Ahu no te oriraa
Taata papa‘i e faaitehia Scott Greer
Ua hinaaro roa vau i te pee i te tahi mau pu‘eraa, tera râ, ua tae mai te mana‘o e, e ti‘a ia’u ia riro ei hi‘oraa.
I to’u apîraa, e taure‘are‘a noa vau, e mea huru fifi rii no’u ia ora i te evanelia. Aita te mau melo o te Ekalesia i rahi roa i te vahi i ora na vau, e no to’u mau hoa aita e melo o te Ekalesia, ua riro rii mai te faaearaa i ni‘a i te e‘a afaro ei hoê mea fifi.
« E mea au a‘e no oe ia oomo i teie ahu ; e ite-maitai-hia to oe na mata nehenehe », ua parau mai te hoê o to’u mau hoa ia’u na mua a‘e i te hoê aru‘i oriraa. Ua faatoro mai oia i te hoê ahu roa, ua horo‘a oia ia’u no tera ra pô, aita râ to te reira e rima ahu. Ua mana‘o atura vau e oomo i teie ahu roa e te tahi pereue.
I to’u taeraa i te aru‘i oriraa, aita hoê a‘e taata e te hoê ahu roa ma te rima ahu, e ua huru ê rii au no to’u taa-ê-raa. Ua haamata atura vau i te veavea rii mai, parau mai nei to’u mau hoa ia’u e, e tatara noa ïa i te pereue e e maitai rii mai au.
I tera iho taime ua farii au e tatara i te pereue, ua haamana‘o ihora vau i ta’u haamaitairaa patereareha. Ua parau mai ta’u haamaitairaa e, e faaruru vau e rave rahi faahemaraa e mai te peu noa’tu e topa vau, e rave rahi te taata e riro i te pee atoa mai ia’u. Tera te taime to’u faaotiraa ia faaea i ni‘a i te e‘a afaro—eiaha no’u noa iho, no te tahi atoa râ mau pu‘eraa e hi‘o mai nei ia’u. Ua faaoti atura vau e tape‘a noa i te pereue.
A taime rii, ua atahia vau no te mea aita vau i rave i te mau mea mai ta te tahi atu mau taata, ua vai puai noa râ vau e ua haamaitaihia vau no te reira. I muri iho roa mai to‘u iteraa e, e rave rahi taata tei hi‘o noa mai ia’u. Ua parau roa mai te tahi o to’u mau hoa e, te faatura roa nei ratou ia’u no to’u haapa‘oraa i ta’u mau faatureraa. Ua tatarahapa ratou no te horo‘araa mai i te tahi haafifiraa no te mea aita vau i rave mai ia ratou ra i te tau no te haapiiraa tuarua.
No te mea ua pee au i te mau faatureraa a te Ekalesia e ua tamata vau i te riro ei hi‘oraa, ua ti‘a ia’u i te farii mai i te te tahi mau iteraa no te ohipa misionare e i te haapii atu i te evanelia ia vetahi ê. Eita ta’u e nehenehe e faaûru atu ia vetahi ê ahani e, aita vau i faaea i ni‘a i te e‘a afaro.