Wan Ki blong Kasem Wan Hapi Famle

I bin gat wan olfala stori blong ol Inglis man long 13 handred yia i pas finis abaot wan prins we i bin kambak hom blong fanem dog blong hem wetem blad i ron daon long fes blong hem. Man ia i spid i go insaed, mo wetem bigfala fraet, i bin luk se bebi boe blong hem i lus mo bed blong bebi i kapsaed i stap. Wetem kros hem i bin pulumaot naef blong faet blong hem mo kilim dog blong hem. Smol taem afta, hem i bin harem smol boe blong hem i krae—bebi ia i laef! Long saed blong pikinini ia, i gat wan wolf we i ded i stap. I tru we dog ia, i bin faet blong protektem bebi blong prins ia long wan rabis wolf we i wantem kilim bebi ia.

Nomata we stori ia i save mekem man i seksek, hem i tijim wan samting. Hem i givim tingting ia se stori we yumi talem long yumiwan se from wanem ol naraman i mas mekem samting long nara wei, i no oltaem semmak long wanem we i tru—samtaem yumi no wantem save tu blong save ol tru risen. Bae yumi wantem moa blong filim se i oraet blong holemtaet kros blong yumiwan. Samtaem yumi save stap kipim samting i stap long yumi blong plante manis o yia. Samtaem i save stap blong wan ful laef.

Wan papa i no save fogivim pikinini boe blong hem from rod we hem i bin tekem we i no folem tijing blong hem. Boe ia i gat ol fren we papa blong hem i no agri long hem, mo hem i bin mekem plante samting we i go agensem wanem we papa blong hem i ting se hem i mas mekem. Hemia i bin seperetem papa mo boe ia, mo taem we boe ia i save mekem, hem i livim hom mo no bin wantem blong kambak. Tufala i nomo toktok bakegen. Papa ia i bin filim se hem i raet? Ating. Boe ia i bin filim se hem i raet? Ating.

Wanem we mi save nomo se famle ia i bin seperet mo i no hapi from i nogat wan long tufala, papa mo boe ia i save fofogivim tufala bakegen. Tufala I no save luk bitim ol konkon memori we tufala i bin gat long tufala wanwan. Tufala i bin fulumap wetem kros long hat blong tufala, be i no lav mo fasin blong fogiv. Wanwan long tufala i stilim long hemwan, janis ia blong gat paoa blong lidim laef blong narawan blong mekem ol gud samting. Seperesen ia bitwin tufala i kam moa was mo i bitim mak, mekem se wanwan long tufala i kam prisena long saed blong spirit long tingting blong hemwan.

Laki nomo se, Papa blong yumi long Heven we i no save finis mo we i gat lav mo i waes, i bin givim yumi ol wei blong winim ol spes ia we oli gat hae tingting long hem. Bigfala Atonmen we i nogat en, hem i bigfala aksen ia nao blong fasin blong fogiv mo stretem ol samting bakegen. Paoa blong hem i moa bitim save blong mi, be mi testifae wetem evri hat blong mi, mo sol se i tru mo i gat bigfala paoa. Sevya i bin givim Hemwan olsem wan wei blong jenis from ol sin blong yumi. Tru long Hem, yumi save kasem fasin blong fogiv.

I nogat wan long yumi we i stap mo no mekem sin. Yumi evriwan i mekem ol mistek, i gat tu, yu mo mi. Yumi evriwan i bin kasem soa. Yumi evriwan i bin mekem ol narawan i kasem soa.

Hem i tru long sakrifaes blong Sevya blong yumi we yumi save kam olsem wan god mo kasem laef we i no save finis. Taem yumi akseptem ol wei blong Hem mo winim hae tingting blong yumi tru long fasin blong mekem hat blong yumi sopsop, yumi save stretem ol samting mo gat fasin blong fogiv long ol famle blong yumi, mo long ol laef blong yumi wanwan. God bae i helpem yumi blong stap fogiv moa, blong wantem moa blong wokbaot seken mael, blong kam faswan blong talem sore nomata sapos i no bin rong blong yu, blong fogetem fasin ia blong stap selfis mo nomo fidim olgeta tingting ia. Tangkyu long God, we i bin givim Wan Stret Pikinini ia Nomo, mo long Pikinini blong Hem, we i bin givim laef blong Hem from yumi.

Yumi save filim lav blong God blong yumi evri dei. Olsem wanem? Bae yumi no save givim smol moa taem blong yumi long ol narafala brata mo sista blong yumi olsem we hym ia we yumi laekem i stap tijim “From se Oli Bin Givim Fulap long Mi”?² Lod i bin openem doa blong yumi blong save fogiv. Olsem wanem? Bae i no stret blong putum long saed ol fasin blong stap selfis mo hae tingting blong yumiwan, mo stat blong openem ol doa blong fogivnes blong save blesem olgeta we yumi traehad blong fogiv—speseli long evri famle blong yumiwan?

Long en, fasin blong stap hapi i no kamaot long fasin blong stap stret gud evriwan, be i kamaot nomo taem yumi yusum ol tabu prinsipol, hemia long ol smol step. Fas Presidensi mo Kworom blong Olgeta Twelef Aposol i bin talem: “Fasin blong stap hapi insaed long wan famle laef, yu save faenem moa taem famle i folem ol tijing blong Lod Jisas Kraes. I gat sakses oltaem long ol mared laef mo famle, taem oli folem ol stamba tingting blong fet, prea, sakem sin, fasin blong fogiv, respek, lav, fasin blong kea, wok, mo ol samting o pleplei we oli gud.”³

Fasin blong fogiv i stap stret long medel blong ol simpol trutok ia, we yu faenem long plan blong stap glad blong Papa long Heven. From fasin blong fogiv i wok tugeta wetem ol prinsipol, i wok tu wetem ol pipol. Hem i wan ki, we i openem ol doa we oli lok, hem i stat blong wan rod we i ones, mo hem i wan long ol bes hop blong wan hapi famle.

Bae God i helpem yumi blong fogivim smol moa ol famle blong yumi, fogivim moa yumi wanwan, mo ating fogivim moa yumiwan. Mi prea se yumi save eksperiensem fasin blong fogiv olsem wan wei we plante hapi famle i mekem semmak.