Filipin Misinari Trening Senta, we Elda Rasel M. Nelson blong Kworom blong Olgeta Twelef Aposol i bin dediketem long 20 Mei 2012, i save tekem kasem 144 misinari blong Filipin, Kambodia, Hong Kong, India, Indonesia, Mongolia, Pakistan, Sri Lanka, Taewan, mo Taelan. Ol misinari ia oli trenem olgeta long ol lanwis blong ol kantri blong olgeta.

Tufala bilding blong niu senta ia i gat insaed wan So rum, ol smol translesen rum, wan ples blong ol kompiuta, wan ples blong was, ol rum blong tij wetem ol odio tul, ples blong slip blong ol misinari, ol klasrum, mo ol ofis.

Long prea blong dediketem niufala bilding ia, Elda Nelson i talemaot bigfala tangkyu from Atonmen blong Jisas Kraes mo from fetful misinari mo ol memba blong Jos raon long wol we oli lavem mo mekem wok blong Lod. Hem i askem wan blesing blong stap long Ripablik blong Filipin blong “kipim ol doa blong welkam i open” long evri wokman blong Lod mo prea se ol pipol blong nesen ia bae oli gat blesing blong gat “fridom mo fasin blong stap akaontebol blong gro long fasin we i stret mo gud, tugeta long saed blong bodi mo spirit.”

Presiden Dita F. Ukdof, Seken Kaonsela long Fas Presidensi, i bin dediketem Manaus Brasil Tempol—namba 138 tempol blong Jos long wol mo namba sikis long Brasil—long 10 Jun 2012.

Fet mo komitmen blong Ol Lata-dei Sent we oli stap long Brasil, we i gat moa long wan milian memba, i olsem Reva blong Amason, Presiden Ukdof i bin talem, we tugeta i ron strong mo i dip.

Blong klosap 20 yia, ol memba blong Jos blong Manaus, wan siti we i stap hemwan mo ol bigfala reva mo bus i raonem, oli bin stap travel long ol bas haos blong atendem tempol long Sao Paulo, Brasil—wan 15 dei trip long bot mo bas—mo afta long tempol blong Karakas, Venesuela—wan 8 dei trip long bas.

Elda Klodio R. M. Kosta blong Olgeta Seventi i bin stap olsem presiden blong Brasil Manaus Misin taem i bin open long 1990.

“Mi bin gat wan tras se Manaus Tempol bae i bisi tumas, evri dei, from ol pipol ia oli lavem tempol,” Elda Kosta i talem. “Oli tijim ol pikinini blong olgeta blong lavem tempol. Tempol i spesel tumas long olgeta.”

Long Fraedei, 1 Jun 2012, sam 350 Lata-dei Sent long Samoa i bin joenem sam nara pipol blong Samoa blong maj long indipendem selebresen maj tru ol rod blong Apia. Fifti yia i pas, long 1962, kaontri i bin kasem indipenden blong hem aot long Niu Silan.

Ol oganaesesen, ol skul, ol lokol jos, mo ol intenasonal oganaesesen i bin tekempat. Ol Lata-dei Sent studen wetem ban blong olgeta oli bin entetenem ol ten taonsen pipol we oli bin stap lukluk.

Be long wiken i gat wan nara selebresen blong Ol Lata-dei Sent long Samoa; hem i wan 50 yia we fas stek i bin oganaes long kantri ia, long Apia.

Long Sandei, 3 Jun, Elda Jemes J. Hamula mo Elda Kevin W. Pieson blong Olgeta Seventi, we tufala i memba blong Pasifik Eria Presidensi, i bin toktok long ol Lata-dei Sent mo ol ges long wan spesel miting we i bin brodkas long ol LDS mitinghaos raon long nesen ia.

Wetem lukluk we i go long fored, ol Lata dei Sent long Samoa oli tingting strong blong gohed blong givim seves mo mekem ol famle, ol vilij, mo nesen, blong olgeta oli kam strong moa, Elda Hamula we i stap olsem Eria Presiden i talem. “Yumi stap gro gud olsem wan Jos long ples ia, mo yumi stap gro insaed long ol famle blong yumi mo long laef blong yumiwan taem yumi lukaotem blong folem ol tijing mo eksampol blong Jisas Kraes,” hem i talem.