Stap Helpem Ol Yut blong Gat Ol Eksperiens long saed blong Spirit

Granja Viana Wod long Sao Polo Brasil Kotia Stek i bin stap gat fulap aktiviti wetem ol yang man blong olgeta. Be lida blong olgeta i bin luk se sam long olgeta, oli bin stap fesem ol jalenj blong olgetawan mo oli bin gat hadtaem blong mekem ol prishud diuti blong olgeta.

Afta we ol lida blong bisoprik mo Yang Man oli toktok tugeta, oli bin disaed blong oli mekem aktiviti blong olgeta i lukluk moa long seves, be i no tumas entetenmen mo taem blong gat gud taem nomo. Hemia i minim blong go visitim ol memba blong kworom we oli lesaktiv, blong tekem pat wetem ol fultaem misinari, mo blong pasem sakramen long ol memba blong wod we oli no save kam long jos. Ol aktiviti ia i bin givim wan janis long ol yang man ia, blong mekem samting folem ol prinsipol we oli bin stap lanem long seminari mo long Sandei (luk long 2 Nifae 2:26).

Wetem taem, “ol aktiviti ia, long saed blong spirit, i bin mekem plante samting i defren,” wan prishud lida i ripotem.

“Mifala i bin sapraes long wan fas Sandei, taem we evriwan long ol yang man oli bin serem testemoni blong olgeta,” hem i talem. “Taem ol yang man ia oli bin stap mekem hemia, plante long olgeta, wetem wota long ae, oli bin tingbaot gudfala spirit we oli bin filim long ol taem ia. Wan yang man i bin serem eksperiens blong pasem sakramen long wan olfala memba blong wod blong mifala we i bin stap long bed blong tri yia. Waef blong hem, wan fetful sista, i bin openem doa long ol yang man ia wetem glad mo hop. Afta long odinens, hem i bin serem wetem olgeta hapines we hem i bin filim long laef blong hem from gospel ia, nomata long ol bigfala problem mo jalenj we hem i bin stap fesem. Oli bin filim Spirit mo oli bin luksave wanem samting i defren we gospel i mekem insaed long laef blong ol pipol. Eksperiens ia, i bin strong tumas, mekem se bae oli tingbaot hemia blong plante yia we i stap kam—ating blong ful laef blong olgeta.”

Hem i talem gud we hem i neva bin luk kaen risal ia aot long eni “futbol gem o fani Miutuol naet.” Hem i talem, “Be, eksperiens ia i bin tijim hem olsem wanem i impoten blong mekem ol kaen eksperiens ia oli hapen, long ol taem olsem we ol yut oli save filim Spirit.

Hem i gohed “ol sosol aktiviti oli impoten. Be ol eksperiens long saed blong spirit oli impoten blong helpem ol yut blong oli bildimap testemoni blong olgeta.”

Long evri Sandei, long Ren Wod, Anje Franis Stek, Sista Delfin Letor, olsem Yang Woman presiden, i bin givim wan kad long wanwan yang woman we i stap kam long klas, mo askem hem blong jusum wan fren we i no bin kam long jos, mo raet i go long hem. Ol Yang Woman oli bin raet abaot lesen blong wik—wanem oli bin lanem mo wanem i bin givim insperesen long olgeta—mo tu, wan gud toktok blong olgetawan nomo. Afta, Sista Letor o wan long ol kaonsela blong hem, bae i sendem ol kad ia long postofis i go long olgeta we oli no bin stap long jos.

Hem i talem se aktiviti ia i bin simpol, be i bin wok; i no olsem wan wei nomo blong olgeta we oli bin stap kam blong oli save we i gat sam oli tingbaot olgeta, be tu, blong olgeta we oli bin raetem ol not ia blong oli tingting moa long wanwan long olgeta.

Hem i talem “tru long ol smol samting, ol bigfala merikel oli kam blong hapen (luk long Alma 37:6); mifala i bin luk we i bin hapen. Ol yang woman, tingting blong olgeta i kam antap, mo eksperiens ia i bin givhan blong mekem testemoni blong olgeta i kam antap.”

Alma i bin tijim se blong prijim toktok blong God, hem i gat strong paoa (luk long Alma 31:5). Deved Elma, wan Yang Man lida long Teksas, YSA, i bin save long hemia, mo hem i bin wantem blong givim ol yang man we hem i bin stap lidim wan gudfala gudtaem long wan Skaot trip, mo semtaem i gat wan eksperiens we i gat mining, we bae i helpem olgeta blong rere from fiuja.

Brata Elma i bin prea mo tingting long wanem bae hem i save serem, mo hem i bin filim blong ridim wan toktok blong Elda Nil L. Andesen blong Kworom blong Olgeta Twelef Aposol. Long trip ia, Brata Elma i bin tij aot long mesej ia, mo i bin talem stori blong Elda Andesen abaot Sidni Going, wan ragbi sta blong Niu Silan, we i bin putum spot karia blong hem i stap blong save go long wan misin. “Elda Andesen i bin talem “Misin blong yu bae i wan tabu janis blong tekem ol narafala man oli kam long Kraes mo blong helpem olgeta oli rere from Seken Kaming blong Sevya.”¹

Eksperiens ia, i bin gat paoa long hem, Brata Elma i bin talem, from se hem i bin tij wetem ol toktok blong wan profet we i laef. Long en blong divosen, evriwan long ol yang man mo ol lida, oli bin saenem nem blong olgeta long ol balong blong ragbi, olsem wan promes blong go long misin mo olsem wan samting we oli save holem we bae i mekem olgeta oli tingbaot wanem we oli bin lanem mo filim. Plante long ol papa mo ol lida oli bin wekap let long naet ia, mo oli bin toktok wetem ol yang man abaot olsem wanem nao, misin blong olgeta i bin jenisim laef blong olgeta.

Brata Elma i talem: “God blong yumi, i wan God we i save wanwan man; Hem i savegud ol yut blong Hem. Hem i save gud abaot laef blong olgeta mo ol jalenj blong olgeta, mo wanem i stap gohed wetem ol pikinini ia. Yu neva save olsem wanem Hem i stap wok insaed long laef blong olgeta. Mekem se yumi, olsem ol lida, yumi mekem rere, mo yumi givim wan ples blong oli save filim Spirit. Yu save mekem hemia tru long ol skripja mo tru long ol toktok blong ol profet, be hem i Lod, i no yumi, we i stap wok insaed long hat blong olgeta.”

Brata Elma i bin talem se hem i bin wantem se ol yang man oli mas tingbaot wan narafala samting abaot trip ia: gospel stadi blong olgeta i mas hapen oltaem.

Hem i talem: “Mi bin filim se pat blong responsabiliti blong mi, i blong givim olgeta ol eksperiens blong filim Spirit, mo sapos mi bin wantem hemia blong i hapen, mi mas mekem pat blong mi blong mi plan from. Elda Deved A. Bedna i bin tij abaot fasin blong krietem ol paten long saed blong spirit insaed long laef blong yumi; ol paten olsem hemia blong skripja stadi, mo prea, mo famle haos naet.² Mo long taem we mifala i bin aot long wik ia, mifala i bin holem taet ol paten long saed blong spirit. Mifala i gat prea olsem wan grup. Mifala i bin givim wok long ol yang man blong oli serem wan toktok blong 10 minit long moning divosen, mo ol lida mo papa blong olgeta oli bin rere long ol divosen long naet.

“Poen hem i we, nomata we mifala i bin stap longwe long hom mo ol aktiviti blong mifala i bin defren long wanem mifala i bin stap mekem oltaem, paten blong mifala, long saed blong spirit, oli no bin stop. Ol yang man, ating oli tingbaot o no tingbaot ol stret lesen, be mi hop se bae oli tingbaot long paten we mifala i bin gat blong stap gat ol divosen, mo prea, mo skripja stadi.”

Mira Bokobo Garsia blong Filipin, i save tu long valiu blong stap mekem samting oltaem, mo hem i save se fasin blong tijim samting ia i stat long hom. Sista Garsia mo hasban blong hem, Edwin, tufala i gat tri boe mo sikis gel, we i stat long 8 yia kasem 22 yia, mo wanwan i stap go long ol defren mo gudfala aktiviti. Hemia i save minim se plante pipol i muv i go long plante kaen daereksen, be famle ia i bin wokhad blong oltaem kakae tugeta long naet.

Sista Garsia i talem: “Blong stap kuk, mo rere long kakae wetem gladhat, mo blong stap kakae tugeta, i wan long ol bes wei we mifala i pulum ol pikinini oli kam tugeta.” Hem i talem se taem blong kakae i wan taem blong mekem tingting i klia, blong konek wetem wanwan, mo luksave ol blesing blong Lod.

Joslyn Filden blong Nova Skotia, Kanada, i talem se ol lesen we oli moa impoten we hem i bin lanem taem hem i bin lukaotem sikis pikinini, we oli gat stat long 20 i go kasem 30 yia, i no blong stap tij nomo, be tu, blong “krietem wan ples we ol pikinini oli save lanem ol trutok olgetawan.”

Hem i talem se: “Yufala i no kwik blong stap mekem joes long bihaf blong olgeta, o blong stap givim ansa long kwestin blong olgeta.” Be, hem i talem se i moa gud blong lidim ol pikinini “oli go long ol skripja, o kaonsel blong profet blong yumi, blong oli kasem daereksen mo ansa.” Hem i ademap, “mo rere blong toktok raon long wanem nao oli faenem.” Antap long hemia, taem hem i kasem ol kwestin we i kam long ol pikinini blong hem, samtaem hem i ansa wetem wan narafala kwestin olsem: “Long tingting blong yu, bae yu mekem wanem?”

Hem i talem se: “Gat tras se bae oli mekem ol stret joes. Taem yumi stap helpem ol pikinini blong yumi blong lanem blong luksave Spirit insaed long laef blong olgeta long ol taem blong tij we oli fulap long deitaem, mo taem yumi save se yumi filim Spirit olsem wanem, bae i wan bigfala tul blong jenisim olgeta, blong oli lukaot blong gat moa eksperiens long saed blong spirit, mo long wei ia, i stap mekem testemoni blong olgeta i kam strong moa se Papa blong yumi long Heven mo Pikinini blong Hem, Jisas Kraes, Tufala i tru. Hem i mekem se risal i go moa: moa oli filim laet mo gud filing we Spirit i tekem i kam, moa bae oli wantem samting ia, mo bae oli traehad blong mekem ol samting we bae i mekem Spirit i kam moa plante insaed long laef blong olgeta.”

Hem i kwik blong poenemaot se aot long ol prinsipol we oli bin wok gud long famle laef blong hem, oli ol prinsipol we ol lida blong Jos oli bin stap ripitim oltaem. Eksampol, hem i talem se long semtaem we sam toktok i stap gohed olsem hemia we i stap hapen insaed long famle haos naet, famle skripja stadi, mo famle prea, ol papa mo mama, oli save gat Spirit i lidim olgeta blong wet from ol taem ia blong tij.³

“Blong go wokbaot smol, blong draev i go long ol aktiviti, blong plei basketbol, blong kakae tugeta olsem famle, blong wok tugeta, blong singsing, mo blong givim seves long ol narafala, oli samfala aktiviti nomo we fasin blong tijim gospel i bin tekem ples insaed long famle blong mifala,” hem i talem. “Plante taem, blong tokbaot ol topik blong gospel i hapen nomo olsem, taem mifala i stap mekem ol narafala aktiviti.”

I no longtaem afta we hem i graduet long Brigham Yang Yunivesiti–Hawae, Kworom blong Olgeta Twelef Aposol Yan Danis Mok i bin gobak hom long Hong Kong, mo i bin kasem wan koling olsem presiden blong ol Yang Woman. Taem hem i stap traem blong kambak long laef long hom, blong statem wan wok, mo gohed wetem skul, hem i bin prea strong blong hem i kasem insperesen blong helpem ol yang woman we hem i stap wok wetem blong oli developem ol testemoni blong oli mekem olgetawan oli rere from fiuja.

Wan Sandei, taem hem i bin stap tij abaot fasin blong lukluk samting long saed blong taem we i no save finis, Sista Mok i bin luksave wan toktok we i kam long Spirit blong hem i ridim Buk blong Momon wetem wan yang woman, we i bin hapen se hemwan nomo i bin kam long jos long dei ia.

Sista Mok i talem: “Ol kaonsela blong mi mo mi, mifala i bin kwik blong putum ol gol i stap blong finisim Buk blong Momon olsem wan tim wetem yang woman ia. Hem i bin akseptem jalenj ia, mo i no tingting tu taem long hem, from se bae mifala i kasem gol ia tugeta.”

Stat long taem ia, Sista Mok, kaonsela blong hem, mo yang woman ia, oli bin setap wan “fren sistem” long Fesbuk, mo tru long ol teks mesej blong oli stap mekem wanwan long olgeta i tingbaot blong rid mo serem wetem wanwan long olgeta wanem we oli stap lanem.

Sista Mok i bin talem se hem i bin luk pruf blong bigfala jenis insaed long laef blong yang woman ia, we i stap kamaot long skripja stadi blong hem. Mo, taem we Sista Mok i bin stap ridim ol skripja insaed long tren evri dei, hem tu, hem i bin faenem ol blesing blong hemwan. “Mi tu, mi bin filim Spirit mo mi bin kasem ol ansa long prea blong mi, taem mi bin stap gohed blong muv fored long laef,” hem i talem.

Hem i gohed: “Long eksperiens blong mi, sam yut oli stap wari, mo oli no save stret se oli save kasem wan testemoni mo gat ol eksperiens long saed blong spirit semmak olsem we ol narafalawan oli stap gat. Be taem mifala i bin wok tugeta, mifala i bin stretem tingting blong olgeta wetem aksen blong mifala, se hemia i wok, mo mifala i bin stap blong sapotem olgeta long evri step blong rod ia.”