Olsem Wanem Nao Mi Bin Stap Strong long Gospel

Mi bin baptaes taem mi gat 12 yia, mo blong plante yia, miwan nomo mi memba blong Jos insaed long famle blong mi. Hemia i no bin isi oltaem, be laki nomo, mi bin gat blesing blong gat ol gudfala lida we oli bin helpem mi long rod blong mi long lanem ol doktrin blong gospel mo stap yusum ol doktrin blong mekem laef blong mi i kam strong moa, mo i kam antap moa. From desisen blong mi blong stap tru long wanem we mi biliv long hem, mi bin luk ol bigfala blesing oli kam insaed long laef blong mi, mo longtaem afta, insaed long laef blong ol memba blong famle blong mi tu.

Hemia sam samting we i bin helpem mi blong stap strong:

• Stap kolosap long Papa long Heven tru long ol aktiviti olsem prea mo skripja stadi. Hem i savegud abaot ol situesen we yumi stap fesem. Blong stap kolosap long Hem, i bin helpem mi blong tingbaot huia mi.

• Folem kaonsel blong ol lida blong Jos. Mi bin luk long laef blong miwan, se kaonsel we i kam long ol profet mo ol aposol, i tru.

• Yu mas save se blong stap laef folem gospel i krietem wan laef we i gud moa, naoia mo tu long taem we i no save finis. Hemia i bin helpem mi blong holemtaet ol standet mo fet blong mi. Ol lida oli bin leftemap tingting blong mi blong go long tempol, we i bin helpem mi blong gat wan visen long saed blong laef we i no save finis.

• Raonem yuwan wetem ol gudfala fren we oli stap gat ol semfala standet blong yu. Mi bin gat blesing blong gat ol gudfala fren we oli bin mekem se i isi blong mekem ol gudfala desisen mo blong mi holemtaet fet blong mi.

• Stap kolosap long famle blong yu. Mi bin lavem famle blong mi, mo mi bin wantem blong bildimap ol strong rilesensip wetem olgeta.

• Gohed long laef. Folem ol standet mo tekempat long ol program blong Jos. Bae oli helpem yu blong soemaot fet blong yu mo mekem ol gudfala joes. Plante taem, ol gudfala joes oli mekem se laef i isi moa, mo oltaem, oli mekem laef i hapi moa.