Stap Tijim Stret mo Gud Fasin long Hom

Ol papa mo mama oli gat wan janis blong tijim mo jenisim sloslo ol fasin blong ol smol pikinini blong olgeta bifo Setan i gat paoa blong temtem olgeta mo bifo oli kasem eit yia, afta kam responsibol long fored blong God. … Lod i bin givim long ol papa mo mama ol spesel yia ia, we hem i fas yia blong laef blong wan pikinini, taem ol pikinini oli no responsibol long ol samting we oli talem mo mekem. Hem i wan responsabiliti mo blesing we ol papa mo mama oli gat blong tijim mo trenem ol pikinini blong olgeta blong laef long stret mo gud fasin.

Wan moa gud wei blong tijim stret mo gud fasin mo relijin long wan hom, hem i tru eksampol. Hop se ol papa mo mama bae oli kipim gud ol laef blong olgeta long wan swit mo klin wei mo save yusum olsem eksampol long ol laef blong olgeta long tijing mo trening blong ol pikinini blong olgetawan. [Presiden Deved O. MaKei (1873–1970) i bin tijim:] “Sapos yu tijim fet long God, soem fet long Hem yuwan; sapos bae yu tijim prea, yu mas prea yuwan; … sapos yu wantem olgeta blong stap kwaet, olsem yu tu yu mas stap kwaet; sapos yu wantem pikinini blong yu blong laef long wan klin fasin, we i save kontrolem hemwan, gat wan gud ripot, olsem soem hem wan eksampol we i klin inaf long evri samting ia.”¹ Taem yu mekem olsem, ol tijing ia i kam moa impoten long ol pikinini blong yu; mo olgeta, taem oli kasem ol tijing ia long ol papa mo mama blong olgeta, i save mekem olgeta i kam moa strong blong stanap agensem ol temtesen blong Setan, we gol blong hem i blong smasem ol laef blong olgeta taem oli kasem ol yia we oli responsibol long laef blong olgetawan. Ol papa mo mama oli gat diuti long wanem oli wantem ol pikinini blong olgeta blong kam long saed blong respek, stap tru, kwaet, mo gat karej blong mekem raet samting evri taem. I gat moa paoa long eksampol bitim tijing.

Evri dei laef long hom i mas stret wetem ol Jos prinsipol mo ol standet blong yumi. Ol aksen blong yumi evri dei i mas agri wetem relijin blong yumi. Ol pikinini oli kwik blong luksave sapos yumi no stap tru inaf. Jon Milton i bin talem se fasin blong gat tu fes i wan sin ia nomo we i had blong faenem be God nomo i save. Be, ol pikinini, oli save filim isi ol samting we i no stret, mo oli filim save taem yu no tru long olgeta o mekemap wan samting. Yumi save se ol pikinini oli folem moa ol samting we yumi stap mekem bitim ol samting we yumi stap talem. Ol papa mo mama oli mas stap tru oltaem long ol pikinini blong olgeta, kipim ol promes we oli bin mekem long olgeta mo oltaem talem trutok. Papa o mama we i mekem gud oltaem, i winim tras blong pikinini blong hem. Taem wan pikinini i filim se yu gat ona from tras blong hem mo ansa bak long hem, bae hem i neva spolem hemia, o putum yu daon …

Ol papa mo mama oli no mas faet long fored blong ol pikinini blong olgeta. Samtaem faet i save kamaot from blong tufala i traem blong stretem o panisim wan pikinini. Wan long tufala i toktok tumas; narawan i agensem. Mo yuniti ia we i fulumap hom ia, from i gat pikinini insaed tu, i mekem se yuniti ia i lus. Ol papa mo mama oli mas yunaet oltaem blong save wanem rod nao oli wantem wan pikinini blong folem; sapos no, hem i save folem wan rod we i no stret from hem i konfius. Rijad L. Ivens i bin talem: “Taem papa mo mama i seperet, i no stret mo i konfius, mo i mekem stamba blong famle i nomo strong.”² Yumi save se ol pikinini oli no strong taem situesen blong famle i defren wetem ol filing; oli save filim paoa blong samting ia mo ol defren samting we oli no save andastanem oltaem o save stret. …

Wan pikinini i gat raet blong filim se long hom blong hem i gat wan ples blong stap sef, wan ples blong protektem hem long ol denja mo rabis samting aotsaed long wol. Yuniti insaed long wan famle mo fasin blong stap tru oli impoten blong givim nid ia. I nogat wan ples olsem hom we yu save faenem tru glad ia we i save stap longtaem long laef ia. I moa gud blong mekem hom olsem wan smol heven; mo tu, mi luk heven i stret hom laef long wol ia we i gohed long heven.³ …

Gospel we yumi tijim i tru. Kraes i laef, God i laef, mo ol bigfala haos blong glori, oli mekem rere antap blong evri pikinini blong Hem we oli fetful mo givim taem blong olgeta long Hem. Plan naoia long wanem kaen hom mo famle yu wantem tumas mo olsem wanem bae yu save ansarem ol nid blong ol pikinini blong yu blong kipim olgeta long wan rod we i stret mo gud we bae i lidim famle i go kasem laef we i no save finis long wan selestiel hom. God i blesem yufala evriwan, ol brata mo sista blong mi. Mi ting yu save andastanem plante long ol samting we mi bin talem we i aplae long yu. Mo blong oganaesem mo karem i go, hom blong yu long wan tabu wei, i impoten tumas long ol yang pipol we i kam blong blesem laef blong yu.