Visiting Tijing Mesej
Stap Ona long Ol Kavenan blong Yumi
Wetem prea, stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yu.
Fet, Famle, Help
Visiting tijing i wan wei blong soem fasin blong yumi blong kam disaepol mo wan wei blong ona long ol kavenan blong yumi taem yumi givim seves mo mekem wanwan long yumi i kam strong moa. Wan kavenan i wan promes we i tabu mo save stap kasem en, bitwin God mo ol pikinini blong Hem. “Taem yumi luksave se yumi ol pikinini blong kavenan, yumi save huia yumi mo wanem we God i wantem long yumi,” Elda Rasel M. Nelson blong Kworom blong Olgeta Twelef Aposol i talem. “Ol loa blong Hem, oli raetem long hat blong yumi. Hem i God blong yumi mo yumi ol pipol blong Hem.”1
Olsem ol visiting tija, yumi save mekem olgeta we yumi visitim i kam strong moa tru ol hadwok blong olgeta blong kipim ol tabu kavenan we oli bin mekem. Taem yumi mekem olsem, yumi helpem olgeta blong rere from ol blesing blong laef we i no save finis. “Evri sista long Jos ia we i bin mekem ol kavenan wetem Lod oli gat wan tabu koling blong help sevem ol sol, blong lidim ol woman blong wol, blong mekem ol hom blong Saeon oli kam strong moa, mo blong bildim kingdom blong God,”2 Elda M. Rasel Balad blong kworom blong Olgeta Twelef Aposol i talem.
Taem yumi mekem mo kipim ol tabu kavenan, yumi kam ol tul long ol han blong God. Bae yumi save talemaot ol bilif blong yumi mo mekem fet blong yumi wanwan long Papa long Heven mo Jisas Kraes i kam strong moa.
I Kamaot long Ol Skripja
1 Nifae 14:14; Mosaea 5:5–7; 18:8–13; Luk long Doctrine and Covenants 42:78; 84:106
I Kamaot long Histri blong Yumi
Tempol i wan ples blong evri Sent oli kam blong talem tangkyu, Lod i bin talemaot long Profet Josef Smit long 1833. Hem i wan ples blong evri sent oli talem tangkyu, mo blong hem i wan ples blong givim instraksen long evriwan long olgeta we Hem i singaotem long wok blong ministri long wanwan koling o ofis we oli stap long hem; blong mekem se oli kam stret gud evriwan long save blong olgeta long saed blong ministri blong olgeta, hemia long saed blong toktok, long saed blong prinsipol, mo long saed blong doktrin, abaot evri samting we oli blong kingdom blong God long wol, we i blong ol ki blong kingdom ia we Hem i bin givim long olgeta (luk long D&C 97:13–14).
Ol Rilif Sosaeti sista long Nauvu, Ilinois, eli long ol yia 1840, oli bin helphelpem olgeta wanwan blong rere from ol tempol odinens. Long ol odinens blong hae prishud we ol Lata-dei Sent oli bin kasem long Nauvu Tempol, oli bin luk paoa blong God (luk long D&C 84:20). “Taem ol Sent oli kipim ol kavenan blong olgeta, paoa ia i mekem oli kam strong moa mo i bin sastenem olgeta tru long ol hadtaem blong olgeta long ol dei mo ol yia we i bin stap kam.”3
Long Jos tedei, ol woman mo ol man raon long wol, we oli fetful, oli givim seves insaed long tempol mo gohed blong faenem paoa long ol blesing we oli save kasem nomo tru long ol tempol kavenan.
Nauvu Ilinoa Tempol, i kam long Skot Gudwin