O Le Tusi a Mamona o se Taiala Patino

Tatou te lagona uma lava, i o tatou taimi sili ona lelei, se manaoga e toe foi e nonofo faatasi ma le Atua. Na Ia tuu mai ia i tatou le meaalofa o Lona Alo Pele e avea ma o tatou Faaola e saunia le ala ma aoao i tatou i auala tatou te mulimuli atu ai. Na Ia tuu mai ia i tatou perofeta e faasino maia le ala. Na musuia le Perofeta o Iosefa Samita e faaliliuina ia faamaumauga a perofeta o le Tusi a Mamona lea. O la tatou taiala mautinoa lea i le toe foi atu i le Atua.

Na saunoa mai Iosefa Samita e uiga i lena tusi taua, “Na ou tauina atu i le usoga o le Tusi a Mamona o se tusi silisili ona sao i tusi uma lava o i le lalolagi, ma o le maa autu o la tatou ekalesia, ma e sili atu ona latalata le tagata i le Atua e ala i le usitaia o mataupu [o le Tusi a Mamona], nai lo se isi lava tusi.”¹

O aoaoga a le Tusi a Mamona o poloaiga ia a le Atua ua tatou mauaina ai i totonu. O nisi o poloaiga tuusao mai le Faaola e ala mai i Ana perofeta ma e faatatau i mea e tatau ona tatou faia ma mea o le a avea ai i tatou. O le Tusi a Mamona ua tuuina mai ai ia i tatou le faataitaiga a le Faaola ina ia faateleina ai lo tatou faatuatua ma le naunautai e usitai i Lana poloaiga e mulimuli atu ia te Ia. Ua faatumulia le tusi i mataupu a Keriso e taialaina ai i tatou. O se faataitaiga lea mai le 2 Nifae:

“Na fetalai atu foi [Iesu] i le fanauga a tagata: Ina mulimuli mai ia outou ia te au. O lenei, ou uso pele e, e mafai ea ona tatou mulimuli atu ia Iesu, pe a fai tatou te le loto ina tausi i poloaiga a le Tama?

“Ua fetalai mai foi le Tama: Ia outou salamo, ma ia papatisoina outou i le suafa o lo’u Atalii Pele” (2 Nifae 31:10–11).

Ua tau manino mai e le tusi e tatau ona tatou taliaina le Agaga Paia o se papatisoga i le afi ina ia fesoasoani ia tatou tumau ai i le ala sao ma le vaapiapi. Ua aoaoina i tatou e ao ina tatou tatalo e le aunoa i le suafa o Keriso, aua le faavaivai, ma pe a tatou faia faapea, o le a tatou maua le folafolaga lenei: “O le mea lea e tatau ai ona outou fetaomi atu i luma ma le faamaoni ia Keriso, ina ua i ai le faamoemoe atoatoa lelei, i le ma le alofa atu i le Atua atoa ma tagata uma. O lea, afai tou te fetaomi atu i luma, o fiafia i le afioga a Keriso, ma tumau lava e oo i le iuga, faauta, o loo faapea ona fetalai mai le Tama: Tou te maua le ola faavavau” (2 Nifae 31:20).

Ua ta’u manino mai e le Tusi a Mamona i le lauga matagofie a le Tupu o Peniamina le uiga o le i ai o le alofa o le Atua atoa ma tagata uma. A suia o tatou uiga e ala i le mana o le Togiola ma e ala i lo tatou usiusitai i poloaiga, o le a faatumulia i tatou i le alofa o le Atua (tagai Mosaea 4:1–12).

Ua faamautinoa mai foi ia i tatou e le Tusi a Mamona, e mafai ona tatou matua mama i lenei olaga ma tatou le toe fia faia ai le amioleaga (tagai Mosaea 5:2). O lenei faamoemoe tatou te maua ai le lototele ma le mafanafana a o taumafai Satani e faaosooso ma faalotovaivai i tatou i lo tatou ala.

O taimi taitasi ou te faitau ai e tusa lava pe na o ni nai laina i le Tusi a Mamona, ou te lagonaina le faamalosia o la’u molimau e moni le tusi, o Iesu o le Keriso, ma e mafai ona tatou mulimuli ia te Ia e toe foi atu ai, ma e mafai ona tatou o ma ave ē pele ia i tatou. Ua avea ma tusi o tusi ia te au. O le afioga a le Atua.

Ou te tatalo ina ia tatou feinu ai faatasi ma e pele ia i tatou i aso uma. Ou te molimau atu ai i le suafa o Iesu Keriso, o se taiala moni lava.