E faaineine te oraraa atuatu ia tatou no ananahi

Te tiaturi nei te Feia Mo‘a i te Mau Mahana Hopea Nei i te faaineineraa e te farava‘iraa ia’na iho. Te tiaturi nei tatou i te faaineineraa pae haapiiraa no te tihepuraa ohipa, i te faaineineraa atoa i te pae moni no te mau tau fifi, e i te faaineineraa pae tino no te mau tau vero e te mau tamataraa. Te mea faufaa roa’tu, te tiaturi nei tatou i te faaineineraa pae varua no te Tae-piti-raa mai o Iesu Mesia e no te ora faahou â i mua i te aro o to tatou Metua i te Ao ra. Teie huru reni arata‘i no te faaineineraa, o te oraraa atuatu ïa.

E faahi‘oraa te oraraa atuatu no to tatou huru mure ore : tei ô nei tatou « ia rave [tatou] i tei au i to [tatou] iho hinaaro, e ia ore [tatou] ia ravehia » (2 Nephi 2:26). Ua hinaaro te Fatu ia tatou ia amo i ta tatou hopoi‘a e ia vai ti‘amâ (hi‘o PH&PF 78:14). Ua hinaaro Oia ia ora tatou i te oraraa atuatu no te taata tatou e riro mai araua‘e : e taata matau i te hopoi‘a, e taata horo‘a, e taata feruriraa paari e e taata mărû. No te mea ho‘i e, rahi noa’tu to tatou faarava‘iraa ia tatou iho, rahi atoa’tu ïa to tatou aravihi no te tauturu i to tatou utuafare e ia vetahi ê. Nahea ta tatou e nehenehe e faaamu i te taata po‘ia mai te peu e, te po‘ia atoa ra tatou ? Nahea ta tatou e nehenehe e horo‘a atu i te ite mai te peu e, te ere ra tatou i te ite ? Nahea ta tatou e nehenehe e faarahi i te faaroo o vetahi ê mai te peu e, te ere ra tatou i te faaroo ?

Teie te tahi o te mau parau tumu no te oraraa atuatu :

• Te faaineineraa « A faaineine outou, a faaineine outou no te mea e tae mai nei, no te mea e ua fatata mai te Fatu » (PH&PF 1:12).

• Te rima ohipa « Eiaha e faaea ohipa ore noa » (PH&PF 42:42).

• A imi ho‘i i te ite, oia ia na roto ho‘i i te haapii e na roto atoa i te faaroo (PH&PF 88:118).

Ia imi ana‘e te mau melo o te Ekalesia i te mau rave‘a atoa no te faarava‘i ia ratou iho e aita ihoa ratou e nava‘i, e fariu atu ïa ratou na mua i ni‘a i to ratou mau fetii no te ani i te tauturu. Ia ore te reira e nava‘i, e nehenehe ta te Ekalesia e tauturu mai. E nehenehe ta te mau episekopo e te mau peresideni amaa e faaohipa i te « fare vairaa faufaa a te Fatu ra » no te tauturu i te mau melo (hi‘o PH&PF 82:18–19). Te mau tautururaa atoa no roto mai i te Ekalesia, o teie ïa te fâ, no te tautururaa i te mau melo ia tauturu ia ratou iho ma te faaitoito i te ohipa i roto i to ratou oraraa.

E nehenehe ta tatou e ohipa no te faarava‘i ia tatou iho i roto i te mau tuhaa i muri nei :

• Puai pae varua : A tiaturi i te Fatu ; a haapa‘o i te mau faaueraa ; a pure e a tuatapapa i te mau papa‘iraa mo‘a i te mau mahana atoa ; a tavini ia vetahi ê.

• Ea maitai i te tino : A haapa‘o i te Parau Paari ; a faaha‘uti’uti i te tino ; a taoto tano ; a tape‘a mâ noa i te nohoraa e te tino.

• Ite : A faarahi i te ite ; a titau i te mau aravihi no te ohipa ; a imi i « te mau buka maitai » (PH&PF 88:118).

• Ohipa : A ohipa no te pahono i to oe iho mau hinaaro e i to te utuafare.

• Haaputuraa maa : A haaputu i te pape mâ e a haaputu mărû atoa i te maa ua matau outou i te amu e i muri iho e haaputu rahi atu ai i te maa no te hoê tau roa a‘e, mai te mau huru sitona e te mau huero pĭpĭ.

• Haapa‘oraa faufaa : A aufau i te tufaa ahuru e te mau ô ; a ape i te mau haamau‘araa tano ore ; a haaputuputu i te moni.