No reira mai au

Na mua a‘e a tomo mai ai au i roto i te Ekalesia, e mea oto noa to’u nei oraraa. I muri mai i te faataaraa o to’u na metua i te hituraa o to’u nei matahiti, ua mau to’u metua tane i te fare auri. E inu ava ta to’u metua vahine ohipa e ua mo‘e roa ia’na te mau mea faufaa no’na. Ua tuuhia vau i roto i te hoê utuafare faamu.

No teie mau ohipa, oioi rii a‘e au i te paariraa i te tahi atu tamarii no to’u matahiti. I to’u nei aau, aita to’u ti‘araa i tera vahi, e no reira, pinepine au i te faaorure hau. Te apî noa ra vau, ua haamata vau i te pupuhi i te avaava e i te rave atoa i te tahi atu mau mea o ta’u e ite nei i teie nei e, aita te reira i au i te Parau Paari. Ua mana‘o papû roa vau e, e oraraa manuia ore tei mua ia’u.

Te hoê noa mea i reira vau i te iteraa i te oaoa, o te tautururaa ïa i te taata—mai te tamâraa na piha‘i iho ia ratou e aore râ mai te faarooraa i te mau aamu no to ratou oraraa. Ua hiaai roa vau ia ite mai te taata e, e nehenehe ta ratou e turu‘i i ni‘a ia’u. I te hoê matahiti, ua reva vau no te tau faafaaearaa e ua farerei atura vau i te hoê vahine ruhiruhia o ta’u i faaoti e tavini atu na roto i te faarooraa ia’na. E Keresetiano oia e ua haamata a‘era oia i te paraparau mai ia’u no ni‘a i te ohipa faaroo.

Aita ho‘i au i tiaturi roa a‘enei i te Atua. I te tahi taime, ia tae mai te mana‘o e, peneia‘e te vai ra Oia, ua faahapa vau Ia’na no te mau fifi ta’u i faaruru na. Tera râ, i to teie vahine faati‘araa mai i te faufaa rahi no te faaroo i te Atua, ua haamata vau i te uiui haere. Hou vau i faaru‘e ai ia’na, ua parau mai oia i te hoê mea taa ê mau : « Te pee nei te mau Momoni i te mau faaueraa a te Atua ».

Aita a‘enei au i faaroo i te parau no te mau Momoni, no reira, ua ho‘i au i te fare, ua haere i ni‘a i te itenati e imi atura. Pia mai nei te tahua itenati Mormon.org e ua poro‘i a‘era vau i te hoê Buka a Moromona. Afa‘i mai nei te mau misionare i te hoê buka i te tahi noa tau mahana i muri mai.

Aita roa vau i papû maitai e, ua nehenehe anei ta’u e tiaturi i te Atua, tera râ ua tauturu te mau misionare ia’u ia ite mai e, eiaha noa e nehenehe ta’u e tiaturi Ia’na, e nehenehe atoa râ ta’u e matau roa Ia’na. A haamata ai au i te pure e i te tuatapapa i te Buka a Moromona, ua ite a‘era vau e, tei ni‘a vau i te hoê tere nehenehe no te imi i te oaoa. Ua faaea vau i te pupuhi i te avaava. Ua faaea vau i te faahapa i te Atua e ua haamata vau i te haamauruuru Ia’na no te mau mea maitai i roto i to’u nei oraraa. Ua ite a‘era vau e, ua mamae Ta’na Tamaiti no ta’u mau hara e no te mau maui atoa ta’u i farii. I te 28 no atopa 2007, ua bapetizohia vau i roto i Ta’na Ekalesia.

Ahani e, aita vau i ite roa mai i to’u iho tauiraa, mai te vare-noa-raa i te oaoa, eita atoa ïa vau e mana‘o e, e nehenehe te reira e tupu. I teie mahana, ua here au i ta’u piiraa i roto i te Paraimere e ua mauruuru roa vau i te fariiraa i te hopoi‘a ia tauturu i te faanahoraa i te hoê ohipa taviniraa i te hoê amuiraa na te feia apî paari i te fenua Pologne. No te mea ua nehenehe ia’u e tauturu pinepine i te tahi taata na roto i te taviniraa i roto i te Ekalesia, ua rahi atu â ïa te oaoa ta’u i ite mai i roto i te evanelia a Iesu Mesia. Ia rave au i te hoê mea i teie nei, e rave au i te reira ma te here mau maoti Iesu Mesia. Te tiaturi nei au e, e mea nehenehe te oraraa e noa’tu e, e tamataraa ta tatou, mai te peu e pee tatou i te Faaora, eita roa tatou e mo‘e.

Ua tano ihoa te vahine ta’u i farerei : Te faaroo i te Atua, e mea faufaa rahi roa ino. Eita tatou e ite mai i to tatou ti‘araa i roto i teie nei ao mai te peu eita tatou e matau Ia’na. Ua mauruuru roa vau no te iteraa mai i te hoê vahi no reira mai au.