa ai le talalelei toefuataiina. Sa silafia lelei e le Alii ia luitau ma faafitauli o le olaga o Su Meng-Wei. Sa Ia silafia na lei leva ona le toe faigaluega ia Su Meng-Wei. Sa Ia silafia sa i ai upu faatiga na tautalagia i totonu o le aiga o Su i lena taeao.

Ua aumai e le talalelei le filemu sili atu i le aiga o Su ma ua faamalosia ai o latou sootaga faaleaiga. Ua fesoasoani ia i latou i le mauaina o le fiafia sili atu ma taitaiga i le olaga. Ua latou maua le malosi e taulima ai luitau o le olaga faatasi ai ma le faamoemoe e aunoa ma le mata’u.

Atonu o le a tatou le muai vaaia, ae o i latou o e ua sauniaina o le a latou iloa o i tatou o auauna a le Alii. O le a latou matauina se mea e ese e uiga ia i tatou. O le a latou iloa le lelei ma o le a mananao e fia iloa atili e uiga i ai. A o latou lagonaina le Agaga Paia, o le a latou naunau e tali mai i la tatou savali. E pei lava o lenei savali lea na pai atu i loto ma suia ai olaga o le aiga o Su i Taiuani, e mafai foi ma o le a faapena foi ona pai atu i loto ma suia ai olaga o i latou tatou te iloa, po o fea lava o le lalolagi o loo tatou i ai.

Ia tatalo mo le taitaiga, e mafai ona tatou fesili ia i tatou lava i aso uma i lenei fesili: o ai ou te iloa ua saunia e le Alii ia maua le malamalama o le talalelei toefuataiina? O le galueaiina o lo tatou faatuatua i lenei faiga, o le a tatou saunia ai e mulimuli i uunaiga a le Agaga Paia ma tatala o tatou gutu e faasoa atu upumoni faapelepele ua faamanuiaina tatou e iloa.

E mautinoa lava e mulimuli mai avanoa ofoofogia.