E roaa i te mau taata atoa te mau haamaitairaa o te Autahu‘araa

I to Iosepha Semita iritiraa i te Buka a Moromona, ua hiti mai te hoê uiraa i roto ia’na e ta’na papa‘i parau o Oliver Cowdery. Ua haere atura raua i roto i te uru raau no te pure. A pure ai raua, « ua fâ maira te hoê ve‘a no te ra‘i mai na roto i te ata maramarama ». Teie ve‘a, o Ioane Bapetizo ïa. Ua tuu atura oia i to’na rima i ni‘a i te upoo o Iosepha e Oliver e ua horo‘a atura ia raua i te Autahu‘araa a Aarona. Ua faaue atura Ioane Bapetizo ia Iosepha e ia Oliver ia bapetizo raua ia raua. I te hoê tau poto i muri mai, ua pou mai na aposetolo Petero, Iakobo e Ioane i ni‘a i te fenua nei no te faatoroa ia Iosepha raua Oliver i te Autahu‘araa a Melehizedeka. Tei ni‘a faahou i te fenua nei te autahu‘araa a te Atua. (A hi‘o Iosepha Semita—Aamu 1:68–72).

Na roto i te autahu‘araa e nehenehe ta tatou e farii i te mau haamaitairaa faahiahia e te mau oro‘a atoa. I roto i teie mau haamaitairaa, te haamaitairaa ïa i te mau aiû fanau apî, i te taata ma‘i e i te mau tamarii tei horo‘ahia e to ratou na metua tane e aore râ e te tahi atu feia e mau nei i te autahu‘araa. E ti‘a atoa ia tatou ia farii i te tahi mau oro‘a no te autahu‘araa no te ho‘i atu i te Metua i te Ao ra. Te tahi o teie mau oro‘a, o te bapetizoraa utuhi ïa, te fariiraa i te horo‘araa i te Varua Maitai e te mau oro‘a mo‘a no te hiero e nehenehe e taati i te mau utuafare e a muri noa’tu. I roto atoa i te hiero, e nehenehe e ravehia te mau oro‘a na te feia tei ma‘iri e tei ore i farii i te mau haamaitairaa o te evanelia. E roaa i te mau taata atoa te mau haamaitairaa o te Autahu‘araa !