Te ahu e te faaneheneheraa

I roto i te ao i teie mahana, e rave rahi aore e ite nei e aore râ e faatura nei i te huru mo‘a o te tino, te ti‘a nei te Feia Mo‘a i te Mau Mahana Hopea Nei ma te huru ahu e faaite nei e, ua ite tatou i te faito faufaa o to tatou nei tino (hi‘o No te Puai o te Feia Apî [buka iti, 2011], 6–8). I te api 52 o teie nei ve‘a, o Mary N. Cook, tauturu matamua i roto i te peresideniraa rahi no te Feia Apî Tamahine, te paraparau nei oia no teie faatureraa :

« Ia patuhia’na‘e te hoê hiero, e haapa‘o-rahi-hia te parururaa e te faaneheneheraa o te reira i roto e i rapae atoa. Te hoê taviri no te faaineineraa i te mau hiero, o te haro‘aro‘araa ïa e, e hoho‘a te hiero no te Fatu-To‘na ïa fare. Te faatura nei tatou i te mau hiero ei paturaa mo‘a i reira te feia ti‘amâ ana‘e e tomo atu ai. Te auraro nei tatou i te mau hiero no te mea na te mau oro‘a mo‘a e te mau fafauraa o ta tatou e rave nei i reira e faati‘a nei ia tatou ia ho‘i atu i to tatou Metua i te Ao ra ra.

« E mea faufaa a‘e to outou nei tino i te hoê noa a‘e hiero nehenehe i ni‘a i te fenua nei. E tamaroa e aore râ, e tamahine here outou na te Atua ! E mea hau atu â ïa i teie nau parau tumu—te faahoho‘araa, te faaturaraa e te auraroraa—ia faaohipahia no te aupururaa e te parururaa i to outou tino ».

E nehenehe i teie mau mana‘o i muri nei e tauturu ia outou ia haapii atu i ta outou mau tamarii i te mau parau tumu tano no te ahu e te faaneheneheraa. A haamana‘o atoa râ e, e riro to outou hi‘oraa no te faito ahu tano ei haapiiraa i ta outou mau tamarii no ni‘a i te faufaa ia ahu i te ahu tano.