Ol Gudfala Samting Oli Stap Kam Kam Nomo

Hem i bin Fraedei naet, semmak olsem ol narafala Fraedei. Ol gudfala fren blong mi, mo mi, mifala i bin sidaon long apatmen blong mi afta we mifala i lukluk long wan muvi, mo wanwan taem, mifala i stap storian kwaet mo afta, laf bigwan. Wan filing blong glad i fulumap ples, mo mi no save stop blong smael long ol stori mo ol tingting we oli stap go raon long rum. Sam long ol pipol ia, mi bin mitim olgeta wan manis nomo i pas; sam long olgeta, mi bin save olgeta blong 25 yia finis.

Long wan poen, wan long ol fren blong mi ia blong longtaem, mo mi, mitufala i stat blong serem ol memori abaot sam narafala fren blong skul sam yia i pas. Taem mifala i bin stap toktok, mi tingting long hamas mi misim ol fren ia, mo hamas gud taem mifala i bin gat, mo hamas mifala i bin stap kolosap long wanwan long mifala. Naoia, mifala i bin graduet, mo muv i go long ol ples raon long wol, mo mifala i stap long ol situesen we mifala i neva bin save talem bifo. Mi pulum gud win blong mi, mo blong smol taem mi bin filim se mi lusum wan samting, mo afta, mi lukluk i go raon long rum, long ol fes ia we oli bin stap laef, we oli bin stap raonem mi long taem ia, mo wan tingting i fas gud long mi: ol gudfala samting oli stap kam kam nomo.

Simpol tingting ia, i bin gat bigfala mining long mi, speseli from se mi bin stap gat hadtaem blong fesem jenis long laef, mo mi no laekem blong livim ol gudfala samting oli go. Mi misim ol samting blong bifo, nating we taem i jenis i stap naoia, mo mi wantem tumas blong stap glad long ol taem we mi bin laef wetem ful tingting mo strong tingting. Mi save taem mi gat wan gudfala samting, mo mi wantem holemtaet samting ia, mo neva livim i go; Fraedei naet ia, we mifala i les mo stap hapi, i bin wan long ol gudfala taem ia. Plante taem, taem mi luksave se hemia i wan gudfala taem, kwiktaem nomo bae mi stat blong tingting se evri samting i stap flae, se bae hem i go lus wetem taem mo ples.

Be long naet ia, harem nogud ia i no bin kam. Mi bin stap sidaon kwaet, wetem ol pipol we mi lavem we oli bin stap raon long mi; mi bin save se nomata ol gudfala samting oli mas finis samples, mo bae i gat plante had samting i stap kam long fiuja, ol gudfala samting bae oli stap kam kam nomo. Mo bae oli kam kam oltaem—sapos mi letem olgeta samting ia oli kam. Nomata we olgeta we mi lavem olgeta oli gohed long laef, ol emti spes ia bae oli fulap bakegen wetem ol gudfala mo niu pipol mo eksperiens we mi neva ting se bae mi gat.

Samtaem, hem i had blong muv fored, be yumi mas muv. Mo blong muv fored i no minim blong fogetem ol fren, blong fosem ol memori blong oli go lus. Hem i minim blong openem hat blong yumi blong kasem moa hapines mo moa eksperiens.

Sam wik afta long Fraedei ia, presidensi blong yang adalt branj blong mi, i bin rilis. Olsem eniwan long eni smol branj i save talem, hem i bin had blong tingting long wanem bae i hapen wetem branj blong mifala sapos mifala i no dipen long ol man ia mo ol waef blong olgeta, we mifala i bin kam blong lavem mo trastem. Be, mi bin sarem ae blong mi, mo mi bin ripitim long miwan ol toktok we oli bin fas long mi long Fraedei ia: ol gudfala samting oli stap kam kam nomo. Tingting blong mi i bin kam antap, mo mi bin rere long jenis ia.

Jenis, i wei blong Lod. Hem i wantem yumi blong stap hapi mo blong stap gro, blong stap glad tumas blong muv fored wetem laef blong yumi. Laef i wan wokbaot, mo taem yumi stap glad long taem we i stap naoia, mo stap rere long ol jalenj we bae oli mas kam, yumi mas muv fored, yumi mas gohed blong gat hop, wetem hat we i open long ol eksperiens mo ol gudfala samting we, i tru nomo, oli stap long rod blong kam.