Mi Bin Prea From Strong Paoa long Tingting

Papa mo mama blong mi oli ol memba blong Jos, be oli no stap kam tumas long Jos. Hemia i mekem se samtaem, i gat raorao, from se oli biliv se famle taem i mas kam fastaem long evri narafala samting—bifo blong go long jos, o wok strong long ol koling blong Jos, mo mekem ol narafala aktiviti.

From se mi mi wan lida insaed long Praemeri mo wan memba blong kwaea blong wod, ol Jos miting blong mi, samtaem oli kam blokem ol diuti long famle. Wan dei, taem mi bin stap rere blong go long jeneral konfrens brodkas long mitinghaos blong mifala long Antananarivo, papa mo mama blong mi i mekem mi tingbaot se bae sam man oli kam long haos.

“Bae yu mas jusum bitwin famle blong yu mo Jos,” mama i bin talem long mi. “Yu stap long ples ia wetem mifala mo mestem konfrens, o yu go long konfrens mo fesem panismen.”

Mi disaed se bae mi no raorao wetem mama blong mi. Be, mi tekem smol taem blong askem Papa long Heven blong givim mi strong paoa long tingting mo paoa. Mi bin askem Hem tu blong hem i helpem mi blong save wanem blong mekem. Bae mi stap long haos wetem famle, o mi go long jos mo harem voes blong profet?

Taem mi finisim prea blong mi olsem, mi bin save filim Tabu Spirit. Mi bin save filim Spirit i leftemap tingting blong mi blong talem long mama blong mi se i impoten, long mi, blong mi go mo lisin long profet. Mi bin filim se mi mas talem long hem se bae mi kasem ol waes advaes, i no blong laef blong mi blong tedei, be tu, blong fiuja blong mi.

God i save mekem ol merikel samting, mo Hem i bin mekem hat blong papa mo mama blong mi i kam daon, mekem se oli letem mi blong go long jeneral konfrens mo mi no kasem panismen. Hemia i bin wan gudfala eksperiens insaed long laef blong mi. Hem i stap konfemem long mi se skripja ia i tru, we i talem se “tru long paoa blong Tabu Spirit, yufala i save gat save long saed blong trutok blong evri samting” (Moronae 10:5).

Mi save se sapos yumi tekem aksen blong yumi folem ol prinsipol blong gospel mo stap lisin long Spirit, oltaem bae yumi hapi wetem ol joes blong yumi. Eksperiens ia i bin mekem testemoni blong mi i kam strong moa, se God i stap ia blong yumi, mo Tabu Spirit i stap helpem yumi long laef blong yumi.