A parau mai na no ni‘a i ta oe Ekalesia

I roto i te hoê tere no te haere e farerei i to’u nei tuane, te parahi ra vau i te muriraa o te manureva i reira te mau tuati e parahi ai. Na piti apaparaa parahiraa i reira, e fariu ïa te tahi i te tahi.

Ua faaite atu vau i to’u i‘oa i te mau taata e parahi ra i reira e ua parau atura vau e, e haere atu vau i te fare haapiiraa tuatoru Brigham Young University. Ua parau mai ra te tane i mua ia’u e, e hoa rahi to ta’na tamahine tei reva atu i ta’na misioni. Ua matau rii ta’na tamahine i te Ekalesia, no’na râ, aita roa’tu ïa to’na e iteraa no te reira. Parau oioi mai nei te tuati manureva e, eita roa ona e tomo i roto i « tera ekalesia » no te mea te haafaufaa ore nei te reira i te mau vahine. Parau mai nei tera tane e, ua faaroo atoa oia i te tahi parau mai te reira—e au e, e ti‘araa iti a‘e to te mau vahine Feia Mo‘a i te Mau Mahana Hopea Nei i to te mau tane, e eita ta ratou e nehenehe e farii i te autahu‘araa e aore râ e faatere i te mau putuputuraa, e na te tane e faatere i te Ekalesia.

I reira, fariu mai nei ia’u ma te ui mai e, « Eaha to oe mana‘o no ni‘a i te reira ? » Hi‘o pauroa mai nei na taata e hitu i ni‘a ia’u e tia‘i atura.

Haamata a‘era to’u mafatu i te otu‘itu‘i. I to’u tamariiraa, ua tamau aau vau i te mau Hiro‘a Faaroo ma te mana‘o i te hoê farereiraa mai teie te huru, e i to’u taure‘are‘araa, ua haapiipii au nahea i te faaite atu i to’u iteraa papû no ni‘a i te orama a Iosepha Semita e no ni‘a atoa i te Buka a Moromona. E i ô, aita roa’tu ïa vau i ite e, nahea i te pahono i te uiraa a teie taata. Pure atura vau i roto ia’u ia arata‘i mai te Metua i te Ao ra ia’u.

I reira, parau atura vau i te mau parau matamua i puta mai i roto i to’u feruriraa : « Aita roa’tu outou i faaroo a‘e no ni‘a i te Sotaiete Tauturu ». I te hoho‘a o to ratou mata, ua papû maitai aita roa’tu.

Ua faaite atura vau e, « Te tere apipiti nei te autahu‘araa e te mau vahine, e melo pauroa ho‘i ratou no te Sotaiete Tauturu ». « Te vai ra ta matou hoê peresideni no te Sotaiete Tauturu e na’na e arata‘i i te mau ohipa a te mau vahine i roto i te Ekalesia na te ao atoa nei. Te hopoi‘a a te mau vahine, o te faatupuraa ïa i te mărû e te aroha i roto i te oraraa o te mau melo, i roto ihoa râ i te oraraa o to ratou utuafare ».

Te faaroo maite ra te tari‘a o te mau taata i piha‘i iho ia’u.

« Te ora nei tatou i te hoê tau huru ê, te hinaaro nei te tahi mau vahine i te mau vahine ia ohipa e ia feruri e ia riro mai te mau tane te huru. Te tiaturi nei râ matou e, ua faataa te Atua i te mau hopoi‘a. Te tia‘i nei matou i te mau vahine ia riro mai ei feia faatere i rotopu i te mau vahine e ia apipiti atu ei feia faatere i roto i to ratou nei utuafare. Te turu‘i rahi nei te mau tane i ni‘a ia matou no te tauturu mai i roto i teie mau tuhaa ohipa. E aifaitoraa ti‘a teie. Na te reira e haamanuia i ta matou mau faanahoraa Ekalesia e to matou mau utuafare. E te tiaturi mau nei matou e, aita te tane i taa ê i te vahine, aita atoa te vahine i taa ê i te tane i te Fatu nei (hi‘o 1 Korinetia 11:11). Te tiaturi nei matou e, aita to matou ti‘araa i hope roa aita ana‘e te tahi. Aita matou e tiaturi nei e, ua hamanihia matou no te umeumeraa te tahi i te tahi, no te tururaa râ te tahi i te tahi ».

Ua ite au e, ua haamaitaihia vau i te otiraa taua tau‘araa parau. Ua ite au e, te mau parau i matara mai, no ô mai ïa i te Varua ra. I to’u mana‘o, ua farii maitai mai teie mau taata i ta’u tatararaa. Ua parau maira tera taata ia’u, « A parau faahou mai na no ni‘a i ta oe Ekalesia ».

I reira, no na hora e piti i muri mai, ua oaoa roa vau i te paraparauraa atu no ni‘a i te Faaho‘i-faahou-raa mai, i te pahonoraa i te mau uiraa, e te faaiteraa i to’u nei iteraa papû no ni‘a i te evanelia o ta’u e here nei.