Buk blong Alma: Ol Lesen blong Yusum Tedei

Truaot long evriwan long ol jalenj blong olgeta, ol man blong Nifae we oli bin stret mo gud oli bin save kasem paoa from se oli bin mekem ol samting ia wetem ol stret stamba tingting. Wan stamba tingting ia nomo we oli bin gat, i blong “blong lukaotem gud olgeta bakegen, mo ol famle blong olgeta, mo ol graon blong olgeta, kantri blong olgeta, mo ol raet blong olgeta, mo long saed blong bilif long God blong olgeta (Alma 43:47). Wanem we oli bin wantem, i blong oli holemtaet fridom blong joes blong olgeta—raet blong mekem samting long stret mo gud fasin, mo blong ansa from fasin blong olgeta—be i no blong gat wan king we bae i talemaot olsem wanem bae oli mekem samting. Stamba tingting blong olgeta i blong mekem se, anda long loa, evriwan i semmak, speseli fridom blong olgeta blong wosipim God mo holemtaet jos blong olgeta (luk long Alma 43:9, 45).

I gat, mo oltaem bae i gat, insaed long ol sosaeti, ol fos we oli stap lukaot blong tantanem tingting blong pablik blong save kasem paoa blong intres blong wan man nomo. I gat temtesen i stap blong stap folem tingting blong olgeta fos ia mo tanem raorao i kam wan bigfala faet from paoa. Wei blong Lod, oltaem, hem i blong mekem samting folem ol stamba tingting mo ol samting we yumi wantem we oli klin, olsem we ol man blong Nifae oli bin mekem. Taem oli bin stap mekem olsem, i bin mekem se oli askem blong gat ol paoa blong heven blong save winim ol jalenj blong olgeta “wetem paoa blong Lod” (Alma 46:20; luk tu long Alma 60:16; 61:18).

Semmak, taem yumi stap mekem samting blong stretem ol jalenj we yumi stap fesem tedei, oltaem yumi mas jekem hat blong yumi, blong mekemsua se wanem we yumi wantem mo stamba tingting blong yumi oli klin evriwan mo oli folem ol prinsipol blong gospel blong Jisas Kraes. Sapos yumi mekem samting (o tanem tingting blong ol narafala man blong oli mekem samting) wetem fasin blong stap selfis, blong intres blong yuwan nomo, o blong daonem ol narafala man, bae yumi no kasem help we i kam long heven we yumi nidim blong helpem yumi blong stanap agensem ol jalenj blong yumi.

Taem ol enemi blong olgeta blong bifo, ol pipol blong Antae-Nifae-Lihae, oli bin stap kolosap long taem we bae oli lus evriwan, ol man blong Nifae oli bin vot blong givim long olgeta wan ples blong stap, mo blong oli statem ol niu laef, mo givim proteksen long olgeta (luk long Alma 27:21–22; 43:11–12). From se ol Antae-Nifae-Lihae oli bin mekem wan promes blong neva tekem ol tul blong faet blong faet bakegen, nao oli bin givim “wan bigfala pat blong ol samting we oli gat blong sapotem” (Alma 43:13) ol ami blong ol man blong Nifae long ol taem ia blong denja. Be, i no gat rekod se ol man blong Nifae oli bin tritim ol strenja ia wetem eni narafala samting, be respek mo lav nomo, nomata oli bin stap olsem wan isi grup blong yusum long saed blong politik, long olgeta we oli bin wantem blong statem rao.

Gudfala tritmen we ol man blong Nifae oli bin mekem long ol pipol blong Amon, olsem we i bin nem blong olgeta afta, olgeta tu oli bin givimbak, mo afta, oli bin help blong setemap wan long ol ami grup we i givim fulap insperesen we oli bin rekodem long histri—olgeta 2,000 strong soldia. Sapos yumi luk gud, seves blong ol yang man ia, ating i ki ia nao blong holemtaet sosaeti blong ol man blong Nifae, mo hem i no lus evriwan.

Long taem blong raorao insaed long wan grup, long taem blong atak we i kam long aotsaed mo long taem blong jalenj long saed blong mane, i gat fasin i stap blong stap mekem o tingting nogud long olgeta we oli “no olsem yumi.” Hem i kam isi blong yumi tokbaot nogud olgeta mo mekem ol jajmen. Wan i save gat kwestin se oli tru long sosaeti mo oli impoten long sosaeti o nogat, mo olsem wanem nao oli lidim gudfala laef blong yumi long saed blong mane. Ol nogud ansa ia oli no go stret wetem wok we Sevya i bin givim long yumi, we i blong lavem ol neiba blong yumi semmak olsem yumi lavem yumiwan, mo ol samting ia oli mekem pipol i seperet, oli raorao, mo oli go stap olgetawan. Sapos ol pipol blong Amon oli no bin stap gud insaed long sosaeti blong ol man blong Nifae, ating bae i mekem ol pipol oli no stap gud, be bae oli no gat open hat long jeneresen ia we i stap kam antap. Bae oli no save givim 2,000 fetful soldia; bae niu jeneresen ia bae i tekem saed mo joenem ol man blong Leman.

Fasin blong wantem stap kaen mo gat open hat long olgeta we oli stap long nid, i bin wan impoten poen blong holemtaet nesen blong ol man blong Nifae, mo i bin mekem se ol man blong Nifae oli gat raet long ol blesing blong heven long bigfala hadtaem blong olgeta. Ol pipol blong God oli nidim ol blesing olsem ia tedei.

Lod i bin save long ol jalenj we ol man blong Nifae bae oli fesem, mo Hem i bin stanemap ol lida we oli gat insperesen blong helpem olgeta blong mitim ol jalenj ia. Kapten Moronae i bin wan soldia, be hem i bin gat insperesen blong mekem rere ol plet blong kavremap jes, ol sil blong han, ol sil blong blokem hed, mo ol hevi klos blong protektem ol pipol blong hem (luk long Alma 43:19). From hemia, ol man blong Nifae oli bin mekem gud moa long faet bitim ol man blong Leman (luk long Alma 43:37–38). Afta, Moronae i bin lidim ol pipol blong oli digim ol hip blong graon raon long taon blong olgeta mo blong kavremap ol hip blong graon ia wetem ol timba, mo ol wud we oli sap long en (luk long Alma 50:1–3). Ol wok ia blong rere, we oli bin kam tru long insperesen, oli bin help blong sevem laef blong ol man blong Nifae, blong oli no ded evriwan.

Taem we Moronae i bin stap rere blong go long wo, Hileman mo ol brata blong hem oli bin stap prijim toktok blong God, mo oli bin stap askem strong long ol pipol blong oli kam stret mo gud, blong mekem se Spirit blong Lod bae i save lidim mo sevem olgeta. Taem ol man blong Nifae oli bin lisim long ol daereksen long saed blong wol ia, mo long saed blong spirit blong ol lida ia we oli kasem insperesen, nao oli bin laef. Taem nomo i bin gat ol raorao bitwin olgeta, mo taem we ol pipol oli no bin wantem blong folem ol woning we oli kam long insperesen, long taem ia, taem i bin nogud mo man i bin safa.

Yumi gat blesing blong stap long wan dei we Lod i bin singaotem ol profet, sia mo reveleta we oli laef blong stap givim ol woning long yumi, mo stap lidim yumi blong rere from ol jalenj blong tedei. Long 1998, Presiden Gordon B. Hinkli (1910–2008) i bin givim ol instraksen mo woning we i kam tru long insperesen i go long ol memba blong Jos:

“Taem i kam blong yumi mas putum haos blong yumi i stap long oda.

“Plante pipol blong yumi, oli stap yusum kolosap evri mane blong olgeta we oli stap winim. I tru, sam oli stap laef nomo wetem mane we oli boro …

“Ekonomi i wan samting we i no strong. … I gat wan woning blong rabis taem we bae i kam yet, mo i moa gud yumi folem woning ia.”²

I no longtaem i pas, mi bin toktok wetem wan man we i bin harem ol toktok blong Presiden Hinkli mo filim Spirit. Hem mo waef blong hem, tufala i disaed blong salemaot ol bisnis blong tufala, pemaot haos blong tufala, mo kamaot long kaon.

Tedei, man ia i dipen long hemwan. Foldaon blong ekonomi we i bin kam afta, i no bin tajem famle blong hem tumas. I tru, from se hem i save dipen long hemwan, hem i mekem se hem mo waef blong hem, tufala i go long wan misin.

Presiden Tomas S. Monson, oli putum hem from taem blong yumi. Laef blong hem, mo ol tijing blong hem, oli mesej we God i stap sendem i kam blong protektem mo blesem yumi tedei. Long wan taem we plante oli stap wari abaot wanem we oli no gat, Presiden Monson i stap tijim yumi blong talem tangkyu from ol plante blesing we Lod i bin givim long yumi. Long wan taem we plante oli stap lukluk nomo long problem blong olgetawan nomo, Presiden Monson i stap askem strong yumi blong go aot, mo sevem man, blong yumi fogetem yumiwan mo blesem ol narafala man. Sapos yumi stap mekem folem daereksen we i kam long Presiden Monson, bae yumi protektem famle blong yumi long saed blong spirit mo bae yumi givim ol blesing we yumi nidim long taem blong yumi.

Mi mi talem tangkyu we mi laef long wan taem we gospel i bin kambak. Mi mi talem tangkyu se Lod i bin mekem Buk blong Momon i rere from taem blong yumi. Ol man blong Nifae oli bin fetful, mo oli bin gotru long ol tes blong taem blong olgeta, mo oli stap olsem wan witnes se Lod bae i givim ol blesing mo proteksen we yumi nidim blong win taem yumi fesem ol jalenj blong taem blong yumi.