I te pû haapiipiiraa misionare no te fenua Firipino, o ta Elder Russell M. Nelson no te Pŭpŭ no te Tino Ahuru Ma Piti Aposetolo i haamo‘a i te 20 no me 2012, e nehenehe e fariihia 144 misionare no Firipino mai, no Cambodge (Taputiha), no Hong Kong, no Initia, no Indonésie, no Mongolie, no Pakistan, no Sri Lanka, no Taiwan e no Thailande. E farii teie mau misionare i te haapiipiiraa na roto i to ratou iho reo.

I roto i teie pû apî, e piti fare, te hoê piha amuiraa rahi, te tahi mau piha no te iritiraa parau, te hoê piha no te mau matini roro uira, te hoê vahi pu‘araa ahu, te mau piha haapiipiiraa e te materia hi‘ofaaroo, te mau piha ta‘oto no te mau misionare, e te tahi atoa mau piha haapiiraa e te mau piha toro‘a.

I roto i ta’na pure haamo‘araa no teie paturaa apî, ua parau Elder Nelson i to’na mauruuru no te Taraehara a Iesu Mesia e no te mau misionare haapa‘o e te mau melo o te Ekalesia na te ao atoa nei o te here nei e o te tavini nei i te Fatu. Ua ani oia i te hoê haamaitairaa i ni‘a i te Repupirita no te fenua Firipino ia « vai matara noa te uputa no te fariiraa » i te mau tavini atoa o te Fatu e ua pure oia ia haamaitaihia te mau nunaa taata e te « ti‘amâraa e te hopoi‘a no te tupu i roto i te parau-ti‘a, i te pae tino e i te pae varua ».

Na te peresideni Dieter F. Uchtdorf, Tauturu Piti i roto i te Peresideniraa Matamua i haamo‘a i te hiero no Manaus Beretiria—te 138raa o te hiero a te Ekalesia na te ao atoa nei e te 6raa i Beretiria—i te 10 no tiunu 2012.

Te faaroo e te hinaaro mau o te feia mo‘a i Beretiria, hau atu i te mirioni melo i reira, e nehenehe e faahoho‘ahia i te anavai rahi Amazon—te hohonu e te puai, te parau ïa a te peresideni Uchtdorf.

No na 20 matahiti i ma‘iri, no te mau melo o te Ekalesia no Manaus, te hoê oire mo‘emo‘e i te tahi pae o te mau anavai rahi e te mau uru raau, ua na ni‘a noa ratou i te puromu tere atea no te haere i te hiero no São Paulo, Beretiria—15 mahana no te haere e no te ho‘i mai na ni‘a i te pahi e te pereoo mataienaa—e i muri iho no te haere i te hiero no Caracas i Venezuela—8 mahana tere na ni‘a i te pereoo mataienaa.

Ua tavini Elder Claudio R. M. Costa no te Hitu Ahuru ei peresideni no te misioni no Manaus i Beretiria i te haamataraa te reira i te matahiti 1990.

« Ua mana‘o ihoa vau e, e tere noa te ohipa i te hiero no Manaus, i te mau mahana atoa, no te mea ho‘i e, e mea here teie mau taata i te hiero », te parau ïa a Elder Costa. « Te haapii nei ratou i ta ratou mau tamarii ia here i te hiero. E tao‘a faufaa rahi te hiero no ratou ».

I te mahana pae 1 no tiunu 2012, ua taea te 350 feia mo‘a i Samoa tei apee i te tahi atu mau taata Samoa no te poroteraa na roto i te mau aroa no Apia no te faahanahana i te ti‘amâraa. A pae ahuru matahiti i teie nei, i te matahiti 1962, ua farii te fenua i to’na ti‘amâraa i te hau no Niu Terani.

Ua amui mai te mau pŭpŭ, te mau fare haapiiraa, te mau ekalesia e te tahi atoa mau faanahoraa na te ara mai. Ua ha‘uti te upaupa piahi feia mo‘a i mua i na ahuru tauasini feia mata‘ita‘i.

I tera atoa hopea hepetoma, ua faatupuhia te hoê faahanahanaraa na te feia mo‘a no Samoa; o te reira atoa te 50raa o te matahiti no te tĭtĭ matamua tei faati‘ahia i roto i te fenua, i Apia.

I te mahana sabati, te 3 no tiunu, ua paraparau Elder James J. Hamula raua Elder Kevin W. Pearson no te Hitu Ahuru, e melo atoa no te peresideniraa Area no Patifita, i te Feia Mo‘a i te Mau Mahana Hopea Nei e te mau hoa i roto i te hoê putuputuraa taa ê tei haapararehia na roto i te mau fare pureraa o te fenua.

Ma te hi‘o noa i mua, te tamata nei te Feia Mo‘a i te Mau Mahana Hopea Nei i Samoa ia tavini e ia haapuai i te mau utuafare, te mau oire rii e te nunaa taatoa, ua parau Elder Hamula, te peresideni Area. Te parau ra oia e « Te tupu maitai nei tatou i ô nei ei Ekalesia, e te tupu atoa nei tatou i roto i to tatou mau utuafare e i roto i to tatou iho oraraa ia imi tatou ia pee i te mau haapiiraa e te hi‘oraa a Iesu Mesia ».