Prea mo Pis

Wan naet mi bin rao wetem mama blong mi mo mi bin filim nogud tumas from. Mekem se mi plan blong prea. Nomata se mi no bin filim gud mo no wantem gat Spirit wetem mi, mi bin save se prea bae i helpem mi filim gud moa mo no gat tingting blong rao. Afta mama blong mi i aot long rum, mi bin stat blong prea. “Dia Papa long Heven, mi kam long Yu tedei long naet from …” No. Mi openem ol ae blong mi mo stretem ol han blong mi we mi bin foldem; i defren nomo. Mi traem bakegen. “Papa long Heven, mi nidim …” Hemia tu i defren nomo. Mi filim se Setan i wantem mi blong mi stop blong prea mo askem help long Papa long Heven.

Kwiktaem, mi bin gat wan filing blong talem tangkyu! Mi mekem, mo ol tingting i stat blong kamaot long maen blong mi long plante long ol samting we mi save talem tangkyu long Papa long Heven from. Taem mi talem tangkyu finis long Hem, mi tokbaot problem ia we i bin stap.

Afta long hemia, mi bin filim wan pis we i gud tumas insaed long mi, wan wom filing long saed blong spirit we mi save se Papa blong yumi long Heven, mo papa mo mama blong mi i lavem mi mo we mi wan pikinini blong God. Mi kam blong save talem sore long mama blong mi mo akseptem sore blong hem.