Te tĭtĭ matamua i te fenua Initia

E anaanatae rahi e te mauruuru tei itehia i rotopu i te naho‘a rahi, hau atu i te 1500 melo e te mau hoa tei putuputu i te Novotel Convention Center i Hyderabad i Initia no te faati‘araa i te tĭtĭ no Hyderabad Initia, te tĭtĭ matamua i tera fenua, i te 27 no me 2012. Na Elder Dallin H. Oaks no te Pŭpŭ no te Tino Ahuru Ma Piti Aposetolo i peresideni e ua apeehia oia e Elder Donald L. Hallstrom no te Peresideniraa o te Hitu Ahuru e o Elder Anthony D. Perkins no te Hitu Ahuru e peresideni atoa no te area no Asia. Ua tae atoa mai te mau vahine a teie na feia faatere i te amuiraa.

Ua paturuhia o John Gutty ei peresideni tĭtĭ e o Suresh Natarajan ei tauturu matamua e o Rajaratnam Bushi ei tauturu piti. O Prasad Rao Gudey te patereareha matamua no Initia, oia te peresideni mataeinaa tahito.

I mua i teie naho‘a rahi feia mo‘a tei putuputu i Initia, ua parau o Randy D. Funk, te peresideni no te misioni no Bangalore Initia e, « E hi‘oraa hanahana teie i mua i to’u nei mata i teie mahana rahi, e mahana o ta tatou e haamana‘o noa. E haamana‘o noa tatou e, ua tae mai te hoê aposetolo o te Fatu i ô nei ».

Ua faatae Elder Perkins i te here o te peresideniraa area no Asia i te mau melo no Initia e ma te parau atoa e, « Te ite ra tatou i te mau haamataraa no te hoê ohipa hanahana i roto i teie fenua. Te haapa‘ohia ra te tupuraa o te Ekalesia e te faati‘araa i te tĭtĭ mai tei itehia i roto i te mau parau tumu mure ore o te evanelia e te mau faanahoraa mana a te autahu‘araa ».

Ma te faaite atu e, ua riro oia ei ite piti no te piiraa o te peresideniraa tĭtĭ apî, ua faataa mai Elder Hallstrom i te faanahoraa o te heheuraa i roto i te ma‘itiraa i te feia faatere apî no te tĭtĭ. Te parau ra oia e, ei melo no te Hitu Ahuru, e mea tonohia oia e e tae mai oia ma te faati‘a pae tahi ore e te matau ore i te tahi e te tahi. E tae mai oia ia au i te faanahoraa a te Fatu, ma te turu‘i i ni‘a i To’na Varua no te farii i te heheuraa. « Teie te hinaaro o te Fatu, ia riro te peresideni Gutty ei peresideni tĭtĭ », te parau ïa a Elder Hallstrom.

No Kristen Oaks, tei apee i ta’na tane, ua paraparau oia no ni‘a i te haapiiraa i te mau tamarii ia tiaturi ratou e « no te mea ua ite to ratou metua vahine i te reira » (hi‘o Alma 56:48).

Ei taata a‘o hopea i roto i te amuiraa, ua faatae Elder Oaks i to’na mauruuru i te nunaa no Initia, te hoê fenua vî ore i te pae faaroo o te faati‘a nei i te mau melo o te Ekalesia « ia putuputu e ia paraparau i te mau parau tumu no to ratou faaroo ».

Ua faaite papû Elder Oaks e, ua farii oia i te faaiteraa a te Varua e, ua faaineine e ua ma‘iti te Fatu i te feia faatere tei piihia. Ua paraparau atoa Elder Oaks no ni‘a i te mau hopoi‘a apî a te hoê tĭtĭ.

Ua parau oia e, i roto i te Faufaa Tahito ua faahoho‘a te peropheta Isaia ia Iseraela i te hoê tiahapa e tapo‘i ra i te mau tamarii a Iseraela. « I teie mahana, o te Ekalesia te tiahapa. Ua ite tatou e, e hutihia te tiahapa i te mau tĭtĭ. I teie nei e tĭtĭ no Ziona o Hyderabad, e titauhia outou ia haere i mua ma te horo‘a i te tauturu rahi a‘e i roto i te tuhaa ahuru e te mau misionare ».

Aua‘e te faati‘araa o te tĭtĭ, ua fana‘o te mau melo no Hyderabad i te mau haamaitairaa patereareha. Ua tatara Elder Oaks eaha te mea i roto i te haamaitairaa patereareha, ma te parau i te reira ei « mau papa‘iraa mo‘a no te taata iho ».

« E faaite te haamaitairaa patereareha i te opu o Iseraela no reira mai outou, na roto mai ho‘i i te reira te mau haamaitairaa e fariihia ai », te parau ïa a Elder Oaks. « E faaite atoa te hoê haamaitairaa patereareha i te mau haamaitairaa e te mau fafauraa o ta tatou e nehenehe e titau mai te peu e vai haapa‘o noa tatou ».

Te parau faahou ra oia e, « A tupu noa ai te Ekalesia i Initia nei, e tae mai te taime e farii te peropheta i te faaûruraa ia patu i te hoê hiero i Initia. Ia rahi ana‘e te mau tĭtĭ tei faati‘ahia, e rahi atoa te hinaaro no te patu i te hoê hiero. Ia faaite te mau taata i te parau-ti‘a e te hinaaro mau, e ti‘a mai te hoê hiero ».

No te opaniraa, ua ani Elder Oaks i te hoê haamaitairaa : « I roto i teie tĭtĭ matamua i ni‘a i teie fenua rahi no Initia, te haamaitai nei au ia outou ia haamana‘o outou i te mau haapiiraa no teie nei hora. Te haamaitai nei au ia outou ia haamana‘o outou i te mau fafauraa o ta outou i rave i to outou bapetizoraahia. Te haamaitai nei au ia outou ia roaa ia outou te haamana‘oraa e te hinaaro mau no te haapa‘o i te mau faaueraa a te Atua ia farii outou i Ta’na mau haamaitairaa ».