Sam Tingting blong Famle Haos Naet
Namba ia i gat ol stori mo aktiviti insaed we yu save yusum blong famle haos naet. Hemia sam eksampol.
“Waes Laef I Mekem Yumi Rere from Fiuja,” pej 12: Ridim ol sikis eria we i stap long stori we i talem se yumi save kam wan man we i no save dipen. Wanem sam long ol imejensi o problem we yumi save fiksim taem yumi no dipen long wan man long ol eria ia? Invaetem ol famle memba blong luksave wetem prea wijwan long ol eria ia oli nidim blong kam antap long hem mo blong setem ol gol blong kam antap long fasin blong no save dipen, long ol eria ia.
“Jastiti long Wan Wol we I No Klin,” pej 42: Wetem ol memba blong famle, toktok raon long ol kwestin we oli askem insaed long stori ia. Tingting blong serem ol prinsipol ia mo ol eksperiens ia we i save mekem testemoni blong yu i kam strong moa long saed blong jastiti. Toktok raon long ol wei blong yusum kaonsel we i stap insaed long stori ia.
“Stap Waes mo Stap Wan Fren,” pej 48: Stat blong ridim tes blong Elda Hels blong faenemaot huia ol gud fren. Tingting blong toktok raon long olsem wanem i impoten blong stap wan gud fren. Invaetem wanwan memba blong famle blong tingbaot tri wei we hem i save kam wan moa gud fren.
“Dia Amiga,” pej 60, mo “Welkamem wan Niu Sisen blong Laef,” pej 61: Ridim abaot ol Praemeri pikinini ia mo olsem wanem oli bin rere blong go long Yang Woman mo Yang Man. Olsem wan famle, tingting blong toktok raon long wanem ol pikinini ia oli bin mekem blong rere. Invaetem ol memba blong famle blong ridim buk blong Program blong Miwan o Diuti blong Mi long God mo faenem sam aktiviti we oli intres blong mekem long fiuja.
Wan Famle Haos Naet, Tu Lesen
Wan naet papa mo mama blong mi mo bubuman mo bubuwoman blong mi oli bin kam visit long wan famle haos naet. Wanwan long ol trifala pikinini blong mi i laekem blong tekpat, mo long naet ia, hem i bin taem blong boe blong mi we i gat seven yia blong givim lesen. Mifala i bin rere long wan smol displei, putum ol pikja abaot Kriesen i go antap, mo mifala i bin stadi mo luklukbak long wanem we bae hem i tijim. Boe blong mi i bin rere gud mo hem i bin glad tumas.
Long taem blong lesen, mifala evriwan i bin lisin gud long wanem we boe blong mi i stap eksplenem. Taem hem i finis, Samuel, we i gat tri ia, i mekem tingting se, hem tu, i wantem givim wan lesen. Mekem se hem i bin tekem ol pikja mo putum bakegen long tebol.
Long smol sopsop voes blong hem mo samtaem ol toktok blong hem i no talemaot gud, Samuel i bin givim wan lesen blong famle haos naet. Mo nomata hem i no bin rere from, hem i bin lisin. Hem i bin eksplenem long mifala olsem wanem oli bin krietem wol mo I bin talem long mifala abaot lav we Jisas Kraes i gat long wanwan long mifala.
Mifala i bin sapraes blong luk olsem wanem hem i bin tijim lesen ia long wan isi wei—i mekem semmak olsem we brata blong hem i bin mekem. Papa mo mama, wetem bubuman mo bubuwoman, oli bin sapraes mo hapi. Mifala i bin save luk lav we ol smol pikinini oli gat long gospel ia—mo lav we Jisas Kraes i bin gat long olgeta.
Lisbet Sanjes Fajardo, Meksiko