Tingbaot Olgeta we Oli Gat Wan Gudfala Laef
Dan Jons (1810–62)
I gat bitim wan milian misinari we oli bin singaotem olgeta stat long taem blong oganaesesen blong Jos, be Dan Jons hem i moa bitim wan long wan milian ia. Long ol misinari blong Wels, Presiden Godon B. Hinkli (1910–2008) i bin talem, “Lukluk long ol namba blong olgeta we i konvet, Dan Jons i mas stap long haf dasen olsem long ol misinari we oli wok moa gud long histri blong Jos.”1
Bifo hem i bin kam wan misinari, Dan i muvaot long Wels i go long Yunaeted Stet mo wok long Misisipi Reva olsem kapten blong wan stimbot we oli singaotem Maid of Iowa, we oli karem i kam plante long ol Lata-dei Sent i go long Nauvu, Ilinoa. Hem i bin joenem Jos long 1843 mo i bin fren gud wetem Profet Josef Smit.
Ol misin blong Dan i bin fulfilim ol las profesi blong Josef Smit we hem i bin rekodem. Long naet bifo oli kilim ded Josef Smit, hem i bin harem noes blong masket aotsaed long windo blong Katej Kalabus, mekem se hem i jusum blong slip long floa. Kolosap long hem, i gat Dan Jons. Profet i bin askem Dan sapos hem i fraet blong ded. Hem i ansa, “Yu ting se taem ia i kam nao? Taem yu stap long wan gud wok, mi no ting se ded bae i mekem plante i fraet.” Afta Josef i bin profesae, “Bae yu luk Wels yet, mo mekem misin we oli givim long yu i kamtru bifo yu ded.”2
Promes blong Profet i bin hapen long 1845, taem Dan mo waef blong hem Jen, oli bin singaotem tufala blong givim seves long Wels. Dan i bin yusum talen blong hem blong toktok, blong tijim gospel wetem strong tingting. Hem i bin save gud lanwis Wels mo Inglis, mo plante witnes i bin rekodem se hem i bin toktok wetem wan bigfala intres we i save holemtaet olgeta we oli stap lisin long hem long eni lanwis blong plante aoa.
Long Wels, Dan i raetem ol magasin, nius, mo ol buk blong Ol Lata dei Sent long Wels. Anda long daereksen blong Dan Jons, ol misinari long Wels oli bin setemap 29 branj mo baptaesem 1,000 pipol evri yia blong fas misin blong hem. Oli bin singaotem hem long seken misin long Wels long 1852, mo nomata bigfala agens we i stap kam agensem Jos, 2,000 pipol i bin baptaes long fo yia taem.
Long rod blong hem i gobak long Yuta, Dan i bin helpem blong tekem plante pipol blong Wels we oli konvet i gobak long Yuta. Taem hem i gat 51 yia mo ded, hem i bin help blong karem kolosap 5,000 pipol i go long Wes blong Yunaeted Stet.
Long lef: Pikja blong Wels misinari Dan Jons. Wan stimbot, olsem hemia we Dan Jons i bin kapten long hem, i kam kolosap long wof long Nauvu, Ilinoa. Dan Jons i helpem ol pipol blong Wels we oli bin muvaot long Wels.