Bae Mi Jusum Wok o Jos?

Waef blong mi, mo mi, mitufala i bin mared long 1981 long Tokio Japan Tempol. Laef blong mifala afta long mared i no bin isi long fas taem. Mi bin glad blong gat wan wok, be mifala i gat hadtaem blong pem evri samting blong mifala. Mifala i bin askem Papa long Heven blong kasem help blong hem, mo mifala i bin mekem evri samting we mifala i save mekem blong gat naf mane kasem en blong manis mo pem taeting blong mifala. Mifala i bin save se sapos mifala i trastem Lod, bae Hem i bin givhan long mifala.

Wan wik, tufala tugeta, waef blong mi mo fren blong mi, i tekem sem kopi blong advetaesmen blong niuspepa. Hem i wan advetismen blong wan fultaem Inglis tija.

Mi sendem pepa we i tokbaot mi i go long kampani mo oli bin askem mi blong go long wan intaviu. Long en blong intaviu, man we i mekem intaviu i talem se: “Long pepa blong yu, yu tokbaot se yu bin mekem sam volontia wok olsem wan misinari long Jos blong Jisas Kraes blong Ol Lata-dei Sent. So, hemia i minim se yu stap go long jos long ol Sandei, i tru? Sapos yu mas disaed se bae yu go long jos, o bae yu go long wok long ol Sandei, bae yu jusum wijwan?”

Hem i bin wan had kwestin from se mi bin nidim wan wok we i gud moa. Be afta we mi bin tingting hevi, mi ansa: “Bae mi go long jos.”

Man we i intaviu i smael smol mo talem: “Ah. Oke. Mi save.” Afta, hem i talem se mi save go wetem promes ia se bae kampani bae i talemaot desisen blong olgeta long naet ia nomo, mo bae mi ring blong faenemaot risal blong hem. Taem mi stap aot long rum, mi ting se mi lus finis.

Afta long naet, long taem blong ring, mi bin ringim namba blong kampani wetem bigfala fraet.

“Olsem wanem long risal blong intaviu?” mi askem long sekretari. “Mi no pas nating, ah?”

Mi bin sek be mi bin hapi wetem ansa blong hem.

Sekretari i talem: “Bae mifala i wantem askem yu blong kam wok blong mifala.”

Samples wan manis afta, mi bin lanem from wanem nao mi karem wok ia. Sekretari i bin eksplenem se man we i bin mekem intaviu, haos blong hem i stap long saed nomo blong ol fultaem Lata-Dei Sent misinari. Plante taem, hem i stap lukluk olgeta misinari oli smat blong ron long baskel blong olgeta i go long wok blong olgeta long moning.

“Hem i bin biliv se yu, we yu blong semfala jos, bae yu wok blong mifala i had semmak olsem ol misinari ia oli stap wok blong jos blong olgeta,” sekretari i talem. “Yu laki!”

Stat long taem ia, famle blong mifala i oltaem gat wanem we mifala i bin nidim.

Taem mi stap tingting long spesel eksperiens ia, tingting blong mi i kam antap mo mi gat kamfot. Mi save se, plante taem, God i stap yusum ol nara pipol blong blesem ol pikinini blong Hem. Mi no save talem gud hamas mi filim blong talem tangkyu from waef blong mi mo fren blong mi, from insperesen blong tufala blong tekem advetaesmen blong niuspepa ia i kam long mi, from ol misinari ia we oli bin stap wok strong mo gudfala eksampol blong olgeta, mo from Papa blong yumi long Heven, we i gat sore, i gat lav mo i kea, we i gat merikel paoa blong konsekretem ol eksperiens blong yumi blong gud blong yumi.