Ples blong Mi

Bifo mi joenem Jos, laef blong mi i bin fulap long fasin blong no stap glad. Afta long divos blong papa mo mama blong mi, taem mi bin gat seven yia, papa blong mi i bin go long kalabus. Mama blong mi i bin stap dring strong drink oltaem, mo i bin lusum evri samting we i bin impoten long hem. Oli bin sendem mi blong go stap wetem wan famle we i lukaotem ol pikinini.

From ol samting ia, mi bin groap kwik moa bitim ol fren blong mi. Mi neva filim se mi gat wan ples i stap, mo from hemia, oltaem nomo mi stap gat fasin blong agens. Taem mi yangyangfala yet, mi stat blong smok mo mekem ol narafala samting we naoia, mi save se i agensem Tok blong Waes. Mi bin sua se mi, bae mi no save winim samting long laef.

Wan samting nomo we mi stap faenem glad long hem, hem i blong stap helpem ol pipol—olsem blong stap klinap wetem olgeta, o stap lisin long stori blong laef blong olgeta. Mi bin wantem tumas blong ol pipol oli save se oli save dipen long mi. Long wan yia, mi bin go long holidei, mo mi bin mitim wan olfala woman we mi bin disaed blong givhan long hem taem mi stap lisin long hem. Hem i bin wan Kristin woman, mo hem i bin stat blong toktok long mi long saed blong relijin.

Mi neva rili biliv long God. Long sam taem, we mi tingting se ating i gat wan God, mi bin blemem Hem from ol trabol we mi bin gotru long hem. Be, taem woman ia i bin tokbaot olsem wanem i impoten blong gat fet long God, mi luk se mi wari lelebet. Bifo mi aot, hem i talem wan samting we i pulum tingting blong mi: “Ol Momon oli stap folem ol komanmen blong God.”

Mi neva bin harem abaot ol Momon, mekem se mi bin gohom, go long Intanet, mo lukaotem. Mi kasem Mormon.org, mo mi bin oda long wan fri kopi blong Buk blong Momon. Ol misinari oli bin karem i kam sam dei afta.

Mi no bin save gud se mi save stat blong biliv long God o no, be ol misinari oli bin helpem mi blong faenemaot se mi save biliv long Hem, be tu, mi save kam blong save Hem. Taem mi stat blong prea mo stadi long Buk blong Momon, mi bin luk se mi stap long wan naesfala rod i go long fasin blong stap glad. Mi stop blong smok. Mi bin stop blong blemem God mo mi bin stat blong talem tangkyu long Hem from ol gudfala samting insaed long laef blong mi. Mi bin kam blong save se Pikinini blong Hem i bin safa from ol sin blong mi mo from evri sobodi we mi bin harem. Long 28 Oktoba 2007, mi bin kasem baptaes insaed long Jos blong Hem.

Sapos mi bin gat eksperiens ia miwan, long jenis ia blong ol giaman tingting i go kasem hapines, bae mi no save bilivim se hem i posibol. Tedei, mi lavem koling blong mi insaed long Praemeri, mo mi talem tangkyu se mi bin gat janis blong help blong oganaesem wan seves projek long wan yang singgel adalt konfrens long Polan. Blong save stap helpem ol narafalawan oltaem tru long seves blong Jos, i bin kam antap long hapines we mi bin faenem insaed long gospel blong Jisas Kraes. Evri samting we mi mekem naoia, mi mekem wetem klin lav, hemia from Jisas Kraes. Mi biliv se laef i naes tumas, mo nomata yumi gat ol jalenj, sapos yumi folem Sevya, bae yumi no save lus.

Woman we mi bin mitim i bin talem stret: blong gat fet long God, hem i impoten tumas. Yumi no save faenem ples blong yumi insaed long wol ia sapos yumi no save Hem. Mi talem tangkyu se naoia mi gat wan ples we i blong mi.