Stap Welkamem Wan Niu Taem blong Laef

Taem Noa i bin muv long ples ia, ol niufala fren blong hem oli bin helpem hem blong hem i save gud long laef long aelan. Naoia, olsem boe we i moa olfala insaed long grup, hem i stap helpem olgeta blong save gud long laef insaed long Yang Man. “Mi bin wari se bae oli akseptem mi o nogat, mo blong kam blong save ol narafalawan,” Noa i bin talem abaot taem hem i bin stat long Yang Man. “Blong stap go long ol aktiviti i bin helpem mi bigwan.” Singsing blong Praemeri we Noa i bin laekem tumas, i bin abaot ami blong Hileman, mo hemia hem i wei we hem i stap luk kworom blong prishud—olsem blong stap tugeta, blong stap wan.

Wanem advaes blong hem? “Stap olsem we yu stap.”

Blong Patrik, blong kasem prishud i no blong kasem 12 yia o moa. Hem i blong stap klin inaf mo stap rere. “Yu no kasem prishud nomo from se yu kasem 12 yia,” Patrik i talem. “Yu mas rere from.”

Dilan i haremsave olsem wanem i impoten blong stap rere. Hem i stap traem blong kasem jos 15 minit bifo taem, blong mekem se hem i rere long saed blong spirit blong save pasem sakramen. “Mi bin pasem sakramen tri o fo taem, mo evri taem, Spirit i tajem hat blong mi. Mi no ting se bae i gat wan dei we bae mi tekem olsem se mi save samting ia finis,” hem i talem.

Ben i bin talem se blong stap pasem sakramen, i stap mekem hem i tingbaot Las Sapa: “Jisas i bin stanap long ples ia. Mifala i stap stanap long ples we Jisas i bin stap, o Hem i wantem yumi blong stap long ples ia.”

Ben i stap wok blong winim Awod blong Fet long God, blong hem; mo hem i stap lukluk fored blong stap mekem ol baptaes blong olgeta we oli ded finis, blong fas taem. Ben i talem: “Mi no go insaed long tempol yet, be oltaem, ol narafala pipol oli givim ol testemoni abaot olsem wanem oli filim i naes mo i gud afta we oli go long ples ia.”

Noa i bin go long tempol blong fas taem i no longtaem. Hem i bin talem se ol yang man insaed long kworom blong hem oli bin mekem gud long hem olsem se hem i famle blong olgeta. Hem i talem: “Ating yu filim se yu fraet, be i gat ol pipol we oli stap ia blong helpem yu. Bae yu filim welkam.”