Bae Mi Tu Mi Save Kasem Baptaes?

“Nuno mo Miriam. Bae yutufala i save folem eksampol blong Jisas Kraes mo kasem baptaes long nekis Satedei?” Sista Silva i bin askem.

Paulo i no save bilivim samting ia. Ol sista misinari oli jes invaetem brata mo sista blong hem we tufala i gat 10 yia blong tufala i kasem baptaes!

“Yes! Yes!” tufala twin i ansa wetem glad.

Miriam i no save stop blong smael. Nuno i slap faef long Sista Lopes. Fes blong bubuwoman we i sidaon long bigfala red amjea i saenaot long kona.

BBlong sam wik, ol sista misinari oli bin stap tijim Paulo mo ol brata mo sista blong hem long haos blong Bubuwoman long aelan blong Sao Migel we i grin gud, mo i gat win-i stap 1,600 kilometa longwe long meinlan blong Potugal. Paulo i laekem blong openem haf doa blong haos blong Bubuwoman, pat we i stap antap, mo afta i filim win blong solwota taem hem i stap lukluk Sista Lopes mo Sista Silva, tufala i stap wokbaot i kam antap long rod blong tijim hem abaot gospel.

Tufala sista misinari, tufala i bin talem se tedei, bae lesen i spesel. Paulo i bin save nao from wanem. Nuno mo Miriam, bae tufala i kasem baptaes, semmak olsem we Jisas i bin tijim! Paulo i bin wantemt u blong folem eksampol blong Sevya.

Hem i holem Buk blong Momon blong hem we i gat ol pikja long hem i kam kolosap long bodi blong hem, mo i askem strong: “Tufala sista. Bae mi tu, mi save baptaes long nekis Satedei?”

Sista Silva i bin smael, be hem i saksakem hed blong hem. “Sore tumas Paulo. Lod i bin talem long mifala se yumi evriwan i nid blong kasem baptaes, be taem nomo yumi kasem eit yia finis. Be from se yu gat sikis yia nomo, yu no save ansa yet from ol joes blong yu.”

Paulo i no glad: “Be tufala sista, mi bin stap prea mo mi bin stap ridim Buk blong Momon wetem famle blong mi, olsem we yutufala i bin tijim mi. Mi stap go long Praemeri evri wik wetem Bubuwoman mo Angkel Mario. Mi save se Jos i tru! Bae mi no save kasem baptaes wetem Nuno mo Miriam?”

Sista Lopes i talem se: “Yu bin mekem wan gudfala wok blong stap laef folem ol komanmen, mo stap lanem abaot gospel. Be yet, yu mas wet 2 yia moa bifo yu save kasem baptaes.”

Trot blong Paulo i stat blong bon olsem faea, mo ol hot wota i stap fulumap ae blong hem. Hem i jiam antap mo i ron i go long rum blong hem antap long ruf blong haos, long ples we hem i bin stap silip wetem ol brata mo sista blong hem.

Afta we hem i bin stap krae long pilo blong hem blong sam minit, Paulo i bin harem wan i stap klaem i kam long rum blong hem. Angkel Mario i bin sidaon long bed blong Paulo.

Angkel Mario i askem: “Wanem i hapen Paulo?”

Paulo i talem se: “Sista Silva mo Sista Lopes i talem se mi no save kasem baptaes, be Nuno mo Miriam nomo tufala i save. Mi wantem kam memba blong Jos! Mi laekem ol singsing long sakramen miting mo blong stap lanem abaot ol skripja long Praemeri. Mi no wantem se bae mi stap miwan i stap.”

“Paulo, yu save stap pat blong Jos, nomata yu no bigwan inaf blong kasem baptaes,” Angkel Mario i bin talem long naes fasin.

Paulo i pulum nus insaed long pilo blong hem mo talem se: “Olsem wanem ia?”

Angkel Mario i talem: “Yu save se Praemeri bae i rere long program blong sakramen miting. Praemeri tija blong yu i bin talem long mi se hem i stap lukaotem ol volontia blong talem testemoni blong olgeta insaed long program ia. Hemia i wan wei we yu save tekempat insaed long Jos,” angkel Mario i eksplenem.

“I tru ia?” Paulo i sidaon mo i lukluk anggel blong hem. Hem i tingting blong smol taem. “Ating bae mi save serem testemoni blong mi long Nuno mo Miriam tu long baptaes blong tufala!”

“Hemia i wan gudfala tingting!” Angkel Mario i talem. “Nomata yu yangfala tumas blong kasem baptaes, be yu gat wan testemoni yet.”

Paulo i jiamaot long bed, mo i hariap i go daon.

Angkel Mario i singaot: “Yu stap go wea Paulo?”

Paulo i singaot i kambak wetem glad: “Bae mi go praktisim testemoni blong mi long ol misinari. Bae mi stap serem taem mi stap wet blong kasem baptaes!”