Ua pure au no te ani i te itoito

E melo to’u na metua no te Ekalesia, tera râ e ere raua i te mea itoito roa. I te tahi mau taime e tupu mai te manianiaraa no te mea te mana‘o ra raua e, e na mua te taime utuafare i te tahi atu mau mea—na mua i te haereraa i te pureraa, te raveraa i ta’u mau piiraa a te Ekalesia e te raveraa i te tahi atu mau ohipa.

No te mea e ti‘a faatere au i roto i te Paraimere e e melo atoa ho‘i no te pŭpŭ himene a te paroisa, e haataupupu rii ta’u mau apooraa no te Ekalesia i ta’u mau hopoi‘a i te fare. I te hoê mahana te faaineine ra vau no te haere i te haapurororaa no te amuiraa rahi i ô i ta matou fare pureraa i Antananarivo, ua faahamana‘o mai to’u na metua e, e taata tei to matou nei fare.

« Na oe e ma‘iti, te utuafare e aore râ te Ekalesia », te parau ïa a to’u metua vahine ia’u. « E faaea oe ia matou ra e e ma‘iri oe i te amuiraa, aita ana‘e, e haere oe i te amuiraa e e faautu‘araa ta oe araua‘e ».

Ua faaoti atura vau e, eiaha e maniania e to’u metua vahine. Ua rave râ vau i te tahi taime no te ani i te Metua i te Ao ra ia horo‘a mai ia’u i te itoito e te puai. Ua ani atoa vau Ia’na ia tauturu mai ia’u ia ite e, eaha te rave. E faaea anei au i te fare e to’u utuafare e aore râ e haere atu vau i te fare pureraa no te faaroo i te reo o te peropheta ?

I te otiraa ihoa ta’u nei pure, ua ite au i te faaûruraa a te Varua Maitai. Ua ite au i te faaitoitoraa a te Varua ia’u ia parau i to’u metua vahine i te faufaa rahi no’u ia haere e faaroo i te peropheta. Ua tae mai te mana‘o i roto ia’u e, e ti‘a ia’u ia parau ia’na e, e farii au i te parau a‘o paari eiaha no to’u noa oraraa i teie mahana, no to’u atoa râ ananahi.

E nehenehe te Atua e rave i te ohipa maere, e ua tamărû Oia i te aau o to’u na metua e ua tuu raua ia’u ia haere i te amuiraa rahi ma te faautu‘a ore. Ua riro teie ei iteraa faahiahia mau i roto i to’u nei oraraa. Ua haapapû mai te reira ia’u i te parau mau o te papa‘iraa o te na ô nei e, « E na roto i te mana o te Varua Maitai e ite ai outou i te parau mau i te mau mea atoa ra » (Moroni 10:5).

Ua ite au e, mai te mea e faatumu tatou i ta tatou mau ohipa i ni‘a i te mau parau tumu o te evanelia e e faaroo tatou i te Varua, e nehenehe ta tatou e oaoa noa i roto i ta tatou mau ma‘itiraa. Ua haapuai teie ohipa i to’u nei iteraa papû e, tei ô nei te Atua no tatou e te tauturu nei te Varua Maitai ia tatou i roto i to tatou nei oraraa.