Eita atoa anei e nehenehe e bapetizo ia’u ?

« Nuno e Miriam, e pee anei orua i te hi‘oraa a Iesu Mesia na roto i te bapetizoraa ia orua i teie mahana maa i muri nei ? » Te aniraa ïa a te tuahine Silva.

Fifi roa te tari‘a o Paulo. No ani noa mai nei na tuahine misionare i to’na taea‘e 10 mathaiti e to’na tuahine no te bapetizoraa !

« E ! ». « E ! ». Te pahonoraa ïa a na maehaa ma te oaoa.

Eita ta Miriam e nehenehe eiaha e ata. Ua aroha atura o Nuno i te Tuahine Lopes. Ua anaana a‘era te hoho‘a mata o te tupuna vahine i roto i to’na parahiraa taueue.

Tau hepetoma to na tuahine misionare haapiiraa ia Paulo e to’na na taea‘e e tuahine i te fare o te tupuna vahine i te motu ruperupe ra e te matai puihau atoa no São Miguel—1000 maile (1600 km) te atea i te fenua Potiti. E mea au na Paulo i te iriti i te ni‘araa o te uputa no te muaraa fare o te tupuna vahine ia tomo mai te matai puihau a haere noa mai ai na tuahine Lopes e te tuahine Silva na raro no te haapii ia ratou i te evanelia.

Ua parau na tuahine misionare e, e haapiiraa taa ê to teie mahana. Ua ite atura ïa Paulo eaha râ. E bapetizohia Nuno raua Miriam, mai ta Iesu iho i haapii ra! Ua hinaaro atoa Paulo i te pee i te hi‘oraa o te Faaora.

« E te mau tuahine, e nehenehe atoa anei ta’u e bapetizo i te mahana maa i muri nei ? » ua ani oia ma te hiaai rahi e te Buka a Moromona i faahoho‘ahia i roto i to’na rima.

Ua hi‘o au mai te tuahine Silva ma te ta‘iri i te upoo. « Aita e nehenehe, e Paulo. Ua parau mai te Fatu ia matou e, e ti‘a ia tatou i te bapetizohia ia na‘ehia râ ia tatou te va‘u o te matahiti. E ono matahiti noa to oe, no reira eita â oe e faautu‘ahia no ta oe mau ma‘itiraa ».

« E te tuahine » pato‘i mai nei Paulo, « ua pure ho‘i au e ua tai‘o vau i te Buka a Moromona e te utuafare mai ta orua i haapii mai. Te haere nei au i te Paraimere i te mau hepetoma atoa e te tupuna vahine e te metua tane fetii ra o Mário. Ua ite au e, e parau mau te Ekalesia ! Eita atoa anei e nehenehe e bapetizo ia’u na muri iho ia Nuno e Miriam ? »

« E ohipa maitai roa ta oe i te oraraa i te mau faaueraa e te haapiiraa i te evanelia », te parau ïa a te tuahine Lopes. « E ti‘a râ ia oe ia tia‘i â e piti matahiti no te bapetizoraa ».

Pe‘ape‘a roa ino Paulo, haamata atura te roimata i te tahe mai. Ti‘a ihora e horo atura i roto i to’na piha i ni‘a, i reira ho‘i oia e to’na na taea‘e e tuahine e taoto ai.

I muri mai i to’na ta‘iraa i roto i to’na turu‘a te tahi maa minuti, ua faaroo Paulo i te hoê taata e pa‘uma mai ra. Parahi mai nei te metua tane fetii Mário i ni‘a i te ro‘i o Paulo.

« Eaha tera, e Paulo ? » te uiraa ïa a te metua fetii Mário.

« Ua parau mai te tuahine Silva e te tuahine Lopes eita ta’u e nehenehe e bapetizohia, e nehenehe râ ta Nuno raua Miriam », ta Paulo ïa parau. « Ua hinaaro vau ia riro mai ei melo no te Ekalesia ! » E mea au na’u ia himene i te mau himene i te pureraa oro‘a na reira atoa te haapiiraa no ni‘a i te mau papa‘iraa mo‘a i te Paraimere. Aita vau e hinaaro ia vaiihohia vau i muri».

Pahono mărû mai nei Mário « Paulo, e nehenehe â ta oe e riro ei tuhaa no te Ekalesia, noa’tu pai e, aita â oe i paari no te bapetizoraa ».

« Nahea ïa ? » Muhumuhu a‘era Paulo i roto i to’na turu‘a.

« Ua ite oe e, te faaineine nei te Paraimere i te hoê faanahoraa no te pureraa oro‘a », te na reira ra o Mário. « Ua parau mai to orometua no te Paraimere ia’u e, te imi ra oia i te tahi mau taata no te faaite i to ratou iteraa papû i roto i te faanahoraa. Teie te tahi rave‘a no oe ia ohipa i roto i te ekalesia », te faataaraa ïa a Mário.

« Oia mau anei ? » Parahi mai ra o Paulo e fariu atura i ni‘a i to’na metua tane fetii. Feruri ihora maa minuti. « Peneia‘e e nehenehe atoa ta’u e faaite i to’u iteraa papû i te bapetizoraa o Nuno raua Miriam ! »

« E mana‘o maitai roa te reira ! » Te parau ïa a Mário. « Noa’tu e, e mea apî â oe no te bapetizoraa, e nehenehe râ ta oe e farii i te hoê iteraa papû ».

Ou‘a a‘era Paulo i raro i to’na ro‘i e horo atura i te tahua i raro.

« Te haere ra oe i hea e Paulo ? » Te piiraa ïa a Mário.

« Te haere ra vau e haapiipii ia faaite i to’u iteraa papû i te mau misionare ! » Te pahonoraa ïa a Paulo ma te oaoa. « E faaite noa vau i te reira e tae roa’tu i to’u bapetizoraa ! »