Faanahonaho i ta tatou tarena no te amuiraa rahi

Tau matahiti i teie nei, e mea apî noa â ta maua mau tamarii e ono, ua hinaaro e ua faaoti matou ia faaineine maitai no te amuiraa rahi. Ua paraparau matou no te faufaa rahi ia mata‘ita‘i i te amuiraa rahi ma te mana‘o hau e te tino maha. E taime faufaa rahi te amuiraa rahi no te farii i te parau a‘o no ô mai i ta tatou mau peropheta ora. No reira, ua tuu matou i te fâ e, eiaha e faanaho i te hoê noa’tu ohipa hau atu i te mau mahana na mua a‘e i te amuiraa e no te roaraa o te amuiraa. Ua tapa‘o matou i te reira mau mahana i ni‘a i ta matou nei tarena, e ua faaoti papû matou tata‘itahi eiaha e faanaho i te tahi noa’tu ohiparaa hau atu i taua mau mahana ra.

Mai te peu e faaoti outou i te pee i teie reni arata‘i, e hi‘oraa taa ê rii paha ta outou ia au i to outou utuafare e to outou ho‘i oraraa, teie râ ta matou i faataa ei « ohiparaa hau atu », te ohiparaa no te fare haapiiraa anei, te piiraa i te tahi atu mau tamarii ia haere mai i te fare, te haereraa’tu i te fare o te tahi hoa, te faatupuraa i te tahi faaoaoaraa e tamaraa e te mau hoa e aore râ e te mau fetii, te raveraa i te tahi opuaraa e ohipa i roto i te aua i te roaraa o te mau tuhaa pureraa no te amuiraa rahi, te raveraa i te ohipa haapiiraa e tae roa i te taime hopea, e te fariiraa i te hora hau i te ohipa.

I te hepetoma na mua a‘e i te amuiraa rahi, e mea huru fifi ia pato‘i i te tahi o teie mau ohiparaa, noa’tu râ te reira, i te rahiraa o te taime e ma te anaanatae, ua rave te mau melo o te utuafare i te ma‘itiraa maitai no te haapa‘o i ta matou fâ. Ua itehia ia matou e, ua hinaaro roa ta maua mau tamarii rii ia amui atoa mai no te amuiraa rahi. I to’u nei mana‘o, te tumu, no te mea ïa ua paraparau tamau noa matou no te faufaa rahi o te amuiraa rahi i te hepetoma i ma‘iri iho nei.

Ua oaoa roa vau i te faaiteraa’tu e, ua taui roa ta matou mata‘ita‘iraa i te amuiraa rahi no ta matou tutavaraa ia faaiti i ta matou tapura ohipa i te mau mahana na mua a‘e e i te roaraa atoa o te amuiraa rahi. Ua ineine roa to matou aau e to matou feruriraa no te amuiraa rahi. Aita to matou taime i huehue roa no te tahi atu mau ohipa rau, ua ti‘a ia matou ia farii i te Varua a parahi ai matou no te faaroo i te mau parau a‘o a to tatou feia faatere.

Ua haapa‘o noa matou i ta matou fâ no te amuiraa rahi i muri iho atoa i te amuiraa no te mea ua faaî te reira i te hau i roto i to matou fare. Noa’tu e, aita faahou â te tahi o ta maua mau tamarii i te fare nei, te faaitoito noa nei maua ia ratou ia faaateatea noa i ta ratou tarena i te mau mahana na mua a‘e e i te roaraa atoa o te amuiraa rahi, mai ta matou e rave nei i te fare. Te tamata atoa nei matou i te faaherehere i te hoê taime no te mata‘ita‘i i te hoê tuhaa pureraa o te amuiraa rahi e te utuafare taatoa. Te tiaturi ra vau e, noa’tu e, ua faaipoipo ta maua mau tamarii e ua fanau i te tamarii, e tamau noa ratou i te faariro i te parururaa i te mata‘ita‘iraa i te amuiraa rahi ei ohipa faufaa rahi roa na roto i te faaateatearaa i ta ratou tarena.