Eaha ta’u e ma‘iti, te ohipa e aore râ te Ekalesia ?

Ua faaipoipo maua ta’u vahine i te matahiti 1981 i te hiero no Tokyo Japon. I muri mai i te faaipoiporaa, e ere to maua oraraa i te mea ohie roa i te omuaraa. Ua mauruuru roa vau i te raveraa i te ohipa, ua fifi noa râ maua i te pahono atu i ta maua mau haamau‘araa. Ua ani maua i te Metua i te Ao ra i te tauturu e ua rave maua tei noaa ia maua no te tape‘a ia tae i te hopea ava‘e ma te aufau atoa i ta maua tufaa ahuru. Ua ite maua e, mai te mea e tiaturi maua i te Fatu, Na’na e faafana‘o mai.

I te hoê hepetoma, ua faaite mai ta’u vahine e te tahi hoa i te tahi api parau tei tapupuhia i roto i te ve‘a papa‘i. E parau faatiani te reira no te hoê ohipa ei orometua haapii reo peretane.

Ua hapono vau i ta’u parau tuaoraraa (CV) i te taiete e ua titauhia mai au no te hoê uiuiraa. I te otiraa te uiuiraa, ua parau mai te taata uiui e, « Ua papa‘i oe i roto i ta oe parau tuaoraraa e, ua horo‘a oe i to oe taime no te tavini ei misionare no Te Ekalesia a Iesu Mesia i te Feia Mo‘a i te mau Mahana Hopea Nei. Te auraa ra, te haere nei oe i te pureraa i te mahana sabati, e ere anei ? Ahani e ma‘iti oe, e haere i te pureraa e aore râ e haere i te ohipa i te mahana sabati, eaha ta oe e ma‘iti ? »

E uiraa fifi roa teie no te mea ho‘i ua hinaaro roa vau i te hoê ohipa maitai a‘e. Atira noa’tu, ua pahono vau, « e haere au i te pureraa ».

Ma te ataata rii, na ô mai nei te taata ui e, « Na reira ïa ». I reira, haamauruuru mai nei oia ia’u e parau papû mai nei e, e rave te taiete i ta’na faaotiraa i tera ra pô e na’u e taniuniu no te faaroo i te parau apî. I to’u haereraa i rapae i te piha, ua mana‘o roa vau e, aita vau i manuia.

I tera ra pô, i te hora no te taniuniuraa, ua patapata vau i te numera o te taiete ma te ri‘ari‘a rahi.

« Eaha atura te parau apî no te uiuiraa ? » Ua ani au i te papa‘i parau. « Aita vau i manuia, e ere anei ? »

Ua maere roa vau e te oaoa ho‘i i ta’na pahonoraa.

Na ô mai ra oia e, « Te hinaaro nei matou ia ani ia oe ia ohipa no matou ».

Hoê ava‘e i muri mai, ua ite a‘era vau e, no te aha vau i farii ai i teie ohipa. Ua faataa mai te papa‘i parau e, te taata uiui, te ora nei oia i te hoê fare fatata noa i te mau misionare tamau no te Ekalesia. Ua hi‘o pinepine oia i te mau misionare i te taahi-itoito-raa i to ratou pereoo taataahi no te haere i ta ratou ohipa i te po‘ipo‘i.

« Ua tiaturi oia e, no te mea tei roto atoa oe i tera ekalesia, e ohipa itoito atoa oe mai teie mau misionare i ohipa no ta ratou ekalesia », ta’na ïa parau. « Ua fana‘o oe ! »

Mai te reira â taime, ua nava‘i noa to maua nei utuafare i te mea e au no matou.

Ia feruri ana‘e au i teie ohipa ma‘itiraa, e tae mai te itoito e te tamahanahana. Ua ite au e, e faaohipa pinepine te Atua i te tahi atu taata no te haamaitai i Ta’na mau tamarii. Eita e nehenehe ta’u e faaite hope roa i te mauruuru i to’u nei aau no ta’u vahine e to’u hoa, no to raua faaûruraa ia faaite mai i teie api faatiani ia’u, no teie mau misionare itoito rahi e to raua hi‘oraa maitai roa, e no to tatou Metua i te Ao ra tei î i te aroha e te here e te mana‘o aupuru, tei Ia’na ra te puai maere no te faariro i ta tatou mau iteraa ei maitai no tatou.